Pasal 15

Jesus ma anggur ravo vata mo pai na

1 Jesus kievo rivanea e diojo; "Anggur ravo vata mo pai andi Jau, e Jai ma vene romi pai na". 2 Arawa venana Jau e veve buo va pasi, sitaratuwa, e arawa veve buo pai ma, rau pasi sisopa e sierara ave amamo viebuo to rawai ea. 3 Mia ma membaro rariai to manau, aso pi aniau Jono so mia pasi. 4 Membe siri tutir Jau, to karakuai e Ja kota nari Ivesiri tutir mia. Arawa pai matauni ma sa vie buo va. Aso kierakuai na ravo pai va pana, apavo mia kota, membe siri tutir Ja mamo, nari mesuvir buo. 5 Anggur ravo pai andi Jau, e mia ma arawa pa miana. Siniotu veve siri tutir Jau to karakuai e Ja tutiri mamo, nari vie buo to pau; aso Ja va mamo, sa metitono piesa va. 6 Siniotu veve siri tutir Jau to karakuai va pai, nari kiea ariri arawa pai, e miasa. Arawa vetoapa jasi ma nari sisoruira e sike susa adia pat, avori sikair. 7 Membe siri tutir Jau, e Ine kavo aniau pasi sivata nana mesanemi raro pasi mamo, mesau so Jai na pi vitopi meto mesauwa pa; mene sau pa nari mesamuai. 8 Membe buo to pau mamo Jai siemuai sanandika pai, e toapa jana mamo, vata moe miama vera usara Ja pa miana. 9 Ariri Jai sanepai Ja pa, toapana kota Isanemipai mia, apavo metenam ariri siniotu Isanemi paya. 10 Masi menda ariri Ine prenta pasi mamo, miaja menggarakuai usara Ine sanepaya pai, ariri Ja kota Ikarakuai usara Jai nie sanepaya pai, aso Ira ariri nie prenta pasi pana. 11 Pininesi vura Itopanasi maso mia, ave amamo Ine sane vesasie pai niana mesanemi raro pasi, e mene sane vesie pai miesi mo pana. 12 Ine prenta pai nine; "Mesanemipai mia vavera, ariri Isanemipai mia pa. 13 Siniotu vesanemipai nie maneta pa sia to rawai pai, ima siniotu vevovo vene tenam so nie maneta pa sia pai na. 14 Miama Ine maneta pa miana, masi menanari ariri pi vitoni Ive prentai maso mia pa mamo, 15 Mia ma sa Isau mia ve womi va, aso womi pai ma sa ruin pi vitoni nie tuan pai nienari pa va. Apavo mia ma Isau mia ve maneta, aso pi Jediawa nana Jai pasi, Itopanasi vura maso mia to manau pa. 16 Mia metiri Ja va, Ja Jiri mia, e Jemias mia e menda, ave membe buo to pau, buo nari vesamuai kariria va, amamo nari Jai diono pi vitopi mesauwa nanapi sanone pa. 17 Ine prenta so mia pai nine; "Mesanemipai mia vavera!"

Dunia nei miedidi Jesus tutir nie murit pa sia
18 Masi duna nei miedidi mia mamo, mesanemipaya toapa dunia nei miedidi papo. Masi dunia nei nie mia, amamo nari dunia nei Ja 19 Sanepai mia ariri pi nie. Vape Jiri mia to manau vurusu dunia nei, apavo mia ma dunia nei nie mia va, apajoma dunia nei miedidi mia pa. 20 Mesanemipai tawana pi vitosi Itopanasi so mia to manau pa, womi pai sa bieba rawai nie tuan pai va. Masi seto amuna tutir Jau, amamo nari seto amuna tutir mia kota. Masi senggorusara Ine pi aniau pasi mamo, nari senggorusara mene pi aniau pasi kota. 21 Nari setono vava ninesi kota maso mia, aso miama mendausara Ja pana. Aso sia ma senduin mojara viamias Ja pai pana. 22 Masi aja Irama va reto, e Itopa pi aniau ninesi vura so sia va reto, amamo ima sembaro tatar. Vape nine ma sembaro ria to manau, so sene tatar pasi. 23 Siniotu vemadidi Ja pai ma, miedidi Jai. 24 Masi aja Inanari pi siniotu vevesiei sipaya so sinanari va pesasi reto, amamo ima sembaro tatar. Vape nine ma sesajo pi Inanari pasi vura to manau, vape semadidi Jau tutir Jai. 25 Vape ima toa pana, ave imasi tutir kavo vevui nana sene Buku Hukum pai, riotu toapa; "Semadidi Jau nana kavo veve umaja pesa va". 26 Nari Jemias vetutir mia pai ma, riama nanapi Jai. I-ma Wainunu nari vetopa ariri vetindiya pai nanapi Sien Allah pa riama mamo, nari vie saksi so Jau. 27 E mia kota membe saksi so Jau, aso miama metutir Jau nanapi retena pa pana.''