¹ Iti naminsan, adda sirmata nga immay kenni Abram. Ket iti daytoy a sirmata, nagsao ni Yahweh kenkuana a kinunana. "Saanka nga agbuteng iti aniaman, salaknibankanto ken ikkankanto iti dakkel a gungguna." ² Ngem simmungbat ni Abram "Apo a Yahweh, kasano a maikkannak iti pudno a kayatko, gapu ta awan met annakko, ken ti agtawidto kadagiti sanikuak ket ti adipenko a ni Eleazar a taga-Damasco! ³ Kinuna pay ni Abram, "Saannak met nga inikkan iti annak. Isu a ti laeng adipen iti pagtaengak ti agtawidto kadagiti amin a sanikuak." ⁴ Simmungbat ni Yahweh, "Saan! Saanto nga isuna ti mangtawid iti daytoy. Ngem ketdi, sikanto a mismo ti ama ti mangtawid iti amin a kukuam." ⁵ Ket impan ni Yahweh ni Abram iti ruar ti toldana ket kinunana, "Tumangadka iti tangatang! Mabilangmo kadi dagiti bituen? Saan, saanmo ida a mabilang gapu ta aduda unay, ket kastanto met ti kaadu dagiti kaputotam." ⁶ Pinati ni Abram a mapasamak ti imbaga ni Yahweh. Gapu iti dayta, imbilang ni Yahweh a nasayaat ni Abram. ⁷ Kinuna pay ni Yahweh kenkuana, "Siak ni Yahweh. Siak ti nangiyeg kenka iti daga ti Caldea manipud Ur." Inyegka ditoy tapno itedko kenka daytoy a daga a tagikuaem. ⁸ Ngem simmungbat ni Abram, "Apo a Yahweh, kasano a masiguradok a matagikuakto daytoy a daga?" ⁹ Kinuna ti Dios kenkuana, "Mangiyegka iti tallo ti tawenna a baka ken tallo ti tawena a kalding, maysa a kalapati ken maysa a pagaw." ¹⁰ Inyeg ngarud amin ni Abram dagitoy. Pinartina dagitoy ken ginuduana ti tunggal ayup. Inurnosna nga inyintarna ti tunggal maysa iti agsinnumbangir. Ngem saanna a ginudua ti kalapati ken pagaw. ¹¹ Bimmaba dagiti billit a mangmangan kadagiti natay nga ayup, ngem binugaw ni Abram dagitoy. ¹² Iti ilillinnek ti init, nairidep ni Abram, ket dagus a nagsipnget amin ti aglawlawna ken nakabutbuteng. ¹³ Kalpasanna, kinuna ni Yahweh kenni Abram. "Kayatko a maammoam, nga agnaedto a ganggannaet dagiti kaputotam iti daga a saanda a kukua. Agbalindanto a tagabu kadagiti akinkukua iti dayta a daga. Parigatento ida dagiti akinkukua iti daga iti uppat a gasut a tawen. ¹⁴ Ngem kalpasanna, dusaekto dagiti tattao iti dayta a pagilian a nakatagabuanda. Ket panawanto dagiti kaputotam dayta a pagilian, itugotdanto dagiti adu a sanikua. ¹⁵ Idinto a sika, mataykanto a sitatalna ket maitanemkanto inton lakayka unayen. ¹⁶ Kalpasan a matagabu dagiti kaputotam iti uppat a gasut a tawen, agsublidanto ditoy. Isudanto ti mangtengel iti daytoy a daga ket parmekendanto dagiti tattao nga Amorreo. Saan a mapasamak daytoy sakbay dayta a tiempo, gapu ta saan pay a nagbasol dagiti Amoreo iti punto a mabalinko idan a dusaen iti kas iti dayta gapu iti daytoy." ¹⁷ Idi limneken ti init ken nasipngeten, pagammoan ket adda met nagparang a gumilgil-ayab nga aluten ken banga nga adda kargana a beggang nga agpangpangato ti asukna ket napan iti nagbaetan dagiti nagudua nga ayup. ¹⁸ Iti dayta nga aldaw, nakitulag ni Yahweh kenni Abram. Imbaga ni Yahweh kenkuana, "Itedkonto kadagiti kaputotam ti amin a daga iti nagbaetan ti karayan nga adda iti akindaya a ketegan ti Egipto idiay abagatan, ken idiay amianan ket agturong idiay Karayan Eufrates. ¹⁹ Dayta ti daga nga ayan dagiti bunggoy ti tattao a Kineo, dagiti Kenezeo, dagiti Kadmoneo, ²⁰ dagiti Heteo, dagiti Perezeo, dagiti Refaim, ²¹ dagiti Amorreo, dagiti Cananeo, dagiti Gergeseo, ken dagiti Jebuseo."