¹ . Manau nana jana pa, siri-siri vievu so nie anio pai. Mae Jesus ma ria so suovavo Saitun. ² Kausapa sapa pa ria so anio ari pai, apa kaiwasa pai siorum ma so-l. Jana ma Jesus miesoi avori dieniau sia. ³ Worabua va mana Guru agama Yehudi pa sia, tutir siniotu Parisi pa sia, senggor vavi venanari kavo e senda kora pesi, maso Jesus. Setonae vavi pai diosa na rabua wa, ⁴ Avori janama senggavo so Jesus e setojo: "Guru, vavi nei vera kori na nienari kavo tutir mua veririau pa, ⁵ Nanapi Musai nie hukum pai mamo, atoran pai toapa: Vavi vetoapa nine siama, veso siana rovuki to semboru. Apavo Guru, buone sanepaya pai toane? ⁶ Setutani tojana pa ma, ave sesasera ria so setapuri pa, e sengge sasara soi pa, vape Jesus tietuan vea, e vui na kakopa wa na varakia pasi. ⁷ Amana setuta nendiwana vea pa, Jesus piosasana ru pa e kievo so siae diojo; "Nanapi mia, teini viero tatar, amamo andi sio rovuki retena pai, maso vavi nei. ⁸ Manaupa Jesus tietuan riwanea, e vui riwanea nana kakopa wa. ⁹ Setadiawa Jesus kievo tojana pa, sesuvi kakisa vurusu uta pa, retena nanapi veve masa to manau pa sia. ¹⁰ Apavo Jesus miesari tutir vavi pai, e vavi pai andia nana uta diosa nana pa. Avori Jesus piosasana ru pai, e kievo so vavi pai e diojo; "avo asia topina? Esi vie hukum au vae?" ¹¹ Amana vavi pai ruar so Jesus e diojo; 'Sie panau, ka piva". Apa Jesus kievo so vavi pai e diojo; 'Vesie! Ja kota sa ive hukum au va. Apavo janama vuevu, e nuenari tatar ea vape moja".

¹² Jesus kievo riwanea so kaiwasa pai e diojo; "Sasaar so dunia nei pai, andi Jau. Siniotu verausara Ja pai ma, sa riana vekumuar pai va, vape siemuai sasaar vetenam pai. ¹³ Apa siniotu Parisi pa sia, senggavo so-l e setojo, 'ariri kuevo vedia mamo, buasana riwana mataun Au vea. Apavo nomu kavo vediasi ma sitindi va.'' ¹⁴ Amana Jesus ruar so siae diojo; "Jasana riwana matau Ja ne ma tindia; aso Iruina Ira na topina ma pa e nari ira so topina ea pa. Mia ma menduin mojara Ira na topina ma pa, e nari Ira so topina pa. ¹⁵ Mia ma menggutu kavo pesa mamo, menggutu ariri vava siniotu. Mae Ja ma Ikutu siniotu pesi nie kavo va. ¹⁶ Vape, masi Ikutu siniotu sine kavo, amano Ikutu to tindia, aso Imesari va, Jai viamias Ja pai, andia tutir Jau. ¹⁷ Nanapi Musai nie atoran pasi mamo, vevui toapa nine; "Kavo vekutu to tindia pai ma, nanapa siniotu pa sumbe muandu pino. ¹⁸ Siniotu viasana Ja pa sumbe muandu, andi Jau tutir Jai viamias Ja pai.'' ¹⁹ Apa setutanie setojo: "Apavo Tamamui ni topina?" amana Jesus ruar so siae diojo: "Sa mesajo riruin Ja tutir Jai va, aso mesajo riruin Ja mamo, nari mesajo riruin Jai kota". ²⁰ Pininesi vura ma Jesus kievorasi nanapi dieniau nana Anio Allah pai pa e diosa siwara aiku vetina pipi som pasi pa. Vape diadi so esi tiepuri pa va, aso aja nie raria paina varami pana.

