¹ Jesus vie nadi tojana to manau pa, ria tutir Nie murit pa sia avaru so maria Kidron rawesi pa. Senda maso romi vemasasoi e vekor tavai nana pesi, apavo Jesus tutir Nie murit pa sia, sesua e senana uta jana. ² Yudas vevovo Jesus nei ma, ruin uta jana, aso Jesus tutir Nie murit pa sia, senduir ora nana uta jana pana. ³ Apa Yudas kior tentara Romawi pa esia, e tutir siniotu vemasole vesajora anio Sie pai, imam Baba pa sia tutir Parisi pa sia setamias sia, apa Yudas kior siae senda so uta jana. Senggor pi mamunae padamara e obor. ⁴ Jesus ma ruina pi nari veve diadi soi nesi vura to manau, apavo ria deriasi sia vori dutan sia e diojo; "Teini mesaserai pa?" ⁵ Amana senduar soi e setojo; "amasasera Jesus siniotu Nazaret pai, apa Jesus ruar so siae diojo; "Ja nine mana!" Yudas vevovo Jesus pai andia diosa na jana tutir sia. ⁶ Jesus kievo so siae diojo; "Ja nine mana", apa sia vura sesisui sia e setawa avav so kakopa wa. ⁷ Avori Jesus dutan sia riwanea e diojo; "Teini mesaserai pa?" apa senduar soie setojo; "ama sasera Jesus siniotu Nazaret pai". ⁸ Apa Jesus kievo so siae diojo: "Itopa to manaue jojo Ja nine mana!" E, Ja mesasera Ja pa mamo, metituwa nine sia e sembavu. ⁹ Kievo toapa jana pama, masi tutir kavo Jesus kievora papo to manau pa, toapa; "Jai nanapi siniotu buono maso Ja ne sia, sa esi niai va'. ¹⁰ Simon Petrus ni kior sumbe nina, apa piatini e dipera Imam Baba pai nie womi pai, apa taradiau rawa vata pai teitu vesiri, womi pai sano pa; Malkus, ¹¹ apa Jesus kievo so Petrus e diojo; "Suosuruva riwana nomu sumbe pai nanapi nie sor pai. Apavo au ma muemo ma buojo, sa junu na gelas vetin marior Jai diono maso Ja nei vae?"

¹² Avori Tentara Roma pa sia tutir sene Komandan pai, tutir Yehudi pa sene siniotu viarama pa sia, setapur Jesus e setaviti na wangga. ¹³ Retena pa senggoriso Hanas, Kayapas nioni mua paina. Mae Kayapas ma vie Imam Baba na taun jani. ¹⁴ E, andi diono kavo sanepaya to manau so Yehudi pa sene veve Baba pa siapa, toapa; vesie pa siniotu pa siri vioru so kalwasa nei vura pa.

Petrus pioras Jesus pa.

¹⁵ Simon Petrus tutir murit pa sia esi, sunda usara Jesus, murit esi paima, imam baba pai siejo riruini, apavo sua tutir Jesus apui so Imam Baba pai nie anio pai repo vorira pa. ¹⁶ Mae Petrus ma dienota na rature sore vorira wa. Janama murit esi vevesiei pai suvi ari so vorira wae, kievo tutir vavi viarama nana rature sore pai, avori kior Petrus apui so rarowa. ¹⁷ Vavi viarama na rature sore pai, kievo so Petrus e dicjo; 'ai, jokama au ma siniotu vera usara siniotu wanipa esi ni au mana?" amana Petrus dioja; "Piva", ¹⁸ Nana diru jani ma uta pai riewas, apavo vavi viararna pa sia, senduri adia pai e senggaruri na jana. Apavo Petrus ria so wana e diosae kieruri tutir sia

