¹ Kalpasanna, kinuna ni Yahweh kenni Abram, "Panawam daytoy a pagilian a pagnanaedam. Panawam dagiti kakabagian ti amam ken ti pamiliana, ket mapanka iti lugar nga ipakitakto kenka. ² Pagbalinekto a dakkel a nasion dagiti kaputotam. Bendisionankanto ket pagbalinenkanto a nalatak. Ti aramidek kenka ket agbalinto a bendision kadagiti dadduma. ³ Bendisionakto dagiti mangbendision kenka, ket ilunodkonto dagiti mangaramid iti dakes kenka. Babaen kenka bendisionakto amin dagiti puli ditoy rabaw ti daga." ⁴ Pimmanaw ngarud ni Abram idiay Haran kas imbaga ni Yahweh nga aramidenna. Agtawen idin ni Abram iti pitopulo ket lima idi pimmanaw isuna sadiay a kaduana ti pamiliana ken ti pamilia ni Lot. ⁵ Inkuyogna ti asawana a ni Sarai ken ti kaanakanna a ni Lot; innalana met amin a sanikuana ken inkuyogna amin a nagbalin a tagabuna idiay Haran. Pimmanawda sadiay ket napanda idiay Canaan. ⁶ Idiay Canaan, nagdaliasatda agingga idiay Sikem ket nagkampoda iti abay ti natayag a kayo a naawagan iti kayo ti Moreh. Idi napasamak daytoy, madama nga agnanaed dagiti Cananeo iti dayta a daga. Kalpasanna, nagparang ni Yahweh kenni Abram ket kinunana kenkuana, "Itedkonto daytoy kadagiti kaputotam." ⁷ Ket nangbangon ni Abram iti altar tapno mangisagut iti daton kenni Yahweh, a nagparang kenkuana. ⁸ Manipud idiay Sikem, nagdaliasat ni Abram ken ti pamiliana kadagiti katurturodan nga adda iti daya ti Betel. Ti Betel ket adda iti laud ti nangipatakderanda iti toldada ken ti Ai ket adda iti daya. Nangbangon manen isuna iti sabali pay nga altar sadiay ken nangidatag iti daton ket nagrukbab kenni Yahweh. ⁹ Kalpasanna, pimmanawda sadiay ket nagtultuloyda a nagdaliasat a nagturong iti let-ang ti Negeb. ¹⁰ Rimsua iti panagbisin iti dayta a lugar, isu nga nagpaabagatanda nga agturong iti Egipto tapno mapanda pay laeng agnaed sadiay, gapu ta agkurang unay ti taraon iti dayta a lugar a nagnaedanna. ¹¹ Idi dandanidan a makadanon iti beddeng ti Egipto, kinuna ni Abram kenni Sarai nga asawana, "Dumngegka, ammok a napintaska unay a babai. ¹² Inton makitadaka dagiti tattao idiay Egipto, kunaendanto, "Asawana daytoy a babai' ket papatayendakto, ngem saandakanto a papatayen. ¹³ Isu a dawatek kenka nga ibagam kadakuada a kabsatka, tapno natalgedak ket saandakto a dangran gapu kenka." ¹⁴ Ket napasamak ngarud daytoy, apaman a dimtengda idiay Egipto, nakita dagiti tattao ti Egipto a pudno a napintas unay ti asawana. ¹⁵ Idi nakita isuna dagiti opisial ti ari, impadamagda iti ari ti kinapintasna. Ket innala ngarud isuna ti ari ket impanna iti palasiona. ¹⁶ Naimbag unay ti pannakilinnangen ti ari kenni Abram gapu kenni Sarai, ket inikkanna ni Abram kadagiti karnero, bakbaka, as-asno, lallaki ken babbai a tagabu ken kamkamelio. ¹⁷ Ngem gapu iti panangala ti ari kenni Sarai, nga asawa ni Abram, pinagsagaba ni Yahweh ti ari agraman dagiti dadduma nga adda iti pagtaenganna babaen iti nakaro a sakit. ¹⁸ Isu nga pinaayaban ti ari ni Abram ket kinunana kenkuana, "Dakes unay ti inaramidmo kaniak! ¹⁹ Apay ta saanmo nga imbaga nga asawam isuna? Apay nga imbagam a kabsatmo, iti kasta ket innalak isuna nga agbalin nga asawak? Saanmo koma nga inaramid dayta! Isu nga ita alaem ti asawam, pumanaw kayo ditoy!" ²⁰ Ket binilin ti ari dagiti opisialna tapno a papanawenda ni Abram ken ti asawana ken amin a sanikuana idiay Egipto.