¹ Nana raria Pantekosta pai pa, siniotu vesanemitiar pasia senduir sia nana uta pesa. ² Worabua va mana piesi riotu e kuya anri diobara, viar nana rora wa mesu so anio senduir sia nana pai. ³ Apa sesajo piesi vieva ariri adia veveviare siser naria sendumi pasi. ⁴ Apa Wainunu Sren pai siasal nana sia vura, e senggavo nana kavo saserai vevesiei, Senggavo ariri pi vitosi Wainunu Sren pai tiopana maso siae senggavo na pa. ⁵ Nana raria yani, kaiwasa Jehudi pasia nanapi uta vura, senduir nana Jerusalem. Slama kaiwasa vekorusara Sien Allah pasiana. ⁶ Setadiawa pi verotu pai pa, kaiwasa pa sepau vesiri, sesorum. Apa setandor vesiri so setadiawa Rasul pasia senggavo nana kalwasa vesorum pasia, sene kavo pasi pa. ⁷ Setandor to setanuare setoyo; "Siniotu vekavo nine sia vura ma, siniotu Galilea siana mana? ⁸ Aso vitopi tatadiawa senggavo nanapi tane kavo nesi pa? ⁹ Kavo Partia, Media, Elam, nana Mesopatamia, Judea tutir Kapadokia, nanapi Pontus tutir Asia, ¹⁰ nanapi Pirgin tutir Pampilia, nanapi Masir tutir uta esi pasi nana Libia vederiasi Kirene; vera nana Roma pa tata esia. ¹¹ Siniotu Jehudie, tutir siniotu vevesiei vesua nana agama Jehudie; esia kota senda nana Kreta tutir Arab. Tata vura tatadiawa senggavo nanapi tane kavo pasi, e senggavo nanapi piviotandori Sien Allah nienari pasi.'' ¹² Setandor to setanuare setuta vavera siae setoyo; "Avo tonine mamo toane? ¹³ Amana esia kota senggavo sisiayara siae setoyo, "Owa, sua pa simun sia pana",

¹⁴ Janama Petrusi siobataie diosa, tutir Rasul suraesiri esi pasia, avori kievo so kaiwasa pai. Kievo to babae dioyo; "Maneta pa mia, kalwasa Jehudie, tutir kaiwasa venana Jerusalem pa mia vura I Metadiawa to vesie mo, aso yo itopanariri kavo ne maso mia. ¹⁵ Siniotu ne sia ma sua si simun sia ariri menggavo vedia va; aso erine vori Jam rimeat sapa ne, ¹⁶ Vape Sien Allah tiopana kavo ne to manau, nanapi nie Nabi pai Yoel, toapa; ¹⁷ Sien Allah dioyo; "Nana raria dopui mamo nari isovuvu ine Wainunu Sren pal maso kaiwasa vura. Mene atuma mua pasia tutir atuma vavi pasia, e setopanusara pi itopana so sia pasi maso mia. Mene atuma vavoru pasia, nari sesayo pi iveruana so sia pasi. E mene baba pasia, nari setanamiya nana anamiya iveruana so sia pasi ¹⁸ Maso ine amias pasia kota, mua to vavi, nari isovuvu ine Walnunu Sren pai nana raria yasi. ¹⁹ Nari jona pi viotandori pesasi, nana vavo rorawa, e pi vindawaina mo pesasi nana dou kakopa ne, e veria pai tutir adia pal, e wojou vemas pai tutir adia wojou pai. ²⁰ Wor pai nari kumuar, e sembai pai vie sianggono ariri veria, nana Sien nie raria pai riama varami pa. Raria baba viomataiti pai. ²¹ Nana raria yani, teini dienanar Sie pai sano pa mamo, nari siemual vesie pa.''' ²² Ine maneta kaiwasa Israel pa mia | Metadiawa kavo ikavora ne; Jesus siniotu Nazaret pai, Sien Allah diono nanaripi maso I, aso mia, I ma vieruana vesiri nanapi pi viotandori tutir paya Sien Allah nienari maso mia, nanapi Jesus pasi. Vurae mataun menduinasi to manau. ²³ Sien Allah kutu nanapi matauni Nie sanepaya pai, ave siwa Jesus maso mia. E raria siwi maso mia pai, memuni nanapi ria: mesiwi ea maso siniotu vetatar pasiae sepa-l, nana aitavat pai. ²⁴ Vape, Sien Allah dionae tienam riwanea, e siobatai vurusu vevoru pasia. Voru pai tioni, vape Sien Allah tieriri vurusua, aso voru pai sa piaya so rutawani pa va. ²⁵ Dauti kievo kavo soratarawa pesie tera Jesus, e