Uta Ira soa wa, miama sa mendama soa va.

²¹ Jeus kievo so sia riwanea, e diojo: "Nari Ira, e nari mesasera Yau, vape nari memboru nana mene tatar vediasi. Uta Ira soa wa ma, sa mendama soa va. ²² Apa veve baba na Yehudi pa sia, senggavore setojo: 'Nari dio mun riwani, aso kievore diojo: "Uta Ira soa wa, miana sa mendama soa va". ²³ Avori Yesus kievo so sia e diojo: Mia ma mendama na dou ne, vape Ja ma Irama na vavo wa. Mia ma mendama na dunia, vape Ja ma Irama na dunia va ²⁴ Apa joma erine Itopa so mia toapa, nari memboru nana mene tatar pasi pa. E ariria, nari memboru nana mene tatar pasi, masi mesanemitiar va mamo, toapa: Ja ma andina, andi setap I ve: JA MA JA JA pa.'' ²⁵ Apa setutanie setojo: 'apavo teini Au mo?' apa Jesus ruar so sia e diojo; "Avo Ikavo riwanea tutir mia so vito ea. ²⁶ Kavo pa pau so mia, asi Jo ikavora si maso mia, ariri vetindia pai, vape viamias Ja pai, ma vesanemitiar-I, apavo pi vitopi Jediawa nana-l pa asi Itopanasi maso dunia nei pa. ²⁷ Apavo senganggau kavo kievora wasi, so Tama pai pa. ²⁸ Apa joma Jesus kievo so sia e diojo; "Nari meposasana Siniotu Atu pai Jau to manau pino, janama menduina toapa, Andi Jau, e nari menduin toaра, Inanari piesa nana matau Ja va, vape Itopa pi vitoni Jai dieniawi maso Ja pa!" ²⁹ E viamias Ja pai, andia tutir Jau. I ma sa tierir Jau e Imesari va, aso Inanari pi vio sane vesieni tawana so I pana". ³⁰ Jesus tiopa pi jasi vura to manau pa, kaiwasa pau sesanemitiari-l.

Sien Allah vetindia pai dionae metaisu vurusua.

