¹ Idi agtawen ni Abram iti siam a pulo ket siam, nagparang manen ni Yahweh kenni Abram ket kinunana kenkuana, "Siak ti Dios a mannakabalin amin. Kayatko nga agbiagka iti wagas a pagayatak. Saanko a kayat nga agaramidka iti aniaman a biddut. ² Patalgedakto ti tulagko iti nagbaetanta, ken paaduekto iti kasta unay ti bilang dagiti kaputotam.' ³ Nagpakleb ni Abram iti daga. Ket kinuna ti Dios kenkuana, ⁴ Dumngegka iti daytoy! Daytoy ti tulag nga ikarik kenka: Agbalinkanto nga ama dagiti adu a bunggoy dagiti tattao. ⁵ Saanton nga Abram ti naganmo. Ngem ketdi, ti naganmonto ket Abraham, gapu ta pagbalinenkanto nga ama ti adu a bunggoy dagiti tattao. ⁶ Paaduekto iti kasta unay dagiti kaputotam, ken pataudekto kadakuada iti adu nasion ken adu nga ar-ari. ⁷ Aramidekto daytoy a tulag iti nagbaetanta a dua ken kadagiti henerasion iti kaputotam a sumarsaruno iti agnanayon. Gapu iti daytoy a tulag, agrukbabkayonto ken sumurot kayo kaniak kas Diosyo, ken kastanto met kadagiti kaputotam. ⁸ Itedkonto kenka ken kadagiti kaputotam ti entero a daga ti Canaan, a pagnanaedam ita. Agbalinto daytoy nga agnanayon a sanikua para kadakuada, ket siakto ti Diosda." ⁹ Kalpasanna kinuna ti Dios kenni Abraham, "Ita masapul a tungpalem ti pasetmo iti tulag a pagtulaganta, ken masapulto met a tungpalen dagiti kaputotam daytoy, para iti amin a henerasion. ¹⁰ Daytoy ti kasapulan iti tulag a pagtulaganta ken kasta met dagiti amin a kaputotamto: Masapul a makugit ti tunggal lalaki nga adda kadakayo. ¹¹ Ti panangiwa kadagiti akinruar a kudilda ti pagilasinan nga inawatyo ti katulagan a nagtulagantayo. ¹² Masapul a makugit ti tunggal ubing a lalaki nga adda kadakayo no adda walo nga aldawnan, kadagiti amin a henerasion iti masakbayan. Pakairamanan dayta dagiti lallaki a maladaga iti pagtaengam ken dagiti inyanak dagiti nagatang a tagabu, ken dagiti ganggannaet nga agnanaed kadakayo ngem saan a maibilang a kabbalaymo. ¹³ Saan a napateg no dagiti nagannakda ket kameng ti pagtaengam wenno ginatangmo a tagabu; masapul a makugitda amin. Pagilasinanto daytoy kadagiti bagiyo a mangipakita nga inawatyo daytoy nga agnanayon a tulag nga ibagbagak. ¹⁴ Masapul a papanawenyo manipud iti komunidadyo ti siasinoman a lalaki a saan pay a nakugit, gapu ta sinukir dayta a tao ti tulagko. ¹⁵ Kinuna pay ti Dios kenni Abraham, "Maipapan met kenni Sarai nga asawam, masapul a saanto metten a Sarai ti pangawagmo kenkuana. Sukatak met ti naganna. Ti naganna itan ket Sarah. ¹⁶ Bendisionakto isuna, ket agpasngayto isuna iti anak a lalaki para kenka. Ket bendisionakto isuna iti kasta unay ta agbalinto isuna a kapuonan ti tattao iti adu a nasion. Agtaudto kenkuana ti ar-ari ken bungbunggoy ti tattao." ¹⁷ Nagpakleb ni Abraham iti daga a kas panagraemna iti Dios. Ngem kalpasanna ket nagkatawa a kunana iti bagina, "Makaputot kadi met aya ti maysa a lalaki a sangagasuten ti tawenna? Ket gapu ta siam a pulon ti tawen ni Sarah, kasano ngarud nga agsikog isuna?" ¹⁸ Ket kinuna ni Abraham iti Dios, "Nalabit nga ipalubosmo nga uray ni Ismael lattan ti umawat iti bendisionmo ken agtawid iti amin a sanikuak." ¹⁹ Ket insungbat ti Dios, "Saan! Mangipasngayto ni Sarah nga asawam iti anak a lalaki para kenka. Masapul a panaganam isuna iti Isaac. Tungpalekto kenkuana ti tulagko, maysa nga agnanayon a tulag kenkuana ken kadagiti kaputotannanto. ²⁰ Maipapan met kenni Ismael, nangngegko ti kinniddawmo nga aramidek para kenkuana. Bendisionakto isuna tapno maaddaanto met iti adu a kaputotan. Kadagiti kaputotanna, addanto dagiti tumaud a mangidaulo iti sangapulo ket dua a tribu. Ken pagbalinekto a nabileg a nasion dagiti kaputotanna. ²¹ Ngem ni Isaac to ti pangtungpalak iti tulagko - ni Isaac nga ipasngayto ni Sarah iti kastoy a tiempo iti sumaruno a tawen." ²² Idi nalpas a nakisarita ti Dios kenni Abraham, nagpukaw ti Dios iti imatangna. ²³ Iti dayta met laeng nga aldaw, innala ni Abraham ni Ismael nga anakna ken dagiti amin a lallaki nga adda iti pagtaenganna, a pakairamanan ti amin nga annak a lallaki dagiti ginatangna a tagabu, ket kinugitna ida. Iniwana dagiti akinruar a kudilda, a kas imbaga ti Dios kenkuana nga aramidenna. ²⁴ Agtawen ni Abraham iti siam a pulo ket siam idi nakugit isuna, ²⁵ ken agtawen met ni Ismael iti sangapulo ket tallo idi kinugit isuna ni Abraham. ²⁶ Agpada a nakugit da Abraham ken ti anakna a ni Ismael iti dayta met laeng nga aldaw. ²⁷ Nakugit met dagiti amin a lallaki iti pagtaenganna, dagiti lallaki a naiyanak idiay ken dagiti nagatang ni Abraham manipud kadagiti ganggannaet.