Pasal 26

Baba Yahudi pa sia sesasera ria ve amamo setapur Jesus pa (Markis 14.1-2 Lukes 22.1-2. Yohanes 11:45-53)

1 Jesus tiopan kavo jasi to manau pa, janama kievo so nie murit pa sia e dioyo, 2 Menduin toapa raria muandu ea mamo, Raria Baba Paskah pai na, e nari sesiwa Siniotu Atu ne Yau, ave sepa Ya nana aitabat pai.'' 3 Nana rabua jana Imam baba pa sia tutir Yahudi pa sene veve baba pa sia, senduir nanapi Imam Baba mo pai, Kayapas nie anio pai. 4 Senggavo ariria ve amano setapur Jesus manana e semuni. 5 Apa senggavore setoyo, "Vape, tananari kavo nine nana Raria Baba wai vape moja, aso nari vediayara e, kaiwasa pai vieririwi vavera."

Sembuvu mani vesairara pai so Jesus pa. (Markus 14:3-9. Yohanes 12:1-6)
6 Nana rabua Jesus niana Kota Betania pa, nanapi Simon papone vesamuai pota pado pai nie anio pai, 7 Apa vavi pesi riama so Jesus. Apa kior mani vesairara mo, vian to tariai mo pesi, sesari nanapi botol senanari nana rovuki viate mo nina, Jesus andia miesoi e diapi, amamo vavi pai vuvu mani vesairara pai nana ru pa pa. 8 Jesus nie murit pa sesayo pa senggasiou. Apa senggavo e setoyo, "Avo mani nei dio meir sararidioi tonine ve? 9 Mani vesairara nini ma diadi viova e dian to tarai, e nie pipi pasi siona so siniotu vevaro pi pa sial.'' 10 Jesus ruin sene sanepaya pasi, apa kievo e dioyo, "Aso vitopi metoi suara vavi nei pa. I ma nienari pi viate nina e samuai sanandika maso Yau. 11 Aso siniotu vevaro pi pa sia ma, asiaja tutir mia tawana, vape Ya ma itutir mia tawana va. 12 Aso vuvu mani vesairara nini so ine tarai nei pa ma, nienari ariri papo so Yau, aso nari vepir Ja na papi pai pana. 13 Itopa so mia, nana dunia nei vetutira, na uta topi Sien Allah nie Kavo Vesie pai tiopan nana pa, vavi nei nie pi nienari nine, nari ve topanusara e visanemipai tawana vavi nei kota."
Yudas viov Jesus pa. (Markus 14: 10-11, Lukas 22:3-6)
14 Avori Jesus nie murit suraemuandua pa sia esi nina, vesanomi nanapi Yudas Iskariot pai, ria so imam baba pa sia. 15 Kievo so sia e dioyo, "Ivov Jesus maso mia mamo nari meton vito so yau?" Apa setator pipi ropia perak pa siniotu siri e sura, avori setonasi so Yudasi. 16 Nanapi raria jani e, Yudas siesera ria ve amamo viov Jesus.
