¹ Ngem saan a nalipatan ti Dios ni Noe, wenno dagiti amin a naatap nga ayup, ken amin a kita dagiti naamo nga ayup a kaduana iti uneg ti daong. Isu a maysa nga aldaw, pinagpul-oy ti Dios ti angin iti daga, ket nangrugin a bimmassit ti danum. ² Pinasardeng ti Dios ti panagpuswak ti danum manipud iti uneg ti daga, ken inserrana ti ruangan ti layus manipud iti tangatang isu a simmardeng ti tudo. ³ In-inot nga immababaw ti danum iti rabaw ti daga. Iti maika-150 nga aldaw manipud iti panagrugi ti layus, bimmasiten ti danum. ⁴ Iti maika-17 nga aldaw iti maikapito a bulan, simmadsad ti daong iti maysa kadagiti bantay iti rehion ti Ararat. ⁵ Nagtultuloy a bimmassit ti danum inggana nga iti umuna nga aldaw, iti maika-sangapulo a bulan iti dayta a tawen ket makitan dagiti tuktok dagiti dadduma a bantay. ⁶ Kalpasan iti 40 nga aldaw, linukatan ni Noe ti tawa nga inaramidna iti sikigan iti daong, ket nangpatayab iti uwak. ⁷ Nagsubli-subli ti uwak manipud iti daong inggana a namagaan ti rabaw ti daga. ⁸ Kalpasanna, nangpatayab ni Noe iti kalapati tapno maammoanna no imbaasen ti danum iti rabaw ti daga. ⁹ Ngem awan ti nasarakan ti kalapati a pagdissoanna, isu a nagsubli daytoy kenni Noe iti daong, gapu ta adda pay laeng danum iti rabaw ti daga. Inyunnat ngarud ni Noe ti imana ket inyunegna ti kalapati iti daong. ¹⁰ Naguray ni Noe iti pito pay nga aldaw. Ket pinatayabna manen ti kalapati iti ruar ti daong. ¹¹ Iti daytoy a tiempo, nagsubli ti kalapati iti karabianna ket makapasiddaaw ta adda sinippitna a bulong ti kayo nga olibo. Ket ammon ni Noe nga imbaasen ti danum iti rabaw ti daga. ¹² Naguray manen ni Noe iti pito pay nga aldaw. Kalpasanna, pinatayabna manen ti kalapati, ngem iti daytoy a tiempo saanen daytoy a nagsubli kenkuana. ¹³ Agtawen idin ni Noe iti 601. Iti umuna nga aldaw ti umuna a bulan iti dayta a tawen, imbaasen a naan-anay ti danum iti rabaw ti daga. Inikkat ni Noe ti kalub iti rabaw ti daong ket nasdaaw isuna a makakita nga agmagmagan ti daga. ¹⁴ Iti maika-27 nga aldaw iti sumaruno a bulan, naan-anayen a namagaan ti daga. ¹⁵ Ket kinuna ti Dios kenni Noe, ¹⁶ "Panawanyo ti daong, itugotmo ti asawam, dagiti putotmo a lallaki, ken dagiti assawada. ¹⁷ Iruarmo dagiti amin a billit, dagiti naamo nga ayup, ken amin a kita ti parsua nga aggargaraw iti rabaw ti daga tapno agwarasda iti entero a daga ket umado iti kasta unay ti bilangda." ¹⁸ Pinanawan ngarud ni Noe ti daong a kaduana ti asawana, dagiti putotna, ken dagiti assawada. ¹⁹ Amin a parsua, karaman dagiti amin nga aggargaraw iti rabaw ti daga, amin a billit, ken tunggal ayup nga aggargaraw iti daga ket pinanawanda ti daong. Nagkukuyogda a rimuar iti daong segun iti bukodda a kita. ²⁰ Kalpasanna, nangaramid ni Noe iti altar para kenni Yahweh. Nangala ni Noe kadagiti ayup ken billit a mabalin a maidaton ket pinatayna dagitoy. Kalpasanna, pinuoranna amin dagitoy iti rabaw ti altar. ²¹ Idi naangot ni Yahweh ti makaay-ayo nga ayamuom, naay-ayo isuna iti daton. Ket kinunana iti bagina, "Saankonton a pulos a dadaelen manen amin nga adda iti rabaw ti daga gapu kadagiti dakes a banbanag nga ar-aramiden dagiti tattao. Uray pay dakes amin ti adda kadagiti kapanunotan dagiti tattao manipud kinaubingda, saankonto a dadaelen manen dagiti amin a sibibiag, kas iti inaramidko ita. ²² Bayat nga adda ti daga, agtultuloyto ti panawen ti panagmula iti bukel ken panawen iti panagapit, ti nalammiis a tiempo ken napudot a tiempo, ti tiempo ti pudot ken tiempo ti lammiis, ti aldaw ken rabii."