Pasal 17
Jesus vieruani nanapi nie rurawa Sie pai pa. (Nana Markus 9:2-13 e Lukas 9:28-36 pai kota)
1
Kara raria rimesiri, avori Jesus kior Petrus e Yakobus tutir neta katu Yohanes, e semesari senda setauta ayai so wi vetariai pesi.
2
Avori Jesus riwa nie vava pa na sendemi pasi; apa re pasi sisanggapara ariri wor pai, e nie sasu pai miemara e bierbera.
3
Avori nie murit pa setoru sesayo Musai tutir Elia, sunggavo tutir Jesus pa.
4
Apa Petrus kievo so Jesus e diojo; "Sie panau, vesie vesiri so ama nana uta nine pa. Muayar mamo nari ikena anio pa toru na nine, siri so Sie panau e, siri so Musai e siri so Elia."
5
Petrus andia kievo rami e, arepa vemamara pesi, riama tievun sia, e setadiawa raopui pesi kievo na arepa pai raro pa e diojo: "Ine Atuma isanemipaya pai nine, andi dio sanevesieni maso Ya pa. Metadiawa-I".
6
Jesus nie murit pa setadiawa raopui nini pa, sematai veito setawa avav so kakopa wa.
7
Amana Jesus riama diekaaso sia e diojo; "Metosa, mematai va!"
8
Sesasana sendemi pasi e sesayo mana, setisayo esi ea va, e sesayo Jesus miesari vea.
9
Janama sembiar na wi pai avav pa, Jesus diono kavo sanepaya so sia e diojo; "Sa metopanusara kavo erine mesayora pasi so esi va, nanapi Siniotu Atune aya isobata Ya vurusu voru pai varami pa".
10
Apa murit pa setutan Jesus e setojo, "Aso vitopi veve baba na Torat pa sia senggavo toapa, nari Elia ni ria papoma pa?''
11
Amana Jesus ruar so sia e diojo; "Maite, Elia ria ma e nari dion ariri pi vura e simasi.
12
Vape itopa so mia, Elia ria ma to manau, vape kaiwasa sieyo riruin i va, setoni sararidioi ariri sene mayar vea. Apavo nari senanari toa pana kota maso Siniotu Atu ne Yau".
13
Janama murit pa senduin toapa, Jesus kievo nanapi Yohanes vion Kambu Sren pai.
Jesus diona e atuma vetera wainunu vekariria pai pienaam pia. (Markus 9:14-29 Lukas 9:37-43 pa kota)
14
Jesus tutir nie murit pa sia, sesovera ea maso kaiwasa pai. Apa siniotu pesi ria ma, disan aebu pasi nana Jesus aropo pa,
15
avori kievo so Jesus e dioja: "Sie panau, ka sanepai ine atuma wai. Sio ve wonggei. Apavo pota wani sia so i to rawai mamo, tiau susa adia, pivai tiau susa kambu.
16
Ikari so nomu murit pa sia to manau, vape diadi so setona e pienaam va."
17
Apa Jesus kievo so murit pa sia e diojo: "Vata vesirie pi-pa mia kota! Vatae miama siniotu vetatar e, visanemitiar va pa miana. Nari Ina tutir mia e itituwa mia veito raria tonina? Menggor atuma pai ma".
18
Janama Jesus diemias wainunu vekariria venana atuma pale suvi. Apa wainunu vekariria pai suvi e atuma pai pienaam nana diam jani kota.
19
Janama murit pasia sendama so Jesus, e setutani na semesari pa e setojo; *aso vitopi diadi so amatatavar sietan pai va pa?"
20
Amana Jesus ruar sia e diayo; "Aso mensanemitiar mo vapana. Mesanemipaya: Mene sanetiar pasi sibaba e simasi sesawi mor pai vea, amamo diadi menggavo so wi pesie metoyo: "Rua vurusu ninea so wana!" amamo ariria, wi pai nari ria vurusua. Pi vura diadi menanarisi kota.
21
Vape wainunu vekariria vetoapa ninesi ma, diadi tatatavarsie sisuvi nanapi nadi tutir puasa vea".
Jesus kievo riwanea nanapi Nie voru pai pa (Mrk. 9:30-31; Luk. 9:43b-45)
22
Nana rabua Jesus tutir nie murit pa sia senduir na uta Galilea pa, Jesus kievo so siae dioyo: 'Woroi va so, Siniotu Atune Yau, sembovo Ya so siniotu vara pa.
23
Nari semun Yau, vape nanapi raria veve torua pai mano, nari isobata Yau". Apa Jesus nie murit pa sia, sesanemi pa sikariria vesiri.
Vevait pajak so Anio. Allah.pai.pa
24
Nana Jesus tutir nie murit pa sia, sendama so uta Kapernaum pa, siniotu vera e veruir pipi pajak so Anio Allah pa sia, sendama so Petrus e setutanie setoyo, "Nomu Guru pai viait pajak so Anio Allah pai te pivale?
25
Apa Petrusi ruar e dioyo; "Viait!" janama Petrusi vievu ra pa, Jesus diuta soponi papo e dioyo, "Simon, avo buosanemipai toane? Teini nari viait pajak so raja dunia ne sia? Rayat pai te, siniotu vera ve wasa pa sie?''
26
Amana Petrusi ruar e dioyo, "Siniotu vera ve wasa pasi". Apa Jesus dioyo, "Toapa jana mamo, rayat pai ma viait vape moja!
27
Vape, moja, aso tatonae sesanemiraro pasi simandiu pe! Apavo, rua so ruru wai e tuetapa. Kuor dia retena puot pai. Aso nanapi dia wai sore raro wai ma, nari suemuai pipi vemasi maso tune pajak pai. Kuor pipi janie bimbait sia, aso tune pajak so Anio Sie pai."