Pasal 16

Siniotu Parisi pa sia sesau ve amamo Jesus nienari pi tandor pesiu pa (Nanapi Markus 11-13; e Lukas 12:54-56 par kota)

1 Avori siniotu Parisi pesia tutir Saduki pesia, sendama so Jesus, ave seto sesotour Sesau ve amamo nienari pi tandor pesi e vieruana toapa Jesus riama nanapi Sien Allah. 2 Apa Jesus klevo so sia e diojo, ('Ravinena e arepa sive sianggono mamo menggavore metojo nari uta pai diete.' 3 Mae kausapa vavoru wae arepa wa sive sianggono e uta pai kiobura, menggavore metojo: 'Nari uta pai diete amamo menggavore metojo: 'Nari uta pai kieriria. Apavo mesajo riruin rora wai e metopan ariri uta pai vieva pa. Mae pitandor veveruana sien Allah nie Kerajaan pai dieriasi to manau nesi ma, menganggauwasi".) 4 Kaiwasa rabua nine mia metatar e menganggauwarir mia veito kaririona vesiri. Mesau ve iveruana pi tandor. Sa iveruana pi tandor pesi so mia va. Mae pi tandor veve diadi to manau so nabi Yunus pai pa ma", Jesus kievo so sia toapa jana, manau pa suvie ria.

Siniotu Parisi pa sia tutir Saduki pa sia sene kavo aniau pasi, (Nanapi Markus 8.14-21 pai kota)
5 Jesus nie murit pa sia sembo a so rurupai rawesi wa, avori sesanemi pai so Separo senggor roti pa. 6 Janama Jesus kievo so sia e diojo, "Mesanemipai to vesie mo, aso siniotu Parisi e Saduki e, sene ragi pasi (Ragi pai ma ai rawi vinanari roti, ave amamo roti pa sisa pa".) 7 Murit pa setadiawa Jesus kievo tonine pa, senggavo vavera na sia e setojo, "Kievo towana pa ma, aso tanggor roti va pana'' 8 Jesus ruin senggavo tonine pa. Apa kievo so sia e diojo, "Aso vitopi menggavo usara varo roti pa? Aja mesanemitiar Ya mo varami? 9 Aja menduin varamie? Apavo mesanemipai tawana roti rim pasi, ipotatepuasi so kaiwasa siaran rima pa sia pa vae? E roti tamua menduira pasi bade toi? 10 Avori toane tutir roti rimemuandua pasi so kaiwasa siaran ata pa sia. Tamua menduira pai pa bade toi? 11 Aso vitopi mwnganggau ikavo pa pa. Toapa Ya ma ikavo so mia nanapi roti va. Ya ma ikavo so mia toapa mesanemipai to vesie, aso siniotu Parisi pa sia tutir Saduki pa sia, sene kavo aniau pasi. 12 Janama murit pa senduin toapa, Jesus kievo so sia ve sesanemipai to vesie aso ragi vinanari roti pai va, vape aso siniotu Parisi pa sia tutir Saduki pa sia, sene kavo aniau pasi.
Petrus ruara Jesus ve Allah Atu pa. (Nana Markus 8:27-30, e Lukas 9:18-21 pai kota)
13 Jesus ria so uta vena siwara Kota Kaisarea Pilipi pasi. Avori duta nie murit pa sia e diojo, "Avo kaiwasa nei diotojo: "Ya ma teini Yau? 14 Amana nie murit pa setojo; "Esia ma setojo Yohanes viono Kambu Sren pai ni Au. Esia kota setojo Elia ni Au. Esia ea ma setojo, Yeremia ni Au, pivai nabi pa sia esi ni Au". 15 Avori Jesus duta sia ea, "Mae maso matau mia mamo, metotojo teini Yau?" 16 Apa Petrus ruar so i e diojo, "Au ma Raja vekor Slamat pai ni Au, Allah Atu vetenam pai ni Au!" 17 Apa Jesus kievo so Petrus e diojo, "Simon, Yonai atu panau, vesie vesiri maso au; Aso siniotu pasi sitopan kavo nine so au va, vape i ma Yai venana rora wai 18 Apavo itopa so Petrus au, rovuki vepaya pai ni au. E nanapi rovuki visasiara nini vavo pai pino, ivaun ine gereja nei e diosa sasani nana pe. E sa esi dimburi va, voru pai kota sa piva. 19 Nari jono Sien Allah nie Dunia vavoru pai nie kunci pai maso au. E vitopi buavitawana nana dunia nei vavone pa, nari avitawana nana rorawa kota. Mae vitopi rueku nana dunia nei vavone pa, nari mareku nana rorawa kota". 20 Janama Jesus dierer so nie murit pa sia, ave amamo setopanusara so esi vesiei ea vape moja, toapa Jesus ma Raja Vekor Slamat paina. Jesus kievo nanapi kariria nari veter I pai tutir nie voru pai pa.
(Nana Markus 8:31-9:1; e Lukas 9.22-27 pai kota)
21 Nanapi raria jani, avori Jesus tiopa sivua so nie murit pa sia toapa, nari ria so Yerusalem e tiera kariria pa pau nana veve baba pa sia, e imam pa sia tutir veve baba na Torat pa sia. Nari semuni, vape nanapi raria veve toru pai mamo, siobatai riwanea. 22 Apa Petrus sierap irara Jesus tara dere pa e kievo panesi e diajo: "Sie pa nau, isau e Syen Allah tierir kavo nine vurusu Au. Ave amamo kavo nine tera Au vape moja!" 23 Amana Jesus mienawer vori kievo so Petrus e diojo: "Rua vurusu nine, Sietan, au ma buo suo tituwa Yau. Nomu sanepaya vediani ma sanepaya siniotu; ima sanepaya na Sien Allah va.'' 24 Avori Jesus kievo so nie murit pa sia e diojo; "Esi dio ria usara Ya mamo, tiawa irara matau nie soresisua pai e sieriowa nie aitabat pai e dinda usara Yau. 25 Aso teini siesera vei so tienam pa, (e kiembarai vie murit so Yau) amamo sa siemuai tenam (viaworoi) pai va. Vape teini viov nie tenam pai, (aso vie murit) so Ya pa, amamo nari siemuai tenam viaworoi pai. 26 Guna va vesiri so siniotu pesi nie dunia nei vetutira pa, vape siemuai tenam (viaworoi) pai va pa. Aso tenarm (viaworoi) pai ma, sa esi diono piesa e dimbe vori va? 27 Worabua va so Siniotu Atu ne Yau, tutir ine Malaikat pa sia, nari amandama tutuir Yai Nie Paya pai. Nanapi raria jani, nari Ivait siniotu pa siri-siri, ariri nie pi nienari pasi. 28 Itopa so mia, siniotu nine mia esia ma sa semboru varami, veitoro sesajo Siniotu Atu ne Yau, so Irama ariri Raja pa."