¹ तेतार च्या यरुशलेम आहना जैतून बोयडापर बैतफगे एने बैतनिय्याह गाव हाते आहने पूच्या ते च्यु तेरा चेला आखा चेला माय दुयह य कयीन मुकलयु |

² पल्लो अगव होंबो गाव देखाये तीना गावमा जावू , एने तीना गावमा पुचताज एक गदडीन पिलो बांदलो देखायहे , तिनापर कोदी कुण बी नी बोठया ओहे , तीनाहा सुडीन लावजु |

³ जर कुण बी तुमुहू ,' काहा तुमु सूडतला एंहे फूसे ते , तिनाहा एंहे कोयजु पोरबुह एरी जोरवुत से तेतार च्यु उतवावू तीनुहु ली मुकली देहे | ⁴ च्या गावमा गोया , गोलीमा जूपाहाते बांदायलो गोदडीन पिलो तीनुहु देखायो एने सुडीने बाज गया |

⁵ एने च्या च्याहंरी उबरोया ओता च्या फुसणे बाज गया के तुमु काय करतला काहा गोदडीन पिलाहा सुडतला

⁶ तेतार च्या येशु जेहे कोयु तेंहेज तीनुहु कोय देण्या , ओवता च्या तीन गोदडीन पिलाहा ली जाणे देण्या| ⁷ एने तीन गोदडीन पिलाहा येशु हाते लावीन तिनापर तिंदरा लुगड़ा पांगराव्या एने च्यु तिनापर बोठ गोयू |

⁸ एने गर्दीमायला खूब माणहे वाटोपर तिंदरा लुगडा आथरया एने दिहरा माणहे खेतोन हेडे दोखा डाव्या तुड़ीन वाटोपर वेर देण्या |

⁹ एने ज्या माणहे येशुन अगव एने फोसव जातोता च्या आयडी आयडीन कोयतता , "होसान्ना पोरबू भगवानन नावोमा ज्यू राजा आवतलु च्यु बरकतवावू से |

¹⁰ आपनु डायलु बाबू दाऊद राजान आवणेन राज से च्यों बोंडायीन लायक से " भगवानह सरगमा बोड़ाय ओये ," होसन्ना , होसन्ना|" ¹¹ एने च्यु येरुशलेम सेहर आविन भगवानन मंदिरोमा गोयू एने सोमखेरला आखा चीजे देखिन बारा चेला हाते बैतनिय्याह गयू , काहाके दिह बुड गयलु ओतु |

¹² दिहरे दिह बैतनिय्याह गाव दोखा च्या येरुशलेम सेहर जाणे बाज रोयला ओता , तेतार येशुह बुख लागली | ¹³ एने च्यु सेटू दोखू उबरयन एक उंबरोन जाड निव्वो जाड देखिन जाड़ोंहाते गयु पूण च्यु आविन बाव्यू ते पांटाहा सुडीन काईज नी जुडयो , काहाके फोवोन सिजन नी ओति |

¹⁴ च्यु तीन जाडोह कोयु एंवी दोखा कोदी तारों फोव कुणिज नी खाए तेर चेला येशु यो कोयलु होंबवतता | ¹⁵ ओवता येशु एने चेला येरुशलेमोमा फोसा आव्या एने च्यु मंदिरोमा गयु , एने लेनों देनो करतता तीनुहु बारथे काडणे बाज गयु एने च्यु पोयहा ओदला बोदला कोरनारान टेबल एने पेरवा वेचणारान पारडा उलटाव देल्लु |

¹⁶ मंदिरोमा कुणिह बी बोजार मांडणे नी देण्यु | ¹⁷ च्यु तीनुहु हिकाडीन कोयु , " भगवानन पुस्तकोमा एंहे काय नी लेखलों के " मारो घर आखि जातिनं माणहोन करता पोरथनान घर कोवायहे , पूण तुमु चुट्टान लीकायणेन गुफा बोणाव देल्ला |"

¹⁸ यो होंबविन मोटला पुजारा , एने नेम हिकाडनारा तिनाहा मारनेन सोंदि हुदणे बाज गया , पूण च्या बितता काहाके तेरी हीक होंब्बीन माणहे बोंगलाय जातोता |

¹⁹ एने हांजपोर ओयताज च्या तेर चेला सेहर सुडीन जात रया | ²⁰ होंदारे च्या जातोता तेतार देख्या ते तीन उंबरोन जाडोह मुवांडा बेव हुकरयल देख्या |

²¹ पतरसह ओर आवी के पेल्ले दिह येशु होय जाडोहो काय कोयलु एने च्यु येशुह कोयु , ऐ गुरु देख ! जीना जाडोह श्राप आपलू च्यों उंबरन जाड़ हुक गयलों से | ²² येशु तीनाहा जवाब आप्यु ," भगवानोंपर बुरहु करु |

²³ मी तुमुहू खरी कयह के , ज्यों कुण इन बोयडाहा कये के तु उखव जा एने दरियामा जाय पडजा कयहे ते अय जाहे | ²⁴ कोरिन मी तिमुहू कोयतलू ," तुमु बुरहु कोरिन काय बी प्रार्थना मा माँगहे ते च्यों तुमुहू जुड़ गोयलों कोरिन तुमु बुरहु कोरजू तेतार च्यों तुमुहू भगवान जरुड आपहे , एने तुमरेंन कोरीन अयजाहे

²⁵ एने जेतार बी तुमु उबरयन प्रार्थना करे तेतार तुमरा मनोमा कुणीन वीरूदमा खोताय रोयला अये ते तिनाहा माफ करू , तेतार तुमुरु होरग मायलु बाह भगवान तुमुरु गुनू बी माफ कोरहे |

²⁶ पूण जर तुमु माफ नी करे ते तुमरु बाह बी ज्यू होरग मा से , च्यु आप माफ नी करे | ²⁷ ते फसा येरुशलेम आव्या , एने जेतार मन्दिरोमा फिरततु तेतार डायला पुजारा , एने यहूदिन नेम हिकाडनारा एने पुड़ारया तिनाहाते आव्या आविन फूसणे बाजगया |

²⁸ तु या कामे कुणिन आधिकार दोखू करतलु एने यो काम करणेन अधिकार तोहो कुण आपलों ?" ²⁹ तेतार येशु तीनुहु कोयु , मी बी तुमुहू एक वात फूसतलु जर तुमु तिनी वातोन जोपाप आपहे तेतार मी बी तुमुहू कोयापिह के या कामे कुणिन अधिकार दोखू करतलु

³⁰ यूहन्नान बपतिस्मा आपणेन होक कुण आपलों होरग मायलु भगवान के माणहे ? मेहे एरु जवाब आपू मेहे| ³¹ तेतार च्या तिंदरे तिंदरे कोयणे बाज गया ," जर आपू होरगे दोखो तिनाहा होक जुडलों कोयहु ते च्यु कोयहे ,' ते च्यु ,; ते तुमु तिनापर काहा नी बुरहु करया ?"

³² पूण जर आपू , माणहे तीनाहा होक आपला कोयहू ते माणहे आपुहु काय कोर देहे कोरिन च्या माणहोह बीतोता काहाके माणहे यूहन्ना खोरु भविष्य कोयणारु से कोरिन बुरहु करतोता

³³ कोरिन ओवता च्या येशुहु जोपाप आप्या ," आमू काय नी जाणतला " के या कामे काल्ले अधिकार दखु करतलू मी बी तुमुहू नी देखाड़ों |