¹ Iti daytoy a tiempo, maymaysa ti pagsasao dagiti amin a tattao iti lubong. ² Idi nagturong dagiti tattao idiay daya, dimtengda iti patag a rehion ti Babilonia ket inrugida ti nagnaed sadiay. ³ Ket kinunada iti maysa ken maysa, "Agaramidtayo iti adu a ladrillo ken lutuentayo tapno tumibkerda a maaramat a pangipatakder iti pasdek!" Nagusarda ngarud kadagiti ladrillo imbes a batbato ken nagusarda iti alketran imbes a mortar nga usarenda a pannakasementoda a mangtengngel kadagiti ladrillo. ⁴ Kinunada, "Mangbangontayo iti bukodtayo a siudad! Mangipatakdertayo met iti torre a dumanon idiay langit! Iti kasta, maammoan dagiti tattao no siasinotayo! No saantayo nga aramiden daytoy, masinasinatayonto iti entero a daga!" ⁵ Maysa nga aldaw, bimmaba ni Yahweh tapno kitaenna ti siudad ken ti torre nga ipatpatakder dagiti tattao. ⁶ Kinuna ni Yahweh, "Dagitoy a tattao ket maysa a bunggoy a maymaysa ti pagsasaoda. No marugianda nga aramiden daytoy, awanton ti ikeddengda a saanda a kabaelan nga aramiden! ⁷ Bumabatayo ngarud, ket pagsaoentayo dagiti tattao iti agduduma a pagsasao, tapno saanda nga agkikinnawatan." ⁸ Babaen iti panangaramid ni Yahweh iti daytoy, sininasinana ida ket impanna ida iti nadumaduma a luglugar iti entero a daga, ket insardeng dagiti tattao ti panangbangon iti siudad. ⁹ Naawagan ti siudad iti Babel gapu ta iti dayta a disso, saanen nga intulok ni Yahweh nga agusar dagiti tattao iti maymaysa a pagsasao. Ket sininasina ida ni Yahweh iti entero a daga manipud iti dayta a lugar. ¹⁰ Dagitoy met dagiti nagtaud kenni Sem. Dua a tawen kalpasan ti layus, idi agtawen ni Sem iti sangagasut, naaddaan isuna iti putot a napanaganan iti Arpaksad. ¹¹ Kalpasan a naiyanak ni Arpaksad, nagbiag pay ni Sem iti limagasut pay a tawen ket naaddaan pay isuna kadagiti dadduma pay nga annak a lallaki ken babbai. ¹² Idi tallo pulo ket liman ti tawen ni Arpaksad, naaddaan isuna iti lalaki a putot a napanaganan iti Sela. ¹³ Kalpasan a naiyanak ni Sela, nagbiag ni Arpaksad iti 403 pay a tawen ket naaddaan pay kadagiti annak a lallaki ken babbai. ¹⁴ Idi agtawen ni Sela iti tallopulo, nagbalin isuna nga ama ni Eber. ¹⁵ Kalpasan a naiyanak ni Eber, nagbiag ni Sela iti nasurok 403 a tawen ket naaddaan pay kadagiti annak a lallaki ken babbai. ¹⁶ Idi agtawen ni Eber iti tallopulo ket uppat, naaddaan isuna iti putot a lalaki a napanaganan iti Peleg. ¹⁷ Kalpasan a naiyanak ni Peleg, nagbiag pay ni Eber iti 430 a tawen ket naaddaan pay kadagiti annak a lallaki ken babbai. ¹⁸ Idi agtawen ni Peleg iti tallopulo, naaddaan isuna iti putot a lalaki a napanaganan iti Reu. ¹⁹ Kalpasan a naiyanak ni Reu, nagbiag pay ni Peleg iti 209 a tawen ket naaddaan pay isuna kadagiti annak a lallaki ken babbai. ²⁰ Idi agtawen ni Reu iti tallopulo ket dua, naaddaan isuna iti putot a lalaki a napanaganan iti Serug. ²¹ Kalpasan a naiyanak ni Serug, nagbiag pay ni Reu iti 207 a tawen ket naaddaan pay kadagiti annak a lallaki ken babbai. ²² Idi agtawen ni Serug iti tallopulo, naaddaan isuna iti putot a lalaki a napanaganan iti Nahor. ²³ Kalpasan a naiyanak ni Nahor, nagbiag pay ni Serug iti duagasut a tawen ket naaddaan pay isuna kadagiti annak a lallki ken babbai. ²⁴ Idi agtawen ni Nahor iti duapulo ket siam, naaddaan isuna iti putot a lalaki a napanaganan iti Tera. ²⁵ Kalpasan a naiyanak ni Tera, nagbiag pay ni Nahor iti nasurok 119 a tawen ket naaddaan pay isuna kadagiti annak a lallaki ken babbai. ²⁶ Kalpasan a nadanun ni Tera ti maikapitopulo a tawenna, naaddaan isuna kadagiti putot. Isuda da Abram, Nahor, ken Haran. ²⁷ Kastoy ti napasamak mainaig kadagiti kaputotan ni Tera: Da Abram, Nahor, ken Haran ket putot a lallaki ni Tera. Lot met ti nagan ti putot a lalaki ni Haran. ²⁸ Kaddua ni Haran ti amana idi natay isuna iti siudad ti Ur, iti pagilian dagiti Caldeo a nakaiyanakanna a daga. ²⁹ Nangasawa da Abram ken Nahor. Sarai ti nagan ti asawa ni Abram, ket Milca ti nagan ti asawa ni Nahor. Ni Milca ken ni Isca ket babbai a putot ni Haran. ³⁰ Ni Sarai ket awanan iti anak gapu ta isuna ket baog. ³¹ Inkeddeng ni Tera a pumanaw iti Ur ket mapan agnaed idiay Canaan. Isu nga inkuyogna ti putotna a lalaki a ni Abram, ti apokona a lalaki a ni Lot a putot met ti lalaki a putotna a ni Haran agraman ti asawa ni Abram a ni Sarai. Ngem imbes nga agturongda idiay Canaan, nagsardengda idiay ili ti Haran ket nagnaedda sadiay. ³² Idi agtawen ni Tera iti 205, natay isuna idiay Haran.