Jesus dian pisia Paska pai tutir nie murit pa sia pa. (Markus 14-12-21, Lukas 22:7-14, 21-23, Yohanes 13:21-30)
17 Nana raria retena pai, nanapi Raria Baba Roti vevaro ragi pai, apa Jesus nie murit pa sia, sendama so I. Setutani e setoyo, Avo uta topi sanevesie ama nanari ariri pisia Paska pai nana maso Au?" 18 Apa Jesus kievo so sia e dioyo, "Menda so siniotu pesinina na Kota wai, metopa so i, e metoyo, "Gurui kievo e dioyo, ine raria pai miesi to manau; Yo inanari Paska pai nana nomu anio nei, tutir ine murit ne sia.''''' 19 Apa Jesus nie murit pa sia, senanari ariri kavo Jesus diemias sia soa pa. Senda sepir ariri pisia Paska pai. 20 Diru pa mana, Jesus tutir nie murit suraemuandua pa sia, semasoi e setapi. 21 Asiaja setapi rami e, Jesus kievo e dioyo, "Metadiawa, mia esi nari viov Yau". 22 Jesus nie murit pa sia setadiawa pa, sesanemi pa sikariria veito. Apa sia siri- siri dutan Jesus e dioyo, 'Sie panau, jokama ya pe?" 23 Apa Jesus kievo e dioyo, "Siniotu vesuan roti susa mok siri tutir ya pai, andi nari viov ya pa. 24 Siniotu Atu ne nari ivoru, ariri vevui to manau nanapi Surat Repo pai pa. Vape, kawai maso siniotu vevov Siniotu Atu ne Ya pai. Vesie pa siniotu jani ma, siniani diavini vape moja va pana". 25 Avori Yudas vekavo kavo vata va pai kievo e dioyo, "Sie panau, jokama ya pe? Apa Jesus ruar so i e dioyo, "Ariri kuevo vedia."
Jesus nienari Meja Sren pai pa (Markus 14:22-26 Lukas 22:15-20 | Karintus 11.23-25)
26 Seto setapi pa, Jesus kior roti pai, avori diap nadi trima kasi pai. Janama pio savu roti pai, nanapi vara pasi, avori dionasi so nie murit pa sia e dinggavora dioyo, "Menggori, e metani; nini ma ine tarai pai na." 27 Manau pa kior mok baba vesara anggur pai, avori vie trima kasi so Sien Allah. Janama dion mok pai so nie murit pa sia e dinggavora e dioyo, "Metunu, mia vura. 28 Aso nini ma ine veria venanari ariri Sien Allah nie arer pai na, veria vetavuvu so kaiwasa vepau, ave sesamuai ampon so sene tatar pasi. 29 Vape itopa so mia, "Sa yunu anggur nini ea va, veitoro nana raria yunu anggur vavoru pai tutir mia, nanapi Yai nie Dunia Vavoru pai." 30 Manau pa sendoi ranu som pesi. E manau na jana pa senda so suovavo Saitun.
Petrus diasani so sa vievur Jesus va pa. (Markus 14:32-42, Lukas 22:39-46)

31 Avori Jesus kievo so nie murit pa sia e dioyo; "Nanapi diru nini kota, nari mia vura, membavu vurusu Yau; aso vevui nanapi Surat Repo pai toapa, Sien Allah kievo e dioyo, 'Nari imun gembala pai, e nie domba tau pai miesasiepar. 32 Vape isobata Ya riwanea mamo, nari ipapon mia so Galilea." 33 Apa Petrus kievo so Jesus e diayo, "Veitoro esi ne sia vura sembavur au wo, ya ma sa pivai!" 34 Amana Jesus kievo so i e dioyo, "Nanapi diru nini kota, aja kokori pa sisau varami e, nari puoras Ya ve toru". 35 Apa Petrus kievore diayo, "Veitoro ivoru tutir Au wo, sa iporas au va! E murit esi pa sia vura, senggavo toa kota.
