Jesus vieruani so nie murit rime muandua pa siapa

¹ Manau na jana pa, Jesus vieruani riwanea nana ruru Tiberias, maso Nie murit pa sia, nie topanusara pai toapa nine. ² Raria pesi pa Simon Petrus, Tomas sesau ve avi kadidui pai, e Nataniel nanapi aniose Kana na uta Galilea, e Sebedeus atu pa sia, e murit vevesiei verausara Jesus pa esandu, setutir sia. ³ Avori Simon Petrus kievo so siae diojo; 'jo ira isasera dia, apa senggavo soi e setojo, amanda usara au. Apa senda sesa na wa pai. Vape diru woroi pai ma setimu piesi va. ⁴ Veitoro wor pai dio sia, apavo Jesus diosa na sasi dere pa, vape senduin so Jesus nina pa va. ⁵ Apavo Jesus kievo so siae diojo; "Atumai, avo ka mesamuai dia pesie?" amana senduar e setojo; "Ka pivai!" ⁶ Apa Jesus kievo so siae diojo; "Tojana mamo, mengge diara pai nana wa pai rawa vata pa, amamo nari mesamuai dia". Jana ma setetap diara pai, vape sesarap bariwi va, aso dia pai piau veja. ⁷ Apa murit Jesus sanepaya pai kievo so Petrus e diojo; "Sie paina!" apa Petrus diediawa toapa, Sie paina pa, siesuni aso kiekavir pana avori kiopae dias arei. ⁸ Janama murit esi pa sia sembo na wa pai arei e sepapara diara vionu tutir dia pai. Sembe kasau rei pa mova, nari meter utin siri vea. ⁹ Sembiar nana wa pai pa, sesajo adia vian to veve kaesa pesi na wana, tutir dia pesi niana tutir roti pesi. ¹⁰ Apa Jesus kievo so siae diojo; "Ite menggor dia katu erine metapur pa esasi ma, ¹¹ Apa Simon Petrus sia so wa pai, avori sierap diara pai arei so reiwa. Apa diara pai dionu so dia baba vei vea e sipau pa utin sirie siniotu muandu e sura e toru. E sipau tojana vape diara pai mietotap va. ¹² Janama Jesus kievo so siae diojo; "Mendama metapi!" vape Nie murit pa sia esi mias e duta va, toapa; 'Avo teini Au?' aso senduin toapa Sie pai na! ¹³ Avori janama Jesus ria dieriasi sia, e kior roti pai e dioni so sia. Nienari toa kota tutir dia pai. ¹⁴ Ninema Jesus vieruana ve torua pana, maso nie murit pa sia nanapi siobatai nana voru pai pa.

¹⁵ Janama setapi to manau pa, Jesus kievo so Petrusi e diojo; "Simon, Jonai atu pa nau, avoka sanepai Jau rawai nanapi ara ne sia sesanemipai Ya pae?" Apa Petrusi ruar so Jesus e diojo; "Sie panau, ima vata, Sie ruin isanemi pai Aupa. Avori Jesus kievo soi e diojo; "Buevut Ine domba nesi". ¹⁶ Jesus duta riwanea ve muandua pa, e diojo; "Simon, Jonai atu panau, avoka sanepa Jaue?" apa Petrusi ruar soi e diojo; "Sie panau, ima vata, Sien Au ma ruina isanemi pai Au pa! apa Jesus kievo soi e diojo; "Buevut Ine domba nesi! ¹⁷ Jesus dutani ea ve torua pa, e diojo; "Simon Jonai atu panau, avoka sanepal Jauwe? Apa Petrus sanepa kariria, aso Jesus dutani ve toru mo pana. Apa Petrus ruar riwanea e diojo: "Sien, Au ma ruin pi vura, Sien ruin isanemipai Au pa!" Janama Jesus kievo soi e diojo; "Buevut Ine domba nesi!" ¹⁸ "Itopa so au vevatamo, rabua aja vuevoru pa, matau kuesie riwana nomu kavavirai pai, e rua so topina vea ariri nomu sane vesie. Vape nari rabua vue masa to manau mamo, nari buora varamu pasi, e siniotu vevesiei sia senggasie nomu kavavirai pai e, senggor au so uta topi kuembarai rua soa pa". ¹⁹ Jesus kievo tonine pama, tiopa veruana Petrus nari vioru e vie pisom sanandika, so Sien Allah pa. Manau na jana pa, Jesus kievo so Petrus e diojo; "Rua usara Jau!"

Murit Jesus sanepaya pai

²⁰ Apavo Petrus mienawer tara karupa, amana siejo murit Jesus sanepaya pai, andi miesoi siwar Jesus nana setapi pa e andi dutae diojo; "Sien, teini nari viov Sien Au pa?" ²¹ Petrus siejori pa duta Jesus e diojo: "Sie panau, toane tutir siniotu nini?" ²² Amana Jesus ruar soi e diojo: "Masi Imajar mamo, tienam veito Ira ea ma, nine ma nomu urusan nina va, vape au ma, rua usar Jau!" ²³ Apa kavone ve topanusara nanapi Jesus Nie murit pa sia, toapa murit nini ma sa vioruva. Arorae Jesus ma kievo toa va, toapa murit nini ma sa vioru va pa, mae kievo e diojo; "Masi Imajar toa mamo, tienam veito Ira ea ma, nine ma nomu urusan nina va". ²⁴ Yohanes andi diono kesaksian nanapi kavo ninesi, andi vuisi kota. E, tanduin toapa pi vitosi tiopanasi pa mamo, ima sive vata. Kavo vemanau pa. ²⁵ Jesus pi nienari pasi asia sipau rami. Masi sivui atitieri vura mamo, isanemi pai toapa, nana dunia nei vetutira, sa miesi va, so vepir buku nari vevui nesi pa.