¹ Pimmanaw ngarud ni Abram ken ni Sarai idiay Egipto ket nagsublida iti let-ang nga adda iti abagatan a paset ti Judea. Intugotda amin a kinabaknangda, ket kimmuyog kadakuada ni Lot. ² Nabaknang unay ni Abram. Addaan isuna iti adu nga ay-ayup, pirak ken balitok. ³ Nagtultuloyda a nagdaliasat ket nagakar-akarda kadagiti luglugar manipud iti let-ang nga adda iti abagatan a paset ti Judea ket nagturongda idiay Betel, ken iti lugar a nagbaetan ti Betel ken Ai, a nagkampoanda met laeng idi. ⁴ Ditoy met laeng ti disso a nangbangonan ni Abram iti altar; sadiay, indaydayawna manen ni Yahweh. ⁵ Ni Lot, a nakikuyog kenni Abram a nagdaldaliasat, ket addaan met kadagiti arban iti karnero, kalkalding, ken bakbaka ken toltolda. ⁶ Adu dagiti ayupda a dua ket saan a mabalin nga agnaedda iti isu met laeng a lugar. Saan nga umanay ti danum ken taraon para kadagiti ayupda. ⁷ Maysa pay, dagiti lallaki nga agay-aywan kadagiti ayup ni Abram ken dagiti agaywan kadagiti taraken ni Lot ket mangrugin nga agaapa. Agnanaed met dagiti kaputotan da Canaan ken Perez iti dayta a disso. ⁸ Kinuna ngarud ni Abram kenni Lot, "Agsipud ta asideg nga agkabagianta, saan a nasayaat kadata iti agapa, wenno uray met kadagiti lallaki nga agay-aywan kadagiti ayupmo ken kadagiti lallaki nga agay-aywan kadagiti ayupko. ⁹ Nalawa ti daga nga agpaay kadata a dua. Isu a masapul nga agsinata. Mabalinmo a pilien ti aniaman a paset a kayatmo. No kayatmo iti daydiay a lugar, agtalinaedak ditoy, ngem no kayatmo nga agtalinaed ditoy, mapanak ngarud idiay." ¹⁰ Intannawag ni Lot ti panagkitana iti Zoar ket nakitana nga adu ti danum iti amin a kapatadan nga asideg iti Karayan Jordan. Daytoy ket sakbay a dinadael ni Yahweh ti Sodoma ken Gomorra nga adda iti dayta a kapatadan. Kadagidi nga al-aldaw, maipada daytoy iti minuyongan ni Yahweh, ken maipada iti daga idiay Egipto nga asideg iti Karayan a Nilo. ¹¹ Pinili ngarud ni Lot ti daga iti kapatadan ti Karayan Jordan. Pinanawanna ti ulitegna a ni Abram, ket immakar iti daya. ¹² Nagtalinaed ni Abram idiay daga ti Canaan, ket napan met nagnaed ni Lot iti asideg dagiti siudad iti kapatadan ti Karayan Jordan, ket insaadna dagiti toltoldana iti asideg ti Sodoma. ¹³ Ita, napalalo ti kinadakes dagiti tattao nga agnaed idiay Sodoma ket nakaro ti panagbasolda maibusor iti Dios. ¹⁴ Kalpasan a nagsina da Abram ken Lot, kinuna ni Yahweh kenni Abram, "Iwarasmo ti panagkitam iti pakabuklan daytoy a lugar nga ayanmo. Kumitaka iti amianan ken iti abagatan, ket kumitaka iti laud ken iti daya. ¹⁵ Itedkonto kenka ken kadagiti kaputotamto dagitoy a daga a makitam; itedkonto kenka daytoy iti agnanayon. ¹⁶ Paaduekto ti kaputotam kas iti kaadu ti bilang ti tapuk! No padasen ti maysa a tao a bilangen ti tapuk, kasla padpadasenna met a bilangen dagiti kaputotam. ¹⁷ Inka sursoren ti daga, gapu ta itedko amin daytoy kenka." ¹⁸ Innala ngarud ni Abram dagiti toldana ket napan idiay Hebron ket nagnaed iti ayan dagiti dadakkel a kayo ni Mamre. Nangbangon isuna sadiay iti altar a bato tapno makapagdaton isuna kenni Yahweh.