¹ Aggingga iti dayta a tiempo, saan pay a naganak ni Sarai nga asawa ni Abram iti anakda kenni Abram. Ngem addaan isuna iti babai nga adipen a taga-Egipto, nga agnagan iti Hagar. ² Kinuna ni Sarai kenni Abram, "Dumngegka kaniak! Saannak a pinalubusan ni Yahweh nga agsikog. Kaiddaem ngarud ti tagabuk a ni Hagar. Bareng no aganak isuna kadagiti annak nga ibilangkonto nga anak." Immanamong ni Abram nga aramidenna ti imbaga ni Sarai. ³ Napasamak daytoy kalpasan iti sangapulo a tawen a panagnaed da Abram ken Sarai iti daga ti Canaan. Iti kastoy a wagas nga innala ni Abram ni Hagar, nga adipen ni Sarai a nagtaud idiay Egipto, tapno agbalin a maikadua nga asawana. ⁴ Kinaiddana ngarud ni Hagar, ket nagsikog isuna. Idi naamoanna a masikog isuna, inrugina met nga inumsi ti amona a ni Sarai. ⁵ Kalpasanna, imbaga ni Sarai kenni Abram, "Biddutmo daytoy! Inyawatko kenka ti tagabuk tapno kaiddaem. Ita ket masikogen, ket um-umsiennak gapu ta awananak iti annak. Makita koma ni Yahweh a nagbasolka iti panangaramidmo iti kastoy kaniak. ⁶ Kinuna ngarud ni Abram kenni Sarai, "Dumngegka kaniak! Adipenmo isuna, isu nga aramidem kenkuana no ania ti kasayaatan." Ket inrugi ni Sarai a tratoen ni Hagar iti saan a nasayaat, isu a nagtalaw. ⁷ Napan kenkuana ti anghel ni Yahweh idi asideg isuna iti maysa nga ubbog idiay disierto. Daytoy ti ubbog nga adda iti abay ti dalan nga agturong iti Sur. ⁸ Kinunana kenkuana, "Hagar, tagabu ni Sarai, sadino ti naggapuam ken sadino ti papanam? Simmungbat isuna, "Nagtalawak manipud kenni Sarai, nga amok." ⁹ Kinuna ti anghel ni Yahweh, "Agsublika iti amom ket agtultuloyka nga agtulnog kenkuana." ¹⁰ Kinuna pay ti anghel ni Yahweh kenkuana, "Ikkankanto iti kabaelan a mangipaay iti adu unay a kaputotan nga awan ti makabael a mangbilang kadakuada!" ¹¹ Kinuna pay ti anghel ni Yahweh kenkuana, "Denggem daytoy! Masikogka. Aganakkanto iti lalaki. Masapul a panaganamto isuna iti Ismael a ti kayatna a sawen ket 'Dumdumngeg ti Dios,' gapu ta nangngeg ni Yahweh ti panagsangsangitmo gapu iti nakaro unay a ladingitmo. ¹² Ngem saanto a matengngel ti anakmo a lalaki a kas iti atap nga asno. Busorennanto ti amin ken busorento met isuna ti amin. Agnaedto isuna nga adayo kadagiti amin a kabagianna." ¹³ Kinuna ni Hagar iti bagina, "Sibibiagak pay laeng met uray pay no nakitanak ni Yahweh!" Isu nga inawaganna ni Yahweh a, "Dios a makakitkita kaniak." ¹⁴ Dayta ti makagapu nga aw-awagan dagiti tattao ti bubon idiay iti "Beer-Lahai-Roi," a ti kayatna a sawen ket, "ti bubon ti sibibiag a makakitkita kaniak!" Adda pay laeng daytoy sadiay, iti nagbaetan ti Kades ken Bered. ¹⁵ Isu nga iti saan unay a nabayag, naganak ni Hagar iti maysa a lalaki nga isu ti putot ni Abraham, ket pinanagananna isuna iti Ismael. ¹⁶ Walo-pulo ket innem idin ti tawen ni Abram idi impasngay ni Hagar ti putot a lalaki ni Abram a ni Ismael.