Pasal 20
Kavo soratarawa nanapi siniotu venanaripi nana romi anggur pa sia
1
Sien Allah nie Kerajaan pai ma vieva ariri kavo soratarawa nini; Siniotu vene romi anggur pesi, suvi sapa e siesera siniotu venanaripi nana nie romi anggur pai
2
Kutu ariri vait pai so sia to manau toapa, raria siri mamo ropia vebera pa siri. Janama diemias e senanaripi na nie romi anggur pai.
3
Diam rimeat sapa pa, vene romi pai ria ea, e siejo mana siniotu pesia setisisiosa vea na pasar pai pa.
4
Apa kievo so sia e diojo, "Menda menanaripi na ine romi anggur wai. Nari ivait mia nanapi vait vetariai. Apa senda.
5
Diam suraemuandu raria pai, tutir diam toru ravinena pai, siniotu vene romi pai suvi e nienari toa riwanea.
6
E deriasi diam rim ravinena pa, suvi riwanea, apa siejo mana, esiaja setisisiosa pa. Apa dutan sia e diojo, "Aso vitopi metisisiosa veivea na raria vetutir nini na nine ne, menanari piesa va pa?"
7
Amana senggavore setojo, "Varo siniotu viono nanaripi so ama". Apa siniotu vene romi pai kievo so sia e diojo, "Tojana mamo, menda ve menanaripi na ine romi wai.'
8
Ravinena pa ma, siniotu vene romi anggur pai kievo so mandor pai e diojo, "Suau venanaripi pa sia e vuait siri-siri nie gaji pai, retena nanapi siniotu vesua vepuiya pai, veito raama so vesua retena pai".
9
Janama siniotu venanaripi na diam rim ravinena pa sendama. Siri-siri siemuai ropia veberapa siri.
10
Avori siniotu venanaripi nana sapa mo, (veito ravinena) pa sia senda ea ma. Sene sanepaya pa sitoapa nari sesamuai e rawai. Arora e sesamuai ropia vebera pa siri kota.
11
Sesamuai pipi pasi to manau mana, senggasiou vene romi pai. Senggavore setojo,
12
Siniotu vera vepuiya pa sia ma senanaripi diam siri vea. Mae ama ma amananaripi na raria vetutira pai e amataris wor, vape tuani vuait sia pa masi vaveri tutir ama pa.'
13
Amana Tuan vene romi anggur pai kievo so venanari romi pa sia esi e diojo, "Manetai, ya ma isasara so au va. Aso tanggutu vait pai to manau toapa, raria siri so ropia veberapa siri pa mana?
14
Apavo kuor nomu vait pai e rua. Aso isanemivesie yono vait maso siniotu vesua vepuiya pai, nanapi vait vemasi vaveri, ariri vait yono so au pai pa mana?.
15
Ite ya ma sa inanari ariri yone sanevesie nanapi pi yone va te? Ite buerandu so yonate pae?
16
Janama Jesus kievo riwanea e diojo; "Toapana kota, siniotu vepui mo pa sia, nari sembe vepapo mo, e siniotu vepapo mo pa sia, nari sembe vepui mo".
Jesus kievo nanapi nie voru pai, ve kali veve torua pa. (Nanapi Markus 10:32-34; e Lukas 18:31-34 pai kota)
17
Jesus dio ria so Yerusalem pa, vetiai ria rabua pa, avori siauruir nie murit pa sia mesari. Janama kievo so sia e diojo;
18
"Nine ma tanda so Jerusalem pana, e Siniotu Atu ne Yau nari sembovo Ya so Imam Baba pa sia, tutir veve baba nana Torat pa sia. E nari sepir hukuman voru pai so Yau.
19
Avori sesiwa Ya so siniotu Yahudi va pa sia. Nari sesisiayar Yau, sendora Yau, e setawakir Ya nana aitavat pai.''
Vape nana raria veve torua pai mamo, nari Isobata Yau ea. Yacobus tutir Yohanes susiniamipai nie sau pai(Mrk. 10:35-45)
20
Avori Sebedeus vinie pai, ria tutir atu pa sandu ma so Jesus. Disan aebu pasi na Jesus aropo pa e dio siau piesa.
21
Apa Jesus dutani e diojo, "Mai, piesana pe?" Amana vavi pai kievo so Jesus e dioyo, "Isanemi vesie ine atuma ne sandu sunggasir au na rawa sara pa tutir rawa vata pa, nana raria toni nari vue Raja pa."
22
Apa Jesus kievo so sia e diojo, "Aja menduin ariri pi mesauwa ne varami. Nari mepaya so metunu nanapi mok vitin marior nari junu nana paie? "Amana senduar e setoyo, "Ama paya".
23
Apa Jesus kievo so sia e dioyo, "Ma diadi metunu kota nana ine mok jitunuma pai. Mae nanapi kavo teini nari kiasir Yau, nana rawa sarane tutir rawa vatane pa ma, Ya ma ipa so ikutu pa va. Uta jasi ma sietapua maso siniotu Yai diri to manau pa sia".
24
Murit sura esi pa sia, setadiawa kavo nine pa, senggasiou Yakobus Yohanes sandu.
25
Apa joma Yesus siau ruir sia vori kievo so sia e dioyo, "Menduin toapa, veve Mananir so kaiwasa e veruin Sie va pa sia, setowawotu sene rayat pa sia. E sene veve baba pa sia, seto rarojara sia.
26
Vape mia ma sa toa va. Sovera ea e, teini dio vie baba so mia, amamo andi vie viadidina maso mia.
27
Mae teini dio vie ru so mia, amamo ima vie womí maso mia,
28
ariri Siniotu Atu ne Ya kota, irama ve amamo viadidin Ya va, vape ave yedidina, e Ivov Ine tenam nei e pieriri kalwasa vepau.
Jesus diona e siniotu veremi kaber pa supanaam pa (Markus 10:46-52: Lukas 18:35-43)
29
Rabua Jesus tutir nie murit pa sia sesuvi vurusu Kota Yeriko pa, kaiwasa pa sepau sendausara sia.
30
Apa siniotu veremi kaber pa sumbe muandu, sumasoi na ria dere pa. Suradiawa Jesus ria na ria pai pa, susau e suroyo, "Sie panau, Dauti atu pa nau, ka sanepai nandu!"
31
Amana kaiwasa venana jasia, senggasiou sandu e setamias e supeya. Vape surumi to baba rawai ea e suroyo, "Sie pa nau, Dauti Atu pa nau, ka sanepai nandu!''
32
Apa Jesus diosaeti, e siau sandu. Avori dutan sandu e dioyo, "Musanemi vesie inanari vito maso mandu?"
33
Amana suroyo, "Sie pa nau, amusanemi vesie amusajo e vesie"
34
Apa Jesus sanepai sandu pa janama dieka upis sundemi pasi. Apa nanapi diam jani kota e susajo to vesie. Apa surinda usara Jesus.