Pasal 9

Jesus diona e siniotu vemarera pai pienaam pa.

(Narapi Markus 2:1-12 e Lukas 5:17:26 pai kota) 1 Jesus sia so wa pai e, sembotuwa ruru pai e sesovera ea so matauni nie aniose pa. 2 Amana siniotu pesia senggor siniotu vepota marera pesi, viata nana patar pai, e senggoria so Jesus. Jesus siejo siniotu pa sene sanetiar pasi sibaba pa, kievo so siniotu vepota marera pai, e diojo; "Ine atuma panau, sun sanemu pa. Nomu tatar pasi sive ampon to manau.'' 3 Apa veve baba nana Torat pa esia, senggavo nana sesanemi raro pasi e setojo; "Siniotu nei siesiajara Sien Allah. 4 Jesus ruin sesanemi raro pasi, apa kievo so sia e diojo; "Aso vitopi mesanemi raro pasi sitatar veja pa? 5 Apavo topi tindia, tanggavore tatojo; "Nomu tatar pasi sive ampon to manau pa te? "tanggavore tatojo: "Suobatau e ruapa e'? 6 Vape nine ma nari Iveruana maso mia, toapa Siniotu Atu ne Yau, ipaya so ive ampon tatar pasi nana dunia nei vavone pa". Janama Jesus kievo so siniotu vepota marera pai e diojo; "Suobata au, sueriou nomu patar pai e vuevu". 7 Apa siniotu vepota marera pai siobatai e vievu so nie anio pai. 8 Kaiwasa pai siejo pi veve diadi nine pa, sematai e sesanandik Sien Allah, aso Sien Allah dion paya vebaba vetoapa jani, maso siniotu pasi pa.

Jesus siau Matius, ave riausar-l pa. (Nanapi Markus 2:13-17, e Lukas 5:27-32 pai kota)

