¹ Maysa nga aldaw iti dayta a tawen, iti tiempo a kapudutan ti aldaw, nagparang manen ni Yahweh kenni Abraham iti asideg dagiti dadakkel a kayo a kukua ni Mamre. Agtugtugaw idi ni Abraham iti ruangan ti toldana. ² Timmangad ni Abraham ket naklaat a nakakita kadagiti tallo a lallaki nga agtaktakder iti asidegna. Idi nakitana ida, nagtaray a mangsabat kadakuada. Nagpakleb isuna iti daga a kas panagraemna. ³ Kinunana iti maysa kadakuada, "Apo, no naay-ayokayo kaniak, agtalinaedkayo pay laeng ditoy iti uray apagbiit. ⁴ Ipalubosyo koma a mangiyeg dagiti adipenko iti danum tapno buggoanda dagita sakayo, ket kalpasanna, aginanakayo iti sirok daytoy a kayo. ⁵ Yantangay ta immaykayo kaniak, palubosandak koma a mangiyeg iti sumagmamano a taraon tapno adda pamigsayo sakbay a pumanawkayo." Simmungbat dagiti lallaki, "Ala wen, aramidem kas iti imbagam." ⁶ Kalpasanna, nagdardaras nga immuneg ni Abraham iti tolda ket kinunana kenni Sara, "Darasem, mangalaka iti duapulo a kilo iti kasayaatan nga arina ket mangaramidka iti tinapay!" ⁷ Kalpasanna timmaray isuna iti ayan ti arban dagiti baka ket nangpili iti baka a nalukneng ken nananam ti karnena. Intedna daytoy iti maysa kadagiti adipenna, a dagus a nangparti ken nangiluto iti daytoy. ⁸ Idi naluton ti karne, nangiyeg ni Abraham iti sumagmamano a keso, gatas, ken ti karne nga insagana ti adipen. Inkabilna dagitoy iti sangngoananda. Kalpasanna ket nagtakder isuna iti asidegda kabayatan ti pannanganda iti sirok ti kayo. ⁹ Kalpasan ti pannanganda, sinalusodda kenkuana, "Sadino ti ayan ni Sarah nga asawam?" Insungbatna, "Adda isuna iti uneg ti tolda." ¹⁰ Ket kinuna iti mangidadaulo iti bunggoy, "Agsubliakto kenka iti tiempo ti panagtutudo inton sumaruno a tawen, ket dumngegka, aganakto ni Sarah nga asawam iti maysa a maladaga a lalaki." Nairana a dumdumngeg ni Sarah iti ayan ti ruangan ti tolda, nga adda iti likudan ti lalaki nga agsasao. ¹¹ Ita, lakay ken baket unayen da Abraham ken Sarah, ket limmabesen ni Sarah iti tiempo ti panaganak. ¹² Isu a nagkatawa ni Sara iti unegna, ket kunana iti panunotna, "Kimbetakon ken lakayen ti asawak. Maaddaanak pay kadi ngarud aya met iti ragsak a maaddaan iti anak? ¹³ Kinuna ni Yahweh kenni Abraham, "Apay a nagkatawa ni Sarah? Apay a panpanunotenna, 'Baketak unayen, kasano ngarud met ngay nga maaddaanak iti anak?' ¹⁴ Adda kadi banag a narigat kaniak? Agsubliakto iti kastoy a tiempo inton umay a tawen nga intudingko a tiempo, ket maaddaanto ni Sarah iti anak a lalaki a maladaga." ¹⁵ Ket nagbuteng ni Sarah, isu a nagulbod ket kinunana, "Saanak a nagkatawa." Ngem kinuna ni Yahweh, "Saanmo nga ilibak! Nagkatawaka." ¹⁶ Idi timmakder dagiti tallo a lallaki tapno pumanaw, tinannawaganda ti tanap nga agturong iti siudad ti Sodoma. Kimmuyog kadakuada ni Abraham tapno agpakada kadakuada. ¹⁷ Kinuna ni Yahweh iti bagina, "Saan nga umno a saanko nga ipakaammo kenni Abraham ti pangpanggepek nga aramiden. ¹⁸ Agbalinto a naindaklan ken nabileg a bunggoy ti tattao dagiti kaputotan ni Abraham. Ken mabendisionanto dagiti tattao kadagiti amin a bunggoy ti tattao gapu iti aramidek para kenkuana. ¹⁹ Pinilik isuna tapno iturongnanto dagiti putotna