³¹ Avori Jesus kievo so kaiwasa Yehudi vesanemitiari to manau pa sia, e diojo; "Metenam ariri Ine aniau pasi mamo, vata mo e miama Ine murit ni mia. ³² amamo nari menduin Sien Allah vetindia pai, e amamo nari metaisu vurusua. ³³ Amana setojo; 'ama ma Abrahami tapu ni ama. Aja amambe womi so esi varami, aso vitopi kuevore buojo: "Nari metaisu vurusua pa?" ³⁴ Apa Jesus kievo so sia e diojo; "Ine kavo ne ma vevata, toapa, siniotu venanari tatar pai, ima womi so tatar paina. ³⁵ E, veve womi pesi ma sa siemuai uta atapua pesa na anio raro pa va. Vape Atuma pai ma siemuai uta atapua na anio raro pa to woroi-woroi. ³⁶ Apavo, Atuma pai dionae metaisu mamo, metaisu vevata mo. ³⁷ Maite, Iruin toapa mia ma Abrahami tapu ni mia pa, vape meto memun Jau, aso menggambarai menggorusara Ine aniau pasi pa. ³⁸ Pi vitopi Isajora nana Jai pa, a Itopana pa. Mae mia menanari ariri pi vitosi Tamamui dieniawasi maso mia pa. ³⁹ Amana senggavo e setojo; "Amatamami pai andi Abrahami. Apa Jesus kievore diojo: "Abrahami atuni mia vevatamo, amamo nari menanari ariri Abrahami pi nienari pa si. ⁴⁰ Itopa ariri vetindia Jediawa nanapi Sien Allah pai maso mia, vape meto memun Jau. Abrahami ma nienari toapa jana va. ⁴¹ Menanari ariri pi vitosi metamami pa sia senanari si pa", amana senduar so I, e setojo; "Ama ma atuma sararidioi ni ama va, amatamami pai ma siri to, andi Sien Allah matauni. ⁴² Apa Jesus kievo so sia e diojo; "Metamami pai ni Sien Allah reto nari mesanemipai Yau, aso Irama nanapi Sien Allah, Irama nana matau Ine sane vesie va, vape andi Diernias Jau". ⁴³ Aso vitopi menganggau kavo Ikavora pasi pa? aso menggambarai metadiawa Ine aniau pasi pana. ⁴⁴ Metamami paini bilis pai, e menggorusara Tamamui nie sane vesie pai. Nanapi retena mo pa, bilis pai ma mun siniotu. Ima nievori vetindia pai va, aso vetindija pai nianai va. Dio diawia mamo, ima tindija, aso nie vava pai tioa pana. Ima viawia pai na, e awia pai umaja pai na". ⁴⁵ Vape Ja ma Itopa vetindia pai, e apa joma mesanemitiar Ja va pa. ⁴⁶ Nanapi mia pa teini nari tiopa veruana Ive tatar pa? Masi Ikavo na vetindia pai, aso vitopi mesanemitiar Ja va pa? ⁴⁷ Siniotu vevava nanapi Sien Allah pai ma, diediawa Sien Allah nie kavo pasi. Vape mia ma membava nana Sien Allah va, apa joma menggambarai metadiawa pa. Jesus tutir Abrahami. ⁴⁸ Siniotu Yehudi pa sia, senduar so Jesus e setojo; Jokama amanggavo ne ve vata pe. Toapa Au ma siniotu Samaria veve pisavi ni Au. ⁴⁹ Jesus ruar so sia e diojo; Ja ma Ive pisavi va. Ja ma Itatuan Jai, vape menggavo sisiajara Jai. ⁵⁰ Ja ma Isasera sanandika so mataun Ja va. Siniotu pa siri andi diona sanandika pai so Jau, e andi kutu ariri hukum vetindia pai. ⁵¹ Vata mo e Itopa, teini kiorusara Ine kavo pasi mamo, sa vioru va, veito woroi woroi. ⁵² avori siniotu Yehudi pa sia senggavo so Jesus e setojo Janama amanduin Au vevata mo, e vue pisavi. Abrahami vioru to manau, toa pana kota nabi pasia vura. Vape kuevo e buojo, siniotu vekorusara ine kavo pa siama, sa semboru va, veito woroi-woroi. ⁵³ Abrahami vioru to manau, e nabi pa sia kota semboru to manau, mae Au ma teini Au, avori buotojo Au ma bueba rawai amatamami pa Abrahami pa. ⁵⁴ Jesus ruar so siae diojo; "Masi jo isasera sano so matau jau, amamo wasa nini ma imbe umaja va. Vetatuan Ja pai andi Jai, metopa ma metojo, mene Sien Allah pai, arora e menduini va. Vape Ja ma iruini. ⁵⁵ Masi Ikavo e jojo; "Ja ma irui va, amamo Ja ma siniotu viawia ni Jau, ariri mia. Iruini e Ikorusara Nie kavo pasi. ⁵⁶ Metamami Abrahami sane pa vesie vesiri, toapa nari siejo Ine raria pai. Siejori to manau e sane pa vesie vesiri.'' ⁵⁷ Apa Yehudi pa sia senggavo so Jesus e setojo: "Nomu umur pai aja taun siniotu muandu e sura varami, apa suejo Abrahami to manaue". ⁵⁸ Amana Jesus ruar so siae diojo; Itopa so mia ve vata mo, aja Abrahami vie diadi varami e Ja ma, Ja ja to manau". ⁵⁹ Apa Jehudi pa sia senggor rovukie, ave setisoi, vape Jesus dieniwari e vievu vurusu Anio Allah pai.