Pasal 10
Kavo sora tarawa nanapi domba pai tutir nie gembala pai
1
Itopa so mia ve vatamo, siniotu vesua na kandang domba pai e kiaituwa pagar pai e riana rature pai va, e sia tuwa na ria vevesiei, amamo siniotu jani ma viemanana pi e viawara pi nina.
2
Vape siniotu vesua nana rature pai ma, gembala so domba paina.
3
Siniotu vesajo vedior kandan pai nari sieva rature pai soi, e nie domba pasi sirausari, e siau siri-siri nanapa sano pa, e kiosi tara vorira wa.
4
Domba pasi sikor tara vorira wa to manau mamo, gembala pai ria na dopo wa, e domba pasi sirausari aso siediawa riruina raopui pai pana.
5
Sa sirausara siniotu vevesiei pesi va, e nari sivavu vurusu siniotu jani, aso siediawa riruina raopui pai va pana".
6
Jesus kievo kavo soratarawa jani, vape senduin ariri nie tarai pai va.
Jesus ma Gembala viate pai na
7
Apa Jesus kievo riwanea e diojo: "Itopa so mia ve vata mo, Rature so domba pai, andi Jau.
8
Vera papo ma na Ja pasia ma, viamanana pie viawara pi pa siana, vape domba pasi siediawa sene raopui pasi va.
9
Rature pai andi Jau. Teini sua nana Ja mamo, nari siemuai vesie, nari sua e suvie siemuai pisia.
10
Viemanana pai ma ria vei maso diemanana pa, ave dio mamu e kariria pa. Vape Ja ma Irama ve amamo siniotu pasi sisamuai tenam pai, tenam vetabui pai.
11
Gembala viate pai andi Jau. Gembala viate pai viovo nie tenam pai vori nie domba pasi.
12
Siniotu vesamuai vait vea e gembala nina va, e nie domba pasi kota va, siejo wona rei pai riama mamo, nari vievu vurusu domba pasi, amamo nari wona rei pai mutatirasi e simasasiepar.
13
Amamo nari siniotu vesamuai vait pai, nari vievurasi, aso ima nienaripi so vait pai vea. Sa vie paduri so domba pasi va.
14
Gembala viate pai andi Jau. Ariri Jai siejo riruin Ja pa, Ja kota Isajo riruin Jai pa,
15
toapana kota Isajo riruin Ine domba pasi kota, e Ine domba pa sisajo riruin Ja kota. E lvova ine tenam nei soasi.
16
Domba vevesiei pa esasija kota ma Inesi, vape sietor nana domba tau nini va. Sia kota ma Ikor sia, e sia kota nari setadiawa raopui ne. Sia vura nari sembe tau siri e e gembala siri.
17
Jai sanepai Jau aso Isiwa Ine tenam nei, ave amamo Isamuai soverai ea pa.
18
Sa esi kiori nanapi Ja va. Isiwi nanapi matau Ine majar. Ipaja so Isiwi pa, e Ipaja so Ikor verai pa, nini ma nanaripi Jai diona maso Ja nina.
19
Aso Jesus kievo tonine pa, Jehudi pasia sembaririwi na matau sia vavera.
20
Vepau pa senggavore setojo; "Pisararidioi sira savuil Vie pisavi! Meto metadiawi ve?"
21
Vape esia kota senggavore setojo; 'Siniotu pi sararidioi sira savua pai ma, sa kievo tonine va! Avo pi sararidioi pasi diadi so sionae siniotu veremi kaber pasi diadi so sisajore?"
Siniotu Yehudi pa sia, senggavo irar Jesus pa
22
Kaiwasa venana Yerusalem pa sia, setarari so sene Raria Baba veve resmikan anio Sie pai pa, nana raria jani ma imasi tutir die diru pai, apavo uta pasi siriewas
23
Apavo Jesus ria vavera na sorabi vesanomi na Serambi Salomo, nana Anio Sie pai raro pa.
24
Apa kaiwasa Yehudi pa sia, sendama senduir wawarira Jesus, avori senggavo soi e setojo: 'Tituwa ama e ama sanemi sasera ra so raria tonina ea. Ite Tuopa sasaar so ama ve vatamo: "Raja vekor Slamat pai andi Au mo e?"
25
Jesus ruar so siae diojo: "Itopa so mia to manau mana, vape mesanemitiar va pa. Pi Inanari pasi nanapi Jai sano pa, asi siveruana Ja pa.
26
Mesanemitiar va pana, aso miama viator mia ve Ine domba ni mia va pana.
27
Ine domba pasi ma, siediawa riruin raopui ne, Isajo riruinasi e sira usara Jau.
28
Jono tenam vatamo viaworoi pai, e sa sesamuai kariria pai va veito woroi. Sa esi diewara sia na varanesi va.
29
Jai viono sia maso Ja to manau pai, bieba rawai na teina vea. E sa esi diewara sia nanapi Jai vara pasi va.
30
Ja tutir Jai ma amumbe siri.
31
Apa Yehudi pasia senggor rovuki riwanea, ave setiso Jesus.
32
Vape Jesus kievo so siae diojo: "Mesajo Inanari nanaripi viate pa pau to manau, nana pi Jai diemias Ja soa pasi, nanapi nanaripi jasi vura mamo, tosi sivediajarae meto meso Ja pa?"
33
Yehudi pa sia senduar so-l e setojo: "Nomu nanaripi vesie jasi ma asi sivediajarae amato ama so Au na rovuki pa va, vape aso kuevo sisiajara Sien Allah pana. Au ma siniotu ni Au vea, avori buonau ve Sien Allah ea pa".
34
Avori Jesus ruar so siae diojo; "Jokama nanapi mene buku torat pai mamo, sembui toapa: "Sien Allah kievo e diojo: "Mia ma Sie ni mia".
35
Tanduin toapa pi vitosi sivui nanapi Surat Repo pai mamo, sa sinai va. Apavo Sien Allah diap ve; "Sie", maso kaiwasa vekorusara Nie kavo pa sia.
36
Avori aso vitopi metojo Isisiajara Sien Allah, aso Ikavore jojo: Ja ma Allah Atuni Ja pa? arorae Jai ni diri Jau, e diemias Ja so dunia nei.
37
Masi Inanari ariri nanaripi Jai diemias Ja soa nesi va, amamo mesanemitiar Ja vape moja.
38
Apavo menggambarai mesanemitiar Jau, vape aso Inanarisi pavo, mesanemitiar so pi vitosi Inanarisi pa. Toapa jana ve amamo, menduin toapa, Tawana Jai vie siri tutir Jau, e tawana Ive siri tutir Jai.
39
Apa setosasera ea, ave amamo setapur Jesus, vape tieisu vurusu sia.
40
Janama Jesus siovera ea so maria Yordan rawesi wa, uta papo pae Yohanes siov siniotu nanapa, e miesoi nana wana.
41
Apa kaiwasa pau sendama soi. Senggavo e setojo; Yohanes ma nienari pitandor pa esasi va, vape kavo kievora e vetera siniotu nini pasi, vurae sive vata.
42
Apa kaiwasa venana uta jasia, sepau sesanemitiar Jesus.