9 Manau pa janama Jesus suvi nanapi nie rara pai pa, siejo siniotu veruir pajak pesi, sano pa Matius, miesoi nana nie kantor pajak pai. Apa Jesus kievo soi e diojo; "Ruama ruausara Yau"; Apa Matius siobatai e dindausara Jesus. 10 Avori Jesus niesoi e diapi nana Matius nie anio pai. Apa siniotu veruir pajak pa sia, tutir siniotu kaiwasa dietor ve siniotu vekariria pa sia, senda so Jesus, tutir nie murit pa siae, setapi tutir sia. 11 Apavo siniotu Parisi pesia sesajo. Apa setutan Jesus nie murit pasia, e setojo; "Aso vitopi mene guru pai diapi tutir siniotu veruir pajak pa sia, tutir ainiotu vekariria pa sia pa?'' 12 Jesus diediawa setutane pa, ruar so sia e diojo; "siniotu vepanaam paima, sa siesera dokter pai va, mae siniotu vepota pai ni, siesera dokter pa. 13 Ite mesajo nanari surat repo pai nie ayat verotu toapa ninei, "Isanemi vesie napa sanepaya pai, mae pisom nanapi binatan pai ma piva". Aso irama ne ave isau siniotu vetindia to manau pasi va, vape siniotu veve tatar pasi.
Vekavo nanapi puasa pai pa (Nanapi Markus 2:18-22, e Lukas 5:33-39 pai kota)
14 Manau na jana pa, Yohanes viono Kambu Sren pai, nie murit pa sia senda so Jesus. Avori setutani e setojo; "Aso vitopi ama tutir Parisi wa sia e amambe puasa, Mae nomu murit ne sia ma piva pa? 15 Amana Jesus kievo so sia e diojo; "Avo metone sanepaya pa sitoane? Mua veririau vavoru pai andia tutir nie tamu pa sia nana pesta ririau pai pa, nari sembe susa e? Sa piva, vape raria pesi mano, nari senggor mua veririau vavoru pai vurusu sia. Apino janama membe susa pe.'' 16 Sa esi diawar tawan sasu tawa vemaraba pesi nana sis dovaru vavoru pesa va. Aso nari sis dovaru vevavoru pai titu mamo, piorabana sasu pai, e viediajara e vemaraba pai bieba rawai. 17 Toapana kota, sa esi siara anggur vavoru pesi susa binatan rawa vitutu kambu vetawawari pesi va. Aso toa mamo, binatan rawa vitutu kambue vetawawari jani, miesavu e kieriria, amamo anggur pai tievuvu. Apavo anggur vavoru pai ma, siara susa binatan rawa viutu kambu vevaoru kota, apino sandu vurae surate pe".
Siniotu veve baba so Anio Ari pai, atu pai vioru pa, e vavi vevarami buasa Jesus pai. (Nanapi Markus 5:21-43, e Lukas 840-56 pai kota)
18 Jesus andia kievo so Johanes viono Kambu Sren pai nie murit pa si ramie, siniotu veve baba nana Anio Ari pesi, riama disan aebu pasi nana Jesus aropo pa, e kievore diojo; "Ine atuma vavi pai erine vori vioru. Vape, isau so auwe, rua bueka a so i, ave amamo tienam riwanea". 19 Apa Jesus tutir nie murit pa sia, sesobata siae, senda tutir siniotu pai. 20 Semasi riarabua wa, amana vavi pesi, siemuai pota samir niar pai, woroi pa taun suraemuandu, riasiwara Jesus na karu pa. Sanepai nana sane raro pae 21 Diojo, Jeka a varabuasa nie sasu juba wai vea mamo, nari ipanaam. Apa dieka a varabuasa Jesus Nie sasu baba juba pai sope pa. 22 Diam jani Jesus diaraie dieduwata vavi pai, avori kiewo soi e dioja; "Ine atuma panau, sun sanemu pa. Aso joma sanetiarpa, puenaam pa". Apa nanapi diam jani kotae, vavi pai pienaam. Manau pa janama Jesus ria so siniotu veve baba so anio ari pai, nie anio pai. 23 E siejo mana kaiwasa pai siaie rioi ranu sai e siewau pa. 24 Apa kievo so kaiwasa paie diojo, "Mesuvi wura! Atuma nei ma vioru va; i ma diena vea". Apa kaiwasa pai vura, semari Jesus. 25 Kaiwasa pai suvi to manau pa, Jesus suapui so andiraro atuma vevoru pai viata nana pa, e rut nana vara pa. Apa atuma vevoru pai siobatai e tienaam ea. 26 Kavo viotandori nine masiepare wopaiusara uta pasi vura.
Jesus diona e siniotu veremi kaber pa sandu supanaam Pa
27 Jesus suvi na jana e ria so ria rabua pa mana, siniotu veremi kaber pa sumbe muandu sunda usari. Susau e surojo, "Dauti Atu panau, ka sanepai nandu!" 28 Jesus suapui so anio pa mana, siniotu veremi kaber pa sunda masoi. Apa Jesus dutan sandu e diojo, "Avo musanemitiar toapa, diadi jona e mupanaame?" amana sunduar so I e surojo, "Sie panau, amusanemitiar!" 29 Janama Jesus dieka a so sundemi pasi e dinggavora e diojo, "Aso musanemitiar pavo, vediadi maso mandu ariri mune sanetiar pasi". 30 Janama diadi so susajo pa. Apa Jesus dierer so sandu to karakuai vesiri, ave amamo sutopa kavone so esi vape moja. 31 Vape sunda e sutopanusara Jesus nana uta pasi vura.
Jesus diona e siniotu vesoremi mumuja pai kievo pa.
32 Siniotu muandua pa sandu sunda to manau, avori siniotu vesoremi mumuja pesi, wainunu vekariria pasi simasoi nanai, senggori ea ma so Jesus. 33 Apa Jesus dietavar wainunu vekariria pasi, e nanapi diam jani kota e, siniotu vesoremi mumuja pai diadi kievo riwanea. Kaiwasa pai kievo usara, senggavore setojo, "Aja amasajo pi vetoapa nine esa nana uta Israel varami!" 34 Amana Parisi pa sia senggavore setojo; wainunu vekariria pasi sine veve baba pai, andi diono paya so I, ave amamo ditatavara wainunu vekariria pasi pa."
Jesus siejo kaiwasa pai to sanepai pa
35 Apavo Jesus ria wawarira uta pasi, nana Kota pesi a so Kota pesi, e nanapi aniose pesi a so aniose pesi. Dieniau nanapi anio ari Yehudi pasi e ditopana Sien Nie Kavo Vesie pai, toapa, Sien Allah Vie prentah, ariri Raja pa. Jesus dion panaam so kaiwasa pai nanapi sene pota saserai pa. 36 Jesus siejo kaiwasa pai to sanepai sia, aso setatara setotoa e setimbava ariri domba vevaro gembala pa. 37 Apa Jesus kievo so nie murit pa sie e diojo, "Ai mor viema pai reto, piau, vape siniotu viema pasi sipau va. 38 Apavo mesau so vene romi pai, ave amamo dienatu siniotu viema pesia, so nie ai mor nei diema pa."