¹ Ket binendisionan ti Dios ni Noe ken dagiti putotna. Kinunana kadakuada, "Kayatko nga aganakkayo iti adu nga agnaedto iti entero a lubong. ² Agbutengto kadakayo dagiti amin a dadakkel nga ayup iti rabaw ti daga, amin a billit, amin a parsua nga aggargaraw iti rabaw ti daga, ken amin a lames. Paiturayak ida kadakayo. ³ Iti kallabes, pinalubosankayo a mangan kadagiti mula kas pannakataraonyo, ngem ita ket mabalinen a kanenyo ti amin nga agbibiag ken aggargaraw. ⁴ Ngem masapul a saankayo a mangan iti karne nga adda pay laeng darana, gapu ta ti biag ket adda iti dara daytoy. ⁵ Ket siasinoman a mangpapatay iti maysa a tao -ayup man wenno tao ti mangaramid iti daytoy, masapul met a mapapatay. Nasken nga agsagaba dagiti mammapatay gapu iti panangpapatayda ken agbayadda babaen iti bukodda a biag. Uray no ti nangpatay iti tao ket maysa nga ayup, nasken met a mapapatay dayta nga ayup gapu ta nakapatay iti tao. ⁶ Ta inaramidko dagiti tattao a kaaspingko. Isu a no adda mangpatay iti padana a tao, masapul met a patayen isuna ti sabali a tao. Siasinoman a mangpatay iti sabali ket rumbeng met a matay isuna. ⁷ No maipanggep kadakayo, kayatko nga aganakkayo iti adu, tapno isuda ken dagiti kaputotanda ket agnaed iti entero a daga.” ⁸ Kinuna pay ti Dios kenni Noe ken kadagiti putotna a lallaki, ⁹ "Dumngegkayo a naimbag. Makitulagak ita kadakayo, ken kadagiti kaputotanyonto, ¹⁰ ken kadagiti amin a parsua a kaduayo, dagiti agbibiag -pakairamanan dagiti billit, dagiti naamo nga ay-ayup, ken dagiti naatap nga ay-ayup - tunggal ayup iti rabaw ti daga a kaduayo a rimmuar iti daong. ¹¹ Kastoy ti katulagan nga ikarik kadakayo: Saankonto a pulos a dadaelen manen babaen iti layus dagiti amin nga agbibiag a parsua wenno dagiti amin nga adda iti daga." ¹² Ket kinuna pay ti Dios kenkuana, "Daytoy ti pagilasinan a mangpatalged a tungpalek ti tulagko kadakayo ken iti amin nga agbibiag a parsua, katulagan nga agtalinaed iti agnanayon. ¹³ Addanto dagiti tiempo a mangikabilak iti bullalayaw iti tangatang. Daytoyto ti pagilasinan iti tulagko kadakayo ken kadagiti amin nga adda iti rabaw ti daga. ¹⁴ No kasta a pagtinnagek ti tudo manipud kadagiti ulep, ken adda bullalayaw nga agparang iti tangatang, ¹⁵ ipalagipto daytoy kaniak ti maipapan iti pannakitulagko kadakayo ken kadagiti amin nga agbibiag a parsua, ti karik nga awanto pulos ti layus a mangdadael kadagiti amin nga agbibiag a parsua. ¹⁶ Tunggal adda bullalayaw iti tangatang, makitak daytoy ket malagipkonto ti pannakitulagko kadakayo ken iti tunggal parsua nga adda iti rabaw ti daga, kari a tungpalek iti agnanayon." ¹⁷ Ket kinuna ti Dios kenni Noe, "Ti bullalayaw ti agbalinto a pagilasinan iti pannakitulagko kadakayo ken kadagiti amin nga agbibiag iti daga." ¹⁸ Dagiti annak ni Noe a rimmuar manipud iti daong ket da Sem, Ham, ken Jafet. Saan a nagbayag, naaddaan ni Ham iti putot, ket isu ni Canaan. ¹⁹ Amin a tattao ditoy daga ket nagtaud kadagitoy a tallo a putot ni Noe. ²⁰ Inrugi ni Noe ti nagtalon. Nagmula isuna iti ubas. ²¹ Kalpasan a nagbunga dagiti ubas, nangaramid isuna iti arak manipud kadagitoy. Maysa nga aldaw, idi adu unay ti nainumna nga arak, nabartek isuna, ket nagidda isuna a lamo-lamo iti toldana. ²² Nakita ni Ham, nga ama ni Canaan, a nakaidda a lamo-lamo ni tatangna iti uneg ti tolda. Isu a rimmuar isuna ket imbagana kadagiti dua nga inauna a kakabsatna ti nakitana. ²³ Nangala ngarud ni Sem ken ni Jafet iti dakkel a lupot ket binaklayda, sada simrek a patallikod iti tolda. Inyabbongda ti lupot iti lamo-lamo a bagi ni tatangda. Saanda a tinalyaw ni tatangda isu a saanda a nakita daytoy a lamo-lamo. ²⁴ Idi nagriing ni Noe ken nausawanen, natakuatanna no kasano kadakes ti kababalin nga impakita ni Ham nga inaudi nga anakna iti inaramidna kenni tatangna. ²⁵ Kinunana, "Ilunlunodko ti putot ni Ham, ni Canaan ken dagiti kaputotannanto. Agbalindanto a kasla tagabu kadagiti ulitegda. ²⁶ Idaydayawko ni Yahweh a daydayawen ni Sem. Agbalin koma nga adipen dagiti kaputotan ni Sem dagiti kaputotan ni Canaan. ²⁷ Ngem palawaen pay koma ti Dios ti masakupan ni Jafet. Ipalubosna koma nga agnaed a sitatalna dagiti kaputotan ni Jafet kadagiti kaputotan ni Sem. Agbalin koma a tagabuda dagiti kaputotan ni Canaan.” ²⁸ Nagbiag pay ni Noe iti 350 a tawen kalpasan ti layus. ²⁹ Natay isuna idi agtawen iti 950.