¹ Dagitoy dagiti putot ni Noe; ni Ham, ni Sem ken ni Jafet. Naaddaanda kadagiti annak kalpasan iti layus. ² Dagiti lallaki a putot ni Jafet ket da Gomer, Magog, Madai, Javan, Tubal, Mesec, ken Tiras. ³ Dagiti lallaki a putot ni Gomer ket ni Askenaz, Rifat, ken ni Togarma. ⁴ Dagiti lallaki a putot ni Javan ket da Elisa, Tarsis, Kitim, ken Dodanim. ⁵ Dagiti putot ken pamiliada a nagtaud kenni Javan ket nagnaed kadagiti isla ken kadagiti daga nga asideg iti baybay. Dagiti kaputotanda ket nagbalin a bunggoy dagiti tattao, tunggal maysa ket addaan iti bukodna a pagsasao, puli, ken saksakupen. ⁶ Dagiti lallaki a putot ni Ham ket da Cus, Egipto, Put, ken Canaan. ⁷ Dagiti lallaki a putot ni Cus ket da Seba, Havila, Sabta, Raama, ken Sabteca. Dagiti lallaki a putot ni Raama ket da Seba ken Dedan. ⁸ Ti maysa pay kadagiti putot a lallaki ni Cus ket ni Nimrod. Ni Nimrod ti kaunaan a tao iti daga a nagbalin a maingel a mannakigubat. ⁹ Nakita ni Yahweh a nagbalin isuna a maingel a mangnganup. Isu a kunkuna dagiti tattao iti maysa a maingel a mangnganop a, "Makita ni Yahweh a maingelka a mangnganup a kas kenni Nimrod." ¹⁰ Nagbalin ni Nimrod nga ari a nangituray iti daga ti Babilonia. Dagiti immuna a siudad nga inturayanna ket ti Babel, Erec, Akkad, ken Calne. ¹¹ Manipud sadiay, napan isuna idiay Asiria a kaduana dagiti dadduma a tattao, impatakderda sadiay dagiti siudad a Ninive, Rehobot-ir, Cala, ¹² ken Resen. Ti Resen ket maysa a dakkel a siudad nga adda iti nagbaetan ti Ninive ken Cala. ¹³ Ti anak ni Ham a ni Egipto ket nagbalin a kapuonan dagiti bunggoy dagiti tattao idiay Lud, Anam, Lehab, Naftu, ¹⁴ Patrus, Caslu, ken Caftor. Ni Caslu ti nagtaudan dagiti Filisteo. ¹⁵ Ti inaudi a putot ni Ham a ni Canaan ket naaddaan kadagiti putot a lallaki, ni Sidon ti inauna, ken ni Het ti inaudi. ¹⁶ Ni Canaan met ti kapuonan dagiti Jebusio, Amoreo, Gergaseo, ¹⁷ Heveo, Arkeo, Sineo, ¹⁸ Arvedeo, Zemareo, ken Hamateo. Saan a nagbayag, nagwaras dagiti kaputotan ni Canaan ket nalawa a disso ti nasakupanda. ¹⁹ Ti masakupanda ket manipud iti siudad a Sidon iti abagatan inggana iti Gaza iti laud nga asideg iti Gerar, ken agpadaya kadagiti ili a Sodoma, Gomora, Adma, ken Zeboiim, agingga iti ili ti Lasa. ²⁰ Dagita dagiti kaputotan ni Ham. Nagbalinda a bunggoy dagiti tattao nga addaan kadagiti bukodda a puli, bukodda a pagsasao, ken bukodda a daga. ²¹ Ni Sem nga in-inauna a kabsat ni Jafet ket naaddaan met kadagiti lallaki a putot, ken nagbalin isuna a kapuonan dagiti amin a kaputotan ni Eber. ²² Dagiti lallaki a putot ni Sem ket da Elam, Assur, Arpaksad, Lud, ken Aram. ²³ Dagiti lallaki a putot ni Aram ket ni Us, ni Hul, ni Geter, ken ni Mas. ²⁴ Naaddaan ni Arpaksad iti putot a lalaki, isu ni Sela. Naaddaan ni Sela iti putot a lalaki, isu ni Eber. ²⁵ Naaddaan ni Eber iti dua a putot a lallaki. Peleg ti nagan ti maysa a ti kayatna a sawen ket "pannakabingay-bingay" gapu ta iti tiempo a nagbibiag isuna ket nabingay-bingay ken nagwaras iti sadinoman dagiti tattao iti daga. Joktan met ti nagan ti ading ni Peleg. ²⁶ Ni Joktan ti ama da Almodad, Selef, Hasarmavet, Jera, ²⁷ Hadoram, Uzal, Dikla, ²⁸ Obal, Abimael, Seba, ²⁹ Ofir, Havila, ken Jobab. Amin dagitoy ket lallaki a putot ni Joktan. ³⁰ Ti disso a nagnaedan dagiti puli ket manipud Mesa inggana Sefar, nga adda iti katurturodan iti daya. ³¹ Isuda ket kaputotan dagiti annak a lallaki ni Sem. Nagbalinda a bunggoy nga addaan kadagiti bukodda a puli, bukodda a pagsasao, ken bukodda a daga. ³² Amin dagitoy a puli ket nagtaud kadagiti putot ni Noe. Tungngal puli ket addaan iti bukodna a kaputotan ken tunggal maysa ket nagbalin a maysa a bunggoy. Nabukel dagitoy a bunggoy kalpasan ti layus ket nagwarasda iti entero a daga.