Jesus vie nadi nana romi Getsemani pa. (Markus 14:32-42, Lukas 22:39-46)
36 Manau pa janama Jesus ria tutir nie murit pa sia so uta vesanomi na Getsemani. Avori kievo so sia e dioyo, "Memasoi na nine, e ira so wana e Ive nadi.'' 37 Apa kior Petrus tutir Sebedeus atu pa sandu e sendausari, Janama Jesus sane pa kariria e disamuai saneraro vemanasi pesa va. 38 Avori kievo so nie murit pa sia e dioyo, "Saneraro ne kariria veito, masi Yo jimboru veivea. Memasoi na nine, e metaran tutir Yau." 39 Janama Jesus ria to ve kasau katu, avori disanaebu pasi e vie nadi e kievo e dioyo, "Yai, diadi mamo, buona e kariria nari veter Ya nini, vie kasau vurusu Ya reto. Vape, ariri ine mayar pai va, ariri yai nomu mayar pai vea." 40 Manau pa Jesus sioverai so nie murit pa setoru, e sieyo mana setoru setena. Apa kievo so Petrus e dioyo, "Avo miama sa mepa va so metaran diam siri tutir Ya vae? 41 Metaran e membe nadi, ave amamo metera sotoura pai vape moja. Tindia mamo, mene wainunu pasi reto simayar sinanari ariri vetindia pai, vape mepaya va, aso rurawa siniotu pai ma pia va." 42 Janama Jesus sioverai vie nadi riwanea e kievo e dioyo, "Yai, kariria nini nari tier Ya to, e sa tierir Ya va, amamo ariri Yai nomu sanevesie pai vea." 43 Manau pa Jesus sioverai riwanea e so nie murit pa setoru, e sieyo mana setoru setena rami, aso sembe remo veya. 44 Apa Jesus ria vurusu sia riwanea vie nadi ve torua pa, e vienadi e kievo na kavo reu kievo na pasi. 45 Manau pa sioverai riwanea so nie murit pa sia e kievo so sia e dioyo, "Aja metena e memanau marior ramie? Ite mesayo, raria pai miesi to manau so sembovo Siniotu Atu ne Yau, maso siniotu veve tatar pa sembarami pasi pa na. 46 Mesobata mia, mendama ve tanda. Mesayo! Siniotu vevovo Ya pai, riama to manau."
Setapu Jesus pa. (Markus 14:43-50, Lukas 22:47-53, Yohanes 18:3-12)
47 Jesus andia kievo ramie, Yudas, murit suraemuandua pa sia esi nina, riama tutir kaiwasa borai pa esia, senda tutir i, senggor sumbe tutir airora. Imam baba pa sia, tutir veve baba na Yahudi pa sia setamias sia. 48 Siniotu vevovo Jesus pai tiopan ariri so sia to manau, toapa, "Siniotu teini isum na tararei pa, amamo andina. Metapu tawani." 49 Sendama so uta pa mana, Yudas ria bura Jesus e kievo e dioyo, "Tabe so Guru au". Janama sum na Jesus tararei pa. 50 Apa Jesus kievo so i, e dioyo, "Manetai, vitoini ruama soi na nine pa? Janama kaiwasa vepau pa sia sendapo setapu tawan Jesus. 51 Jesus nie murit vena tutir I na jasia esi, piati nie sumbe pai e ditaratuwa Imam Baba mo pai nie womi pai, taradiau pai to tieitu vesiri. 52 Apa Jesus kievo so nie murit pai e dioyo, "Suosuruv nomu sumbe pai riwanea apui so nie sor pai. Aso teini dio rura tutir sumbe, nari vioru na sumbe. 53 Au ma muemon diadi Isau so Yai e dienatu tentara Malaikat pa tau surae muandu e rawai sawawara ma senggota tata pa vae? 54 Vape toa mamo, kavo veve arer to manau nanapi Surat Repo pai, nari sive diadi toane? Toapa ave sive diadi mo, ariri nine pino. 55 Avori Jesus kievo so kaiwasa pai e dioyo, "Avo siniotu viomamu ni Ya te? Apa menda tutir pimamuna e airora ma metitapur Ya pa? Raria pasi vura ma Yeniau na Anio Allah pai, vape metapur Ya va! 56 Vape ima toapana to, ave amamo masi tutir nabi pa sembui nana Surat Repo pai pa. Janama Jesus nie murit pa sia vura, sembavur Jesus.