Imam Baba pai dutan Jesus pa

¹⁹ Imam Baba pai dutan Jesus, so nie vera usari pa sia, e nana nie aniau pai. ²⁰ Jesus ruar so Imam Baba pai e diojo; 'Ikavo tawana to masivu maso kaiwasa vura. Jeniau tawana nana Anio Ari pasi, e nana Sien Allah nie anio pai, uta kaiwasa Yehudi pa sia, sesoruir sia nana pasi. Aja Itopa piesa aniwara va. ²¹ avori aso vitopi tuani buta Ja pa? Butana pa sia, viadiawa Ine kavo aniau pa sia. Ima senduin vitopi Ikavora pa". ²² Jesus kievo toapa jana pa, pegawai viosa na jasia esi, biasari e dinggavora e diojo, vue barani vesiri pa kuevo tojana maso Imam baba pai pa! ²³ Apa Jesus kievo sol e diojo: "Masi Itopa piesa e vesasara, amamo tuopa veruana vesasara pa, mae Ikavora pa tindija mano, aso vitopi buasar Ja pa?" ²⁴ Vipuia pa Hanas diemiase senggor Jesus tutir wai wangga vinggasiesi pasi aso Kayafas, Imam baba pai.

Petrus pioras Jesus riwanea

²⁵ Simon Petrus andia diosae kieruri adia kota na jana, apa esia senggavo soi e setojo; 'Jokama au kota, ruausara siniotu wani mana? amana Petrus piorase diojo; 'Pival' ²⁶ Imam baba pai nie womi pesi, siniotu Petrus piera tuwa vene taradiau pai, nie neta pa esinina, kievo e diojo; joka isajo au nana romi vemasasoie vekor tavai nana pai, tutir I-mana?" ²⁷ Amana Petrus pioras riwanea e diojo; 'Pival' e diam jani kotae kokori pa sisau.

Senggor Jesus ra so Pilatus pa

²⁸ Sapa mo pa, senggor Jesus nana Kayapas nie anio pai ra, so Gubemur pai nie istana pai. Yehudi pa matau sia ma sa sesua na istana pai va, ave amamo seter rariai vape moja, ariri atoran agama Yehudi pai pana, aso seto setan pisia Paska pai pana. ²⁹ Apa joma Pilatus suvi ari so siae duta sia e diojo; avo membe karak siniotu nei so vito? ³⁰ Apa senduare setojo; masi viero sasara mamo, sa amanggori maso aisinia Gubernur pa au va. ³¹ Apa Pilatus kievo so siae diojo; menggori e membe urusi ariri matau mene atoran agama pasi, amana kaiwasa Yehudi pa sia setojo; ama ma sa amambe hukum siniotu e voru va. ³² Nine ma ave toa pana, ave masi tutir Jesus nie kavo pa, aso nari Nie voru pai vieva pa. ³³ Pilatus sua riwanea so nie istana pai e siau Jesus, avori dutani e diojo, Yehudi pa sene Raja pai, andi Aue? ³⁴ Apa Jesus ruar soi e diojo, apavo kavo butana vedia ma ra nanapi mataun au te, siniotu vevesiei ní tiopanusara Jau so au e? ³⁵ Pilatus ruar so Jesus e diojo, avo Ja Yehudi ni jauwe? Vevova Au so ja pasia, mataun nomu kaiwasa pai e imam veve ru pa sia, apa vitoni nuenari pa? ³⁶ Apa jesus kievore diojo; "Ine kerajaan pai ma riama na dunia nei va. Masi Ine kerajaan pai riama na dunia nei, amamo nari Ine kaiwasa pai, mun vedior Jau, ave amamo sesiwa Ja so veve baba na Yehudi pa sia vape moja. Vape aso Ine kerajaan pai ma riama nana dunia ne va pana!" ³⁷ Apa Pilatus kievore diojo, tojana pavo Raja ni Aue? Jesus ruar soi e diojo; "Ariri kuevo pa, toapa Raja ni Jau". Apa joma Ive diadi e Ira mesu so dunia nei pa, tutir ria nina, ave amamo vetopa veruana vetindiya pai. E siniotu venanapi vetindiya pai ma diediawa Jau." ³⁸ Apa Pilatus dutani e diojo, vetindiya pai ma vito nina?Janama Pilatus suvi riwanea nanapi nie istana paie kievo so kaiwasa Yehudi pa siae diojo, isamuai vesasara pesa nana-l va.

Jesus tiera hukuman voru pai pa

³⁹ Vape ariri mene buai pai mamo, nana Raria Baba Paskah pasi mamo, isuvir siniotu vesamuai hukume venana bui pesi, apavo mesnemi vesie isuvir Raja Yehudi nei maso miae? ⁴⁰ Amana senduare setisodiaya e setojo; 'Piva, I-ma moja, vape Barabas'.