Pasal 9
Jesus diona e siniotu vereni kaber pai siejo riwa nea
1
Nanapi Jesus Nie rara pai pa, siejo samuai siniotu pesi, re pasi sikaber nana retena siniani diavini pa.
2
apa Jesus Nie murit pa sia setutani e setojo; 'Guru, avo toane vori siniotu nei siniani diavinie re ne sikaber pa? aso matauni nie tatar pasina te, aso siniani- tamani sumbe tatar pana e?"
3
amana Jesus ruar so sia e diojo; "Re wa sikaber pa aso matauni vie tatar pana va, pivai nie baba pa sumbe tatar pana va, vape ave amamo, siniotu pa sisajo Sien Allah nie paya venanaripi nana siniotu pai tarai raro pai pana.
4
aja sasaar rami mamo, tananari viamias Ja pai Nie nanaripi pasi. Aso diru wai riama mamo, sa esi nienaripi ea va.
5
aja Inana dunia nei rami mamo, sasaar dunia pai andi Jau".
6
Jesus kievo tonine to manau mana, kienisu so kakopa wa, avori riem kanisu wasi tutir kakopa wai, avori simar si na siniotu pai re pasi, avori kievo soi, e diojo;
7
"Rua ruois rurana remu pasi na karuraro Siloam. Siloam na tane kavo mamo; "Amias"
8
nie maneta vena siwari pasia, tutir siniotu vesajo riruin so miesoje dionusara pi pa, sia vura senggavore setojo; 'Jokama siniotu nini, andi miesoie dionusara pi pa mana?"
9
Esia senggavore setojo; "Maite andina", vape esia senggavore setojo; 'Piva, vape re pasi simasi tutiri. Amana siniotu pai matauni kievore diojo; "Maite, ja na."
10
Apa senggavo soi e setojo; 'avo toane vori diadi so suejo ne?"
11
Ruar so siae diojo; 'Siniotu vesanomi na Jesus pai, diona kakopa vemarandeni pa katu esa, avori simar re pasi e diemias yau e diojo; "Rua ruois rurana remu pasi nana karuraro Siloam".
12
Apa setutani e setojo; "Siniotu jani andi nia topina?" amana ruar so siae diojo: "Iruini va".
Siniotu Parisi pa sia sesasera ariri pota pai pienaam toapa
13
Raria jani ma raria Sabat pai na, avori Jesus riem kakopa pai tutir Nie kanisu pai pa,
14
ave amamo ditona e siniotu veremi kaber pai diadi so siejo pa. Apa siniotu erine veremi kaber pai, senggoria so siniotu Parisi pa sia.
15
Sia kota setutani so toane vori diadi so siejo pa, apa ruar so sia e diojo, 'pir kakopa vemarandeni pasi nana re nesi, avori irois ruranasi e diadi so isajo pa.
16
Siniotu Parisi pa esia senggavo e setojo; 'Siniotu venanari toapa nini ma riama nanapi Sien Allah va, aso riewain raria Sabat pai pana. Vape esia senggavore setojo; "Siniotu veve tatar pesi ma, sa nienari pitandor vetoapa ninesi va, apa setinggavo vavera na mataun sia.
17
Apa siniotu Parisi pa sia setutan siniotu pai riwanea e setojo; 'mae buone sanepaya toane, so siniotu viona e suejo pai?" Siniotu pai ruar so sia e diojo; "Nabi nina".
18
Vape veve baba nana Yehudi pa sia sesanemitiar siniotu nei so, re pa sikaber to manau vori siejo ea ne va, apa joma sesau nie baba pa sia,
19
e setuta e setojo; 'vata mo e mene atuma veve diadi tutir veremi kaber pai, andi nine ne? Toane vori diadi so siejo riwa nea ne?"
20
Tamani siniani sunduar e surojo; 'maite, ninima amune atuma pai na, e re pasi si kaber na vie diadi pa.
21
Vape nine ma toane vori diadi so siejo ne ma, ama tinduin va. E teini diona e diadi so siejo ne kota, ama tinduin va. Metutani vea, bieba to manau pavo, nari matauni ruara.
22
Tamani siniani sunggavo tojanapa ma, aso sumatai veve baba nana Yehudi pa sia, aso sesanemi siri to manau toapa teini ruar Jesus ve Raja vekor slamat paina, mamo sa sua na anio ari pai va.
23
apa joma tamani siniani surojo; "Bieba to manau, apavo metutan matauni vea".
24
Apavo sesau siniotu erine veremi kaber pai ea, e senggavo soi e setojo; "Suawora mo, toapa nari kuevo kavo vata, amanduin toapa siniotu jani ma siniotu veve tatar nina".
25
Amana siniotu pai ruar so siae diojo; "Vie tatar te piva te, iruin va, vape iruina pa siri to, papopa ma rene sikaber, nine ma isajo to vesie.''
26
Janama senggavo soi riwanea e setojo; 'apa dionau toane?' dionau toane vori suejo pa?"
27
Siniotu pai ruar so siae diojo; "Itopanusara so mia to manau, vape menggambarai metadiawa, avori meto metadiawa ea ve?" "aja sa meto menda usari kota pe?"
28
Apa senajani, avori senggavo e setojo; 'au rua usari pa, ama ma piva, ama ma amanda usara paini Musai.
29
Amanduin toapa Sien Allah kievo so Musai to manau, vape maso siniotu jani mamo, amanduin moja vieva na topina pa va.
30
Amana siniotu papone veremi kaber pai ruar so siae diojo; "Mandiu arora vesiri, aso metojo menduin mojara uta vieva na topina pa. vape dionae diadi isajo to vesie-ne.
31
Tanduin toapa Sien Allah sa diediawa siniotu veve tatar va vape diediawa siniotu vetatuan Sien Allah, e venanari ariri Nie sane vesie pai".
32
Nanapi dunia ne vieva retena pa veito nine, aja tatadiawa esi dionae siniotu veve diadi tutir veremi kaber pesi siejo e vesie ea pa va.
33
Masi siniotu jani riana Sien Allah va mamo, sa nienari piesa va,
34
Apa Parisi pa senduar soi e setojo; 'apavo? Au ma siniotu vionu tutir tatar ni au, nana retena vue diadi pa, avori buo bueniau ama e?' Apa' nanapi raria jani mo e, semu vediori e sa sua na anio ari pai va. Veremi kaber nanapi Wainunu pai.
35
Jesus diediawa setawa irara siniotu pai vurusu anio ari pai pa, apa siesera siniotu pai, avori siemuai pa kievo soi e diojo; "Apa janama sanetiar Siniatu Atu paie?"
36
Apa siniotu pai ruar soi e diojo; "Tei nina, Tuani?" katu tuopani so jau, ave amamo isanemitiarl-pe!"
37
Jesus ruar soi e diojo; "Suejori to manau, andi kievavo tutir au ne mana!"
38
Apa siniotu pai diojo; "Isanemitiar, Sie panau". Avori disan ae bu pasie, siom Jesus.
39
Janama Jesus kievo e diojo; "Irama so dunia nei, ave Ikutu ariri hukum vetindiya pai, ave siniotu veremi kaber pasi sisajo, e siniotu vesajo to vesie pasi, siremi pa sikaber.
40
Siniotu Parisi pa esia senana jana pavo, setadiawa Jesus kievo tojana pa, setutanie setojo; 'Kuevo vedia ma toapa ama kota amandemi nesi sikaber?"
41
Apa Jesus ruar so sia e diojo; "Masi mendemi pasi sikaber mamo, membaro tatar, vape aso menggavo e metojo; 'amasajo', amamo veruana toapa, membe tatar rami".