Senggor Jesus so Agama pai nie ruir baba vekutu kavo pai pa. Markus 14:63-65, Lukas 22:54-55, 63-71, Yohanes 18:13-14, 19-24)
57 Kaiwasa vetapu tawan Jesus pa sia senggoria so Imam Baba mo, Kayapas, nie anio pai. Yahudi pa sene veve baba pa sia, tutir veve baba na Torat pa sia, senduir sia na wana to manau. 58 Mae Petrus ma pui usara Jesus e vekasau, ra so Imam Baba mo pai nie varavu pa. Avori Petrus suapui so Imam Baba mo pai nie varavu pa, e miesoi tutir siniotu viarama vediora pa sia, ave amamo sieyo tawan Jesus so nari setoni toane. 59 Apa imam baba pa sia tutir Agama Yahudi pa sene Ruir Baba Vekutu kavo pai, sesasera veve saksi viawia, ave amamo sepir hukuman voru pai so Jesus. 60 Apa veve saksi viawia pa sepau vesiri, vape sesamuai ria pesi so setimbe karaki pa va. Avori siniotu pa sumbe muandu, 61 Asandu suroyo, "Siniotu nini kievore dioyo, Ya ma diadi so irura Anio Allah nei e ivauni riwanea nana raria toru vea pa.''' 62 Avori janama Imam Baba mo pai biatai e kievo so Jesus e dioyo, "Avo au ma sa kuevo rera au vurusu saksi ne sia sene kavo setimbe karak au nesi vae? 63 Amana Jesus pie vea. Apa Imam Baba mo pai kievo riwanea so I e dioyo; "Isawor au nanapi Allah vetenam pai e, tuopa so ama, Raja Vekor Slamat, Allah Atu pai andi au mo e?" 64 Apa Jesus ruar so i e dioyo, "Ariri Tuani kuevo pa. Vape itopa so au, nanapi rabua nine, nari mesayo Siniotu Atune Imasoi ariri Raja nana vepaya na pi vura pai vara vata pa, e nari ira na arepa nana rora wa-ma.'' 65 Imam Baba mo pai diediawa Jesus kievo tonine pa, pioraban matauni nie sasu pai, e kievo e dioyo, "Siniotu nei kievo sisiayara Sien Allah, apavo tasasera saksi ea va. Mataun metadiawa nie kavo vesisiayara ne to manau. 66 Apavo metone sanepaya pasi sitoane?" Amana senduar e setoyo, "Siesara, apavo vioru vea". 67 Apa sengganisu nanindu re pasi e setumi, esia ma sebasari, avori senggavo so l e setoyo. 68 Raja vekor Slamat pai andi Au ve vata mo mamo, buap, teini riora Au ne?''
Petrus pioras Jesus pa. (Markus 14.66-72, Lukas 2256-62, Yohanes 18:15-18, 25-27)
69 Apavo Petrus ma miesoi na varavu vorira wa. Avori womi vavi pesi riama kievo so Petrus e dioyo, Jokama au kota tutir Jesus siniotu Galilea wai mana." 70 Amana Petrus pioras na sendemi pasi vura e dioyo, "Ya ma iruin kavo kuevora vedia va." 71 Janama Petrus ria so rature repo vorira wai ea. Apa womi vavi pesi vesiei, sieyori ea, apa kievo so kaiwasa vena ja sia, e dioyo, "Siniotu nini, erine andia kota, tutir Jesus nanapi aniose Nasaret pai." 72 Amana Petrus pioras riwanea e siawora e dioyo, "Vata mo e Ya ma iruin siniotu jani va.'' 73 Vorabua va mana, siniotu viosa na jasia, senda ma so Petrus e setoyo, vata mo e au ma sia esini au. Ima veruana vesiri nanapi nomu raopui ne." 74 Amana Petrus siawora e dioyo, "Vata mo e, ya ma iruin siniotu jani va!" Nanapa diam jani kota e, kokori pa sisau. 75 Janama Petrus sanepai aso Jesus kievo soi pa, toapa, "Aja kokori pasi sisau varami e, puoras Ya ve toru to manau! Apa Petrus suvi ari so vorira wa, e siai veito miesasera.