¹ Kwe wensi e simapepo mukulu, akasolwa ukufuma muwantu, akasolwa ukuwomba ukwimilila awantu ivy akulingana nu Leza, alwakuti awafima konsinye ivyawila ni nzuwi ku melezyo. ² Angalwisya umutende nawoliwo wano watakumanya swinya wano wavwamanga weweliwe wenga achisambilizyo kukutomboloka. ³ Pamulandu we choo, akalondwa ukufima inzuwi ku luwembu lwakwe weliwe wenga ku mbembu zya wantu. ⁴ Asachakwe weliwe ukuti wensinye asende umuchinzi woo. Mumasyo mwakwe, witwa nu Leza, ndivino Aaron walinji. ⁵ Munzila iyiliyonga, nanti we Kilisitu atayichindamisile wenga uwusimapepo wukulu. Mumasyo mwakwe,wenga wino wavwanzile kwe weliwe watili,'' Wewe we mwana wane,'' ilelo nawa ne mukwasi wako.'' ⁶ Chilinge muno swinya wavwanzile muchipwa chinji wewe we simapepo uwa penape mumiwele ye Melikizedeki.'' ⁷ Mumpindi ya muwili wakwe,Kilisitu wayipile mumapepo vyonsi nukulenga nizwi kulu ilya kulila swinya walizile ni minsozi kwe Leza, wino ali maka ya kumupususya ku mfwa, nga wamwivwichizizye umulandu wa wumi wawuleza wakwe. ⁸ Chingatenga walinji amwana wasambilizile ukwivwila kwe chino wachulizile. ⁹ Weni wapanzilwe umutele swinya walinji weliwe kwe wensi wino akamutontela, weliwe akaleta itulwa lya muyaya. ¹⁰ Wimisilwe ne Leza nge we simapepo mukulu ukufuma muntampulo yemelekezedeki. ¹¹ Tuli nivivule ivya kuvwanga ukufuma nu Yesu, kweni achitale ukulondolola pakuti mwawa nuwuntamanya mukwivwichisya. ¹² Chingatenga ku mpindi yoo mwandi muwe mwe wasambilizya mukulondwanye wumwi ukusambilizya mwemwe inzila izyakukonka amazwi ya kwe Leza. Mukulonda umukaka, mutakulonda ichakulya ichiwome! ¹³ Amuno wensi wino akang'wa umukaka akasambilizya amazwi amatele pamulandu achili amwana umutichi. ¹⁴ Kweni ichakulya ichiwome achawa songo. Vyoo avili vyovyo kwewo pa mulandu wawusongo wawo wali nukwivwichisya kwawo ukusambilila ukupusania uwuzima kuwuwipe.