dioyo; 'Iruin Sie pai andia tutir Yau; e dieriasi Yau, ave amamo plesa onae imanawar vape moja. ²⁶ Apajoma sanerarone vesasiene, sorene suvira som sanandika e ine tarai nei dienota, tutir vesie vea, nana papi pai raro pa. ²⁷ Aso sa vuevur ine wainunu nei e, viata nana vevoru pasia sene uta pa va. Sa vuevur nomu siniatu veve Sren paie, piere to niai va. ²⁸ Buoisara ria vera so tenam vatamo pai so Yau to manau. Ine sane vesie pai riewai, aso Auya tutir ya pa.' ²⁹ Ine maneta pa mia, mesanemi vesie mamo, ite itopa ariri katu nanapi Dauti tatapumi pai. Vioru to manaue pir na papi pai to manau kota; e nie papi pai andine nia tutir tata to rabua nine. ³⁰ Sien Allah dierer so Dauti to manau, tutir sawora, toapa nari Sien Allah rusasana Dauti nie usapui paie vie Raja. Aso Dauti ruin arer ninie, ikota ma nabi nina pavo, ruin pi vitopi nari Sien Allah nienari pa. ³¹ Apajoma Dauti ruinae dierer papo toapa, Raja vekor slamat Sien Allah dierera pai, nari tienam riwanea nanapi voru pai. Dauti kievore dioyo, 'Sa viatae woroi nana vevoru pasia sene uta pa va, nie tarai pai ma piere va'. ³² Jesus nini, Sien Allah dionae, tienam riwanea nana voru pai pa. Matau ama kota amasajo subata to manau. ³³ Sien Allah rusasanie miesoi nana masasoi vetarial, e diono paya so I, e disamuai Wainunu Sren Tamani dierera pai. E nana raria nini metadiawae mesajora nei, Wainunu yani andi dioni maso ama ne. ³⁴ Dauti matauni ma sa sia so rorawa va, vape Dauti kievoe dioyo; Sien kievo so ine Sie pale dioyo: muesoi nana rawa vata ne, ³⁵ veitoro yonae siniotu viomamu tutir au ne sia setatuan so aul' ³⁶ Apajoma kaiwasa Israel pal vura ave ruin ariri mo, toapa Jesus mepa nana aitabat pai, Jesus yani nina, andi Sien Allah dionae vie Sie, e dimbe Raja vekor vesie pal.'' ³⁷ Kaiwasa pai diediawa Petrusi kievo tonine pa, sesanemi pa sikariria veito. Apa setutan Petrusi, tutir Rasul esi pasiae setoyo; "Toyana pavo nari vitoni amananari ?" ³⁸ Amana Petrusi kievo so siae dioyo; "Memanau mene tatar pasie, mesovera mia so Sien Allah, e mesoiv Kambu Sren pai nana Jesus Kristus sano pa, ave amamo mesamual ampon so mene tatar pasi pe. Amamo nari mesamuai Wainunu Sren pai, ³⁹ Aso Sien Allah nie arer nini ma viata nana mia, tutir mene usapui vepui pasia, tutir kaiwasa venana uta viaroi pasia, kalwasa Sien Allah tane Sie pai siau e verama soi pasia vura." ⁴⁰ Apavo Petrusi tiopanariri so sia toapa yana. E dinggavavo nana kavo pa esasi kota, ave amamo setarira sia vurusu kaiwasa vekariria nari Sien Allah vie hukuma pasia. ⁴¹ Apavo sepau vesiri sesanemitiar, aso Petrusi nie kavo kievora pasi. Apa setisoiv Kambu Sren pai. Nana raria yani pa, kaiwasa vesanemitiar pasia sepau pa sembe siaran toru. ⁴² Senda ariri Rasul pa sene kavo aniau pasi to karakuai vesiri, e senduir sia orae sembe siri, setapi vurae sembe nadi vura. ⁴³ Rasul pasia senanari pitandor pa pau vesiri, apavo kaiwasa vura senggavousarae sematai. ⁴⁴ Apavo siniotu vesanemitiar pasia, seduir siae sembe siri e pi vitopi sesamuai pa, seneu vura ⁴⁵ Sene piesae sembova mamo, sembov pipi pasi ariri sia vura, ariri siri-siri pi siemuai varami pasi. ⁴⁶ Raria vura ma senduir sia nana anio Allah pai; setapi vura tutir sane vesasiene, e tutir buai, nanapi sene anio pasi, e setisanandika Sien Allah tawana, apavo kaiwasa vura sesanemi vesien sia, ⁴⁷ Raria vura, Sien dionae siniotu vesanemitiar pa sepau, sesuae senggota sia.