¹ Ket kinuna ni Yahweh kenni Noe, "Nakitak a kadagiti amin a tattao nga agbibiag ita, sika laeng ti kanayon nga agtigtignay a sililinteg. Isu a kayatko a sumrekka ken ti pamiliam iti uneg ti daong. ² Mangitugotka iti sagpipito a paris iti tunggal kita ti ayup nga imbagak nga awatek a kas daton. Mangitugotka iti sagpipito a lalaki ken babai. Mangitugotka met iti saggaysa a lalaki ken babai manipud iti tunggal kita ti ayup nga imbagak a saanko nga awaten a kas daton. ³ Mangitugotka met iti sagpipito a paris iti tunggal kita ti billit tapno mataginayon dagitoy iti entero a daga. ⁴ Aramidem daytoy ta kalpasan iti pito nga aldaw manipud ita, pagtuduek iti rabaw ti daga. Agtultuloy nga agtudo iti uppat a pulo nga aldaw ken rabii. Iti kastoy a wagas, dadaelek ti amin nga inaramidko nga adda iti rabaw ti daga." ⁵ Inaramid ngarud ni Noe amin dagiti imbaga ni Yahweh nga aramidenna. ⁶ Innem a gasut ti tawen ni Noe idi immay ti layus iti rabaw ti daga. ⁷ Sakbay a nangrugi ti tudo, simrek iti daong ni Noe ken ti asawana ken dagiti putotna ken dagiti assawa dagiti putotna tapno maispalda manipud iti layus. ⁸ - Dagiti ay-ayup nga imbaga ti Dios nga awatenna kas daton ken dagiti saanna nga awaten kas daton, ken dagiti paris ti billit ken dagiti amin a kita ti agparis a parsua nga aggargaraw iti rabaw ti daga, ⁹ ket immay kenni Noe, lallaki ken babbai nga ay-ayup, ket simrek dagitoy iti uneg ti daong, kas iti imbilin ti Dios kenni Noe nga aramidenda. ¹⁰ Kalpasan iti pito nga aldaw, nangrugin a nagtudo ket linipus ti layus ti entero a daga. ¹¹ Idi nagtawen ni Noe iti innem a gasut, iti maika-17 nga aldaw iti maikadua a bulan, amin a danum nga adda iti uneg ti daga ket nagpusuak ken nangrugi met a nagtudo iti nakapigpigsa a kasla adda bimtak a naurnong a danum iti tangatang. ¹² Nagtultuloy a nagtudtudo iti uppat a pulo nga aldaw ken rabii. ¹³ Iti aldaw a nangrugi nga agtudo, simrek ni Noe iti uneg ti daong a kaduana ti asawana, ken dagiti tallo a putotna, a ni Sem, ni Ham, ken ni Japet, ken dagiti assawada. ¹⁴ Isuda ken sumagmamano nga ayup iti tunggal kita dagiti naatap nga ayup, ken tunggal kita ti naamo nga ayup, ken tunggal kita ti parsua nga aggargaraw iti rabaw ti daga, ken tunggal kita ti tumatayab, ken tunggal parsua nga addaan kadagiti payyak, simrekda amin iti daong. ¹⁵ Napan kenni Noe dagiti amin nga agparis a parsua nga addaan anges ket simrekda iti daong. ¹⁶ Adda lallaki ken babbai iti tunggal parsua a napan kenni Noe, kas iti imbaga ti Dios nga aramidenda. Idi addada aminen iti uneg ti daong, inrekep ni Yahweh ti ruangan. ¹⁷ Nagtultuloy nga immay ti danum iti las-ud iti uppat a pulo nga aldaw ket dimmakkel ti layus ket timpaw ti daong manipud iti daga. ¹⁸ Nagtultuloy a ngimmato ti napegges a danum iti rabaw ti daga inggana a timpaw ti daong iti danum. ¹⁹ Nagtultuloy a ngimmato ti napegges a danum iti entero a daga inggana a nalipus ti amin a banbantay ken amin a banag iti sirok ti langit. ²⁰ Uray pay dagiti kangangatoan a bantay ket nalipus iti nangatngato pay ngem innem a metro ti danum. ²¹ Kas nagbanaganna, natay ti tunggal sibibiag a parsua iti rabaw ti daga. Karaman dagiti billit, dagiti naamo nga ayup, dagiti naatap nga ayup, ken amin dagiti dadduma a parsua nga aggargaraw iti rabaw ti daga, kasta met dagiti amin a tattao. ²² Natay amin nga addaan anges a parsua iti daga. ²³ Iti daytoy a wagas, napukaw dagiti amin nga agbibiag iti rabaw ti daga--dagiti tattao, dagiti dadakkel nga ayup, dagiti agkarkarayam a parsua, ken dagiti billit. Dagiti laeng nabati a sibibiag ket ni Noe ken dagiti kaduana nga adda iti uneg ti daong. ²⁴ Nagtalinaed ti layus iti rabaw ti daga iti 150 nga aldaw.