Pasal 19
Jesus tiopanariri nanapi veke veviniemi pa. (Markus 10:1-12)
1
Jesus kievo na kavo aniau jasi vura to manau pa, janama suvi vurusu uta Galilea e ria so uta Judea nana maria Jordan rawesi pa.
2
Kaiwasa pau sendausari, e diona e sepanaam na uta jana.
3
Avori siniotu Parisi pa esia sendama so i e sesotour I. Setutani e setoyo: "ariri tane atoran agama nei mamo, esi vinie pai nienari sasara vito vea, amamo diadi so vekei pa?
4
Apa Jesus kievo so sia e dioyo: "Aya metap nana surat repo pai varami so venanari siniotu pai, nanapi retena pa e nienari sia pa, mua pai tutir vavi pai pa va e,
5
E manau pa kievore diojae dioyo: "Apa joma mua pai vievur tamani-siniani sandu e, vie siri tutir vinie pai pa, apa sunduir sumbe siri.
6
Apavo sumbe muandu ea va, vape siri. Apa joma, pi vito pi Sien Allah pioruira veve siri to manau pa, sa siniotu pa sipowasa ea va."
7
Avori siniotu Parisi pa setutanie setoyo, tojana mamo, aso vitopi Musai diemiase senanari surat vingge veviniemi so vinie vekea pai pa?
8
Apa Jesus kievo sosia e dioyo, Musai miayar usara e mengge membiniemi pa ma, aso joma mendumi pa sikarakuai veja pana. Vape retena pa ma toa va.
9
Apavo metadiawa; "Teini kie vinie pai arora e vinie pai nienari kavo va vepui, ririau tutir vavi vevesiei pesi ea, amamo siniotu jani ma nienari kavo vavi."
10
Apa Jesus nie murit pa sia senggavo so I e setoyo, "Masi kavo pa sitojana veja so mua e vavi veririau mamo, vesie pa vindiriau vape moja'
11
Amana Jesus kievo so sia e dioyo. "Sa kaiwasa ruin ariri kavo ninesi va, i ma maso kaiwasa Sien Allah dietapu to manau pa semesari vea.
12
Aso siniotu veririau va pa esiaja, aso ima setoa to manau, nana setavi sia pa. E esia kota sendiriau va pa, aso siniotu vevesiei sinanari sia toa. E esia kota ma, setiri na matau sia, ave sendiriau vape moja, ave amarno setenam usara Sie pai. Teini piaya so tiepur kavo aniau ninesi mamo, ave amamo tiepusi.
Jesus vie berkat atuma katu pa sia pa. (Markus 10:13-16: Lukas 18:15-17)
13
Siniotu pesia senggor atuma pa sia so Jesus, ave amamo siasana vara pasi rawain sendumi pasi e dimbe nadi so sia. Amana murit pa sia senggasiou siniotu pa sia.
14
Apa Jesus kievo so nie murit pa sia e dioyo; "Memu vedior sia vape moja. Metona ve atuma pa sendama so Yau, aso siniotu vetoapa nine sia sembe kaiwasa so Sien Allah pa".
15
Janama Jesus siasan vara pasi tawana sendumi pasi e vie berkat sia.
Avori suvi e ria vurusu jana. Katiei vevekaya.pai. (Markus 10 17-31: Lukas 18:18-30)
16
Raria pesi pa siniotu pesi riama so Jesus kievore diyo; "Guru, pi viate vitoni nari inanari, ave amamo isamuai tenam vatarno vevata to woroi pai?"
17
Apa Jesus kievo so i e diojo, "Aso vitopi butan Ya so pi viate pa? Pi viate pa ma siri to. Sanepai buojo tuenam mamo, kuor usara Sien Allah nie Prenta pasi pino".
18
Amana siniotu pai duta e diojo; "Prenta tonina?" apa Jesus ruar so i e diajo, "Mun sinotu va; nuenari kavo vavi va, buemanana pi va; vue saksi viawia va;
19
Tuetuan tamamui siniamui sandu; e sanepai siniotu vevesiei, ariri sanepai vera mataun au pa.
20
Amana katiei pai dioi aso Jesus e diojo, "Prenta jasi vura ma inanari aririasi to manau. Vitopi mandiu ea rami ne?
21
Apa Jesus kievo so i, e diojo, "Buojo buon ariria ve simasi vura mamo, rua vuova nomu pisasera pasi vura. E sine pipi pasi, buonasi so siniotu vevaro pi pa sia, e au ma nari suemuai rar nana pa rora wa. Manau mamo, ruama rua usara Yau!"
22
Katiei pai diediawa kavo nine pa, diarai e vievu tutir sane raro veve susah, aso vie kaya veja pana.
23
Janama Jesus kievo so nie murit pa sia e diojo, "Itopa so mia, marabat vesiri maso siniotu veve kaya pa si, sisua na Sien Allah nie Dunia Vavoru pai pa.
24
E yo itopa riwanea maso mia, e tapisa rawai maso binatan onta pasi sisua na ret kamberei pa, nanapi siniotu veve kaya pasi sisua na Sien Allah nie Dunia Vavoru pai pa.''
25
Murit pa sia setadiawa Jesus kievo tonine pa, senggavo usara e setojo, "Tojana pavo, teini nari diadi siemuai slamat?"
26
Jesus dieduata sia vori kievo e diojo, "Maso siniotu pasi mamo, siojo sa diadi va, vabe maso Sien Allah mamo, diadi vei vea".
27
Avori Petrus kievo so Jesus e diojo, "Ite suejo, amambavur amane pi vepau pa vura e amanda usara au ne. Apa nari amasamuai vito?"
28
Apa Jesus kievo so sia e diojo, "Mesanemitiar vea, nanapi Dunia Vavoru wai mamo, Siniotu Atune nari imasoi sasana Yau, nana ine Karapesa Raja pai. Raria jani mamo, ine verausara Ya pa mia, nari memasoi sasana mia kota, nana karapesa suraemuandua pasi, e membe prenta usapui suraemuandua pasia, nanapi kaiwasa Israel pai.
29
E teini vievur nie anio pai to manau, pivai neta pa sia, pivai raruo vavi pa sia, pivai tamani siniani sandu, pivai atu pa sia, pivai romi, aso sanone, amamo nari siemuai soveraasi ve kali utin siri ea. E nari disamuai tenam viaroi pai kota.
30
Vape kaiwasa rabua nine si, vepapo pa sia nari sepui ea, e rabua nine vepui pa sia nari sepapo ea."