Pasal 16
1
Pininesi vura Itopanasi maso mia, ave amamo mesisui mia vurusu mene sanetiar pai vape moja.
2
Nari sesuvir mia nanapi Anio Ari pasi. E nari raria pesi mamo siniotu vemun mia pasia, semamo ma setojo senanari vesie maso Sien Allah.
3
Senanari toapa jana maso mia pa ma, aso aja senduin Jai tutir Ja varami pana.
4
Vape nine ma Itopa nasi maso mia, ave nari pi ninesi sive diadi pa, menduin to manau toapa asi Itopanasi maso mia to manau pa.
Sien Nie Wainunu pai nienari pipa
5
Kavo nine ma Itopa maso mia na retena pa va, aso Jaja Ina tutir mia pana.
6
Vape nine ma nari Ira so viamias Ja pai, e sa mia esi duta Ira soa pa va, Nine ma nari mesanemi pa sikariria, aso Itopa kavo ne so mia pana.
7
Vape Itopa veruana maso mia, toapa; "Vesie maso mia pa Ira pino, aso Ira va mamo, veve tolon pai sa riama so mia va.
8
Riama mamo, nari tiopa veruana so dunia nei, nanapi tatar pai nie tarai pai, e nana vetindiya pai, e nanapi Sien Allah vie hukum pa.
9
Nari tiopa veruana toapa, vesanemitiara Ja va mamo, ima veve tatar.
10
Toapa Ja ma Itindija, aso Ja ma Ira so Jai e mia ma sa mesajo Jau ea va.
11
E Sien Allah dio vie hukum pana, aso veve ru so dunia nei siemuai hukum to manau.
12
Pi pa pau rami, asi Jo Itopanasi maso mia pa, vape nine ma memarui so mesamuaisi pa varami.
13
Vape Wainunu pai riama mamo, andi nari vieruana Sien Allah nanapi vetindija pai, e miama diedidin mia, ave menduin ariri vetindija pai. Sa kievo nanapi matauni Nie sane paya va, vape tiopana pi vitosi diediawasi to manau pa, e nari tiopanusara pi nari veve diadi nana raria dopui, maso mia.
14
Andi nari kievo sasana Jau, aso vitoni tiopani maso mia pa, vie tirimasi na Jau.
15
Pi venana Jai pasi vura ma Inesi, apa joma Ikavo e Jojo, vitoni Wainunu pai tiopani maso mia pa mamo, ima vie tirimasi nanapi Jau.''
Susa pai pieponi sane vesie pai
16
"Worabua va so mesajo Jau ea va pa, e sa worabua va so mesajo Jau ea pa".
17
Apa Jesus Nie murit pa esia, setuta vavera sia e setojo, apavo nie sanepaya wai toane, avori kievo so tata e diojo, worabua va so sa mesajo Jau ea va pa, e sa worabua va so mesajo Jau ea pa, avori toane tutir kavo diojo; Ira so Jai pa?
18
Avori setuta ea so kavo diojo; "worabua va". Tanduin mojara kievo wa ma nana vito jo.''
19
Jesus ruin seto setutani pa, apa kievo e diojo; "Erine Ikavo e jojo, worabua va so, sa mesajo Jau ea va pa, e worabua va so mesajo Jau ea pa. Nine a menggavo vavera nana mia soa pae?"
20
Itopa so mia, nari mesale metamuaus, vape dunia nei nari sane vesasie. Nari membe susa, vape mene susa pasi nari siriwae sive diadi sane vesasie ea.
21
Masi vavimbiavi pesi dio diavi, amamo vie susa, aso raria pai dieriasi so diemuaus pa pana. Vape ineri diavi atuma pai to manau, vavi pai piero nie amuaus pai, aso sane pa vesie so atuma pesi vie diadi mesu so dunia nei pa.
22
Apavo toa pana kota maso mia, ninema membe susa, vape nari Irama so mia riwa nea, amamo nari mesanemi vesasie e sa esi kior sane vesasie jani vurusu mia va.
23
Nana raria jani, amamo sa metuta nanusara piesa nanapi Jau ea va. Itopa so mia, mesau so Jai, nana pi vito vea, mesau nana sanone mamo, nari Jai diono maso mia.
24
Veito nine, aja mesau piesa nana sanone varami. Mesau, amamo nari mesamuai, ave amamo mene sane vesie pai miesi mo pe".
Jesus vie untun dunia nei to manau.
25
"Pininesi vura Itopanasi maso mia nana kavo sora-tarawa, vape raria pesi mamo, Ikavo nana kavo sora-tarawa ea va, vape Ikavo to masivu maso mia nanapi Jai pa
26
Nana raria jani mamo, nari mesau so Jai nanapi sanone. Menduin toapa, sa Isau nana Jai so mia va,
27
aso Jai matauni sanepai mia pana. Sanepai mia so, mesanemipai Jau e, mesanemitiar toapa Irama nanapi Sien Allah pana.
28
Maite, Ja ma ivava nanapi Jai, e Irama so dunia nei to manau, vape nine ma Ivavu dunia nei, ave Isovera ea so Jai."
29
Apa Nie murit pa sia senggavo soi e setojo: "Janama Sie panau, kuevo to masivu, e kuevo nana kavo sora-tarawa ea va,
30
e amanduin toapa Sie panau ruin pi vura. Janama sa esi duta nanusara piesa nanapi Sie panau va, aso ama sanemitiar toapa Sien ruama nanapi Sien Allah.
31
Apa Jesus kievo so sia e diojo, ''Apavo jana ma mesanemitiar?
32
Mesanemi paya! Nari raria pai riama, vape riama to manau, e nari memasasiepar, nari membavu so siri-siri nie anio pai e membavuru Jau e Imesari. Vape sa Imesari ea va, aso Jai andia tutir Jau.
33
Pininesi Itopanasi maso mia, ave amamo mesamuai vesie pai, aso membe siri tutir Ja pa, na dunia nei ma nari metamuaus