¹ Jesus kievo tojana so sia to manau pa, siasana re pasi tara rora wa e kievo e diojo; "Jai, janama raria pai miesi to manau. Buonave Atumui Jau, Isamuai som sanandika pai, ave amamo Atumui Ja kota Isom sanandik Jai Au kota pe, ² Ariri buono paya maso Jau, so pi saserai vetenam pasi pa. Toapana kota nari jono tenam viaworoi pai maso kaiwasa buono maso Ja to manau pasia. ³ Nine ma tenan viaworoi pai na, toapa ave senduin Au ve Allah vetindia paini Au, e ave senduin Jesus Kristus buemiasa pai, andi Jau. ⁴ Isom sanandik Au nana dunia nei to manau nanapi Ira nomu nanaripi buon maso Jau e Inanari pai, ⁵ Apavo Jai, buona ve Ivediajara som sanandika pai maso Au, nana som sanandika Isamuai nanapi Jai nomu aropo pai, nanapi dunia nei aja vieva varami pa. ⁶ Itopa veruana sanomu pa so kaiwasa vura, kaiwasaa buono maso Jau, nana dunia nei pa sia, e senggorusara nomu kavo pai to manau. ⁷ Nine ma senduin toapa, pi buona maso Ja pasi vura ma sivava nana pa Au. ⁸ Aso nomu kavo tuopana maso Ja pasi vura ma, Itopanasi so sia to manau, e sembe tirimasi to manau. Senduin ve vatamo, toapa Irama nanapi Au, e sesanemitiar toapa, nomu amias pai andi Jau. ⁹ nadi so sia. Maso dunia nei pa ma, piva. Ive nadi, vape maso siniotu buona so Ja to manau pasia. Aso sia ma nomu pa sia na. ¹⁰ E pi Ine pasi vura ma, pi nomu sina, e pi nomu pasi ma pi ine sina, e isamuai som sanandika pai nanapi sia. ¹¹ E sa Inana dunia nei ea va, vape siama asiaja senana dunia nei rami, e Irama so Au, Jai veve Sren panau, buo nanari sia nanapi sanomu pa, sanomu buona maso Ja to manau pai, ave amamo sembe siri ariri tata, ¹² Aja Ina tutir sia rami pa ma, Jo nanari sia nanapi sanomu pa, sanomu buono maso Ja to manau pai, Jono nanari sia to manau, e sia esi niai va. Mae ara vekutu to manau so vesamuai kariria pai Yudas Iskariot ave amamo masi tutira vevui nana Surat Repo pai pa. ¹³ Vape janama Irama so Au, e Itopa ariri pininesi vura nana aja Inana dunia nei ramine, ave amamo Ine sane vesie pai vieruana to marui mo nanapi sia. ¹⁴ Jono nomu kavo pai so sia to manau, e dunia nei miedidi sia, aso sia ma sembava nana dunia nei va pana. ¹⁵ Isau ve amamo kuor sia vurusu dunia nei va, vape ave amamo vue war vedior sia vurusu kariria pai. ¹⁶ Siama sembava na dunia nei va, ariri Ja kota Ivava na dunia nei va pa. ¹⁷ Vue Sren sia nanapi vetindija pai; nomu kavo pai ma vetindija paina. ¹⁸ Ariri buemias Ja mesu so dunia nei to manau pa, toapana kota Jemias sia mesu so dunia nei to manau. ¹⁹ E Ive Sren Ine tarai nei maso sia, ave amamo sia kota sembe sren nana vetindija pai. ²⁰ E Ive nadi maso sia mesari vea va, vape aso sene kavo aniau pasie, kaiwasa vesanemitiar Ja pa sia kota. ²¹ Ave amamo sia vura sembe siri, ariri Jai Au nuanapi Jau e, Inanapi Jai Au pa, ave sia kota senanapi tata, ave dunia nei sanetiar, toapa Au buemias Jau. ²² E joma som sanandika buono so Ja pai, Joni so sia, ave amamo sembe siri, ariri tata kota tambe siri pa. ²³ I-nanapi sia, e Nuanapi Jau, ave sembe siri ve vata mo, ave dunia nei ruina toapa; Au buemias Jau, e sanepai sia ariri sanepai Ja pa. ²⁴ Jal, Isanemi vesie, uta topi Inana pa mamo asiaja kota senana jana tutir Jau, asia buon sia so Ja to manau pa, ave amamo sesajo Ine marawas pai, buono maso Ja to manau pai, aso sanepai Jau nana aja dunia nei nienari varami pa. ²⁵ Jai vene sanepaya vetindija panau, vata dunia nei kiembarai ruin Au, vape Ja ma Iruin Au, mae nine siama senduin toapa Au buemias Jau, ²⁶ E Itopa sanomu pa so sia to manau, e nari Itopanusari ave amamo, sanepaya buono maso Ja pai, kierakuai nanapi sesanemi raro pasi e Ive siri tutir sia.