ken dagiti pamiliada iti kasta ket agtulnogda kaniak ken aramidenda ti umno ken rumbeng, iti kasta ket aramidek para kenni Abraham ti inkarik nga aramidek para kenkuana. ²⁰ Kinuna ngarud ni Yahweh kenni Abraham, "Nangngegko dagiti nakabutbuteng a banbanag nga ibagbaga ti dadduma a tattao maipapan kadagiti tattao iti Sodoma ken Gomora. Nakaro unay dagiti basolda. ²¹ Isu a bumabaak itan, ket kitaek no pudno wenno saan dagiti amin nga agkakadakes a banbanag a nangngegko. ²² Ket pimmanaw dagiti dua a lalaki ken inrugida ti nagna nga agturong idiay Sodoma. Ngem nagtalinaed a nakatakder ni Abraham iti sangoanan ni Yahweh. ²³ Ad-adda nga immasideg ni Abraham kenkuana ket kinunana, "Pudno kadi nga iramanmo a dadaelen dagiti tattao a saan a nakaaramid iti dakes kadagiti dakes a tattao? ²⁴ Ania ti aramidem no adda iti limapulo a tattao a saan a nakaaramid iti dakes idiay siudad? Pudno kadi a dadaelem amin ida, ken saanmo a kaasian daydiay a lugar a maigapu kadagiti limapulo a nalinteg a tattao a saan a nakaaramid iti dakes? ²⁵ Patiek a saanmo nga aramiden ti kasta a banag, nga iramanmo a patayen dagiti nasayaat a tattao kadagiti dakes a tattao, ken saanmo a tratoen iti agpada a wagas dagiti nasayaat ken dagiti dakes a tattao. Saanmo a maaramid dayta, gapu ta sika nga ukom ti amin nga adda iti daga, ket aramidem ti umno maipapan kadagiti tattao iti Sodoma!" ²⁶ Simmungbat ni Yahweh, "No adda masarakak a limapulo a tattao iti Sodoma a saan a nakaaramid iti dakes, kaasiakto ti sibubukel a siudad maigapu kadakuada." ²⁷ Simmungbat ni Abraham, "Saan a rumbeng a kastoy ti panakisaok kenka, Apok, gapu ta awan serserbik a kas iti tapok ken dapo. ²⁸ Ngem ania ti aramidem no adda laeng uppat a pulo ket lima a tattao a saan a nakaaramid iti dakes? Dadaelem kadi ti amin a tattao nga ada iti entero a siudad gapu ta adda laeng uppat a pulo ket lima a saan ket a limapulo a nasayaat a tattao?" Simmungbat ni Yahweh, "Saanko a dadaelen no adda masarakak nga adda uppat a pulo ket lima a nasayaat a tattao." ²⁹ Intultuloy ni Abraham ti agsao kenkuana iti kastoy a wagas, a kunana, "Ania ti aramidem no adda laeng masarakam nga uppat a pulo a nasayaat a tattao sadiay?" Simmungbat ni Yahweh, "Saanko ida a dadaelen amin maigapu iti uppat a pulo." ³⁰ Kinuna ni Abraham, "Pangngaasim ta saanka koma nga agunget ita. Palubosannak nga agsao manen. Ania ti aramidem no adda laeng tallopulo a nasayaat a tattao?" Insungbatna, "Saanko nga aramiden daytoy no adda masarakak a tallopulo sadiay." ³¹ Kinuna ni Abraham, "Saan koma rumbeng a kastoy ti pannakisaok kenka, Apok. Ngem ania ti aramidem no adda laeng masarakam a duapulo a nasayaat a tattao sadiay? Insungbatna, "Saanko a dadaelen ti sibubukel a siudad, maigapu kadagidiay a duapulo." ³² Kinuna ni Abraham, "Apok, saanka koma nga agunget ita. Maminsan pay a palubosannak nga agsao. Ania ti aramidem no adda laeng masarakam a sangapulo a nasayaat a tattao sadiay?" Simmungbat ni Yahweh, "Saanko a dadaelen ti siudad maigapu kadagidiay a sangapulo." ³³ Saanen a nagsao ni Abraham. Ket idi nalpas a nakisarsarita ni Yahweh kenni Abraham, pimmanaw ket nagawid metten ni Abraham iti pagtaenganna.