Pasal 20
Papi vevereri pai
1
Nana raria ari pai sapa pa, aja kumuar rami pa, amamo Maria Magdalena ria ea so papi pai pa, siejo mana rovuki visioria pai tiekias vurusu kamberei papi pai sore pa.
2
Apa diepai e siesera Simon Petrus tutir murit Jesus sanepaya pai, e tiopa so sandue diojo; senggor Sie pai vurusu papi pai e iruin mojara senggori sepiri na pa.
3
Apa Petrus tutir murit esi pai, sunda so papi pai.
4
Apa surapai, vape murit esi pai, andi mieraru nanapi Petrus e andi piepo aso papi pai.
5
Apa tira apui so papi pai, amana siejo vei sis vitavani pasi sivata na wana pa, vape su apui va.
6
Simon Petrus ma ria vepuiya, vape sua nana kamberei papi pai. Siejo sis vitavana pasi sivata na jana.
7
Vape sis vekasie na Jesus ru pai ma viata siwari va, mae senggaparie viatae vekasau.
8
Avori janama murit vepapo so papi pai, diosua kota, siejo pa janama sanetiar.
9
Veitoro raria jani, aja senduin ariri, kavo vevui na surat repo pai varami, toapa; 'nari siobatai na voru pai pa.
Jesus vieruani so Maria Magdalena pa
10
Manau pa janama, Jesus Nie verausari pa sia sembavu.
11
Maria Magdalena diosa nana papi pai rature sore pai e siai, apavo siai e disio rao pa apui so papi pai.
12
Apa siejo malaikat pa sumbe muandu, susasun sandu nana sasu vemamara. Sumasoi nana Jesus nie tarai vevoru pai reu viata nana pa, esi pai niana rawa vetara ru pa, e esi pai niana rawa vetara ae pasi.
13
Malaekat pa surutae surojo; "Vavi, suai so vito?" amana Maria diojo, ine Sie pai senggori! E iruin moja sepiri na topina pa.
14
Kievo to jana tomanaue, siejo tara karu pa mana siejo Jesus andia diosa na jana. Vape ruin so Jesus andina pa va.
15
Apa Jesus dutani e diojo; "Vavi suai so vito? Vavi suesera teina?" Maria miemo ma diojo vene romi pa esi nina, apa kievo soi e diojo: "Aisiniai, au kuori vurusu nine, amamo tuopa ariri uta topi kuoria viata nana pa, ave amamo ira ikori pe.
16
Amana Jesus kievo soi e diojo; "Maria!" apa Maria mienawer so Jesus, avori kievo nana kavo Ibrani e diojo: "Rabuni!" amamo; "Guru", amana Jesus kievo soi e diojo:
17
"Rut Ya vape moja! aso aja isajai so Jai varami pana, vape rua so Ine maneta pa sia, e tuopa so sia toapa; "Nine ma Isajai so Jai e mene Jai nina, Ine Allah pai e mene Allah paina".
18
Apa janama Maria ria e tiopa so Jesus Nie murit pa sia toapa; "Siejo Sie pai to manau e Sien tiopa pininesi vura soi to manau".
Jesus vieruani so nie murit pa sia pa.
19
Nana raria ari jani kota, e diru to manau, avori Jesus Nie murit pa senduir nana anio pesi, e rature pasi sisioria, aso sematai veve baba na Yehudi pa sia pana. Worabua vamana Jesus riama diosa na sene kasau rabua pa, e kievo e diojo; "Vesie pai e, Vemanasi pai, riama so mia vura".
20
Kiev toapa jana to manau pa, dioisara varava pasi tutir kasire pai. Sesajo Sie pai pa, sesanemi pasi siete vesiri.
21
Avori Jesus kievo so sia riwanea e diojo; "Vesie pai e vemanasi pai riama so mia vura!"
22
Ariri Jai diemias Ja pa, toapana kota Jemias mia, avori siovuana sore wojou pai so sia e dinggavora e diojo; "Menggor Sien Allah Nie Wainunu nei.
23
Masi membe ampon esi nie tatar pasi mamo, Sien Allah kota vie ampon i. Mae membe ampon esi va, nana nie tatar pasi mamo, Sien Allah kota sa Vie ampon va.
Jesus tutir Tomas
24
Tomas Sesauve si kembar pai, Jesus Nie murit suraemuandua pa sia esi nina, ruir tutir esi pa sia va, nana Jesus riama so sia pa.
25
Apa murit esi pa sia setopa so Tomas, e setojo, ama sajo Sie pai to manau! Amana Tomas ruar so siae diojo: Aja isajo paku reu venana vara pasi varamie, ipir varakia nesi nana kapor paku reu pasi e, aja ipir vara nesi nana kapor reu venana kasire pai varami mamo, kasa isanemitiar va!"
26
Ari siri kiara, avori Jesus Nie murit pa sia, senduir nana uta jana ea, e Tomas andija kota. Rature pasi vura sive kunci, vape Jesus ria diosa na sene kasau rabua pa, avori kievo so siae diojo; "Vesie pai e vemanasi pai riama so mia!"
27
Avori Jesus kievo so Tomas e diojo; "Suejo vara nesi, e pir varakia pasi nana nine. E suorana varamu pa ma pir na kasire ne, e sanetiar kawawaru vape moja, vape ineri sanetiar-mo!"
28
Apa Tomas kievo so Jesus e diojo; "Ine Sie panau e Ine Allah panau!"
29
Apa Jesus kievo so Tomas e diojo; "Aso suejo Jau to manau pa sanetiar pa. Vape vesie maso siniotu vesajo Ja vae vesanemitiar pai!"
Buku nini nie ria pai
30
Pitandor pa esasia sipau, Jesus vieruanasi maso nie murit pa sia, vape sivui nana buku nini va.
31
Vape ninesi vura sivui, ave amamo mesanemitiar toapa Jesus ma Raja viono Slamat, Allah atu paina, e aso mesanemitiar I pa, mesamuai tenam pai pa.