¹ येशु फोसू तीनूहू कोयू , " एवी उंजू एक दाखलु होबू , एक मालक दाखरसन वाडी लागड्यू , एने तेर सोमखेर वाड बादयू , तीनामा दाखरसन रूह काडणे एक खाडू खोदाडिन टोको बोणाव्यू , एने वाडीन राखवावी करने पोक्कू मावू बोणाव्यू ओवतू च्यू दाखरसन वाडी दीहरा गोवांदयानूह गोवादमा आपीन दीहरा देसोमा जात रयु ।

² दाखरसन फोवणेन सीजनोपर तेर फोवोन इस्सु लेणेन करता तेर एक पावरोह तीनु गोवांदयाह मा मुकल्लु

³ पुण च्या तीनाह दोरीन खुब दोया एने वाटु नी आण्या एने त तीनाहा ठारलुज मुकली देल्लु ⁴ ओवतु च्यु उंजु एक पावरोह तीनुपाह मुकल्लु पुण च्या तेर मुंड फुड देव्या एने तीनाहा लाजवाड देव्या

⁵ च्यु उंजु दीहरा एक पावरोह तीनुपाह मुकल्लु पुण च्या तेर मुंड फुड देव्या एने तीनाहा बी मार देव्या च्यु उंजु खुब होवंटा पावरोनुह मुकल्लु च्या तीनुमाय थुडाकोह खुब ठक्या एने थुडाकोह मार नाख्या ⁶ तीनापाहु उंजु मुकोलनेन कोरता तेर सुरू ओतरू रोयलु ओतु च्यु खुब लाडकु ओतु च्यु यो विचार कोरीन मुकल्लु के मार सुराह च्या मानपान आपहे कोरीन सवेलीवार मुकल्लु

⁷ पुण गोवादयाह तेर पुरयु आवतलु देखीन कोया यी आखी वाडीन वारीस ते युसे आपु ऊनाहा मार देता तेतार यी आखी वाडी आपणीज ओय जाहे ⁸ कोरीन च्या तीनाह देव्या एने दोरकस्यान वाडीमा दोखा बारथे काडीन मारीन नाखदेण्या

⁹ येशु इनान करता दरकस्पान वाडीही मालीक काय करहे च्यु आविन तिना गवादयाहा बरबाद करके एने दरकशान वाडीही बायराहा आप देहे ¹⁰ येशु तीनुहु कोयु काय तुमु पोवित्र पुस्तोकोमा नी वाच्या के ? जीना पोगडाह राज मिस्तरया रिकामु सोमजीन बारथे काड देल्लु च्यु दोगडु गोरोन पायान युवान दोगडु बोण गोयु

¹¹ यो ते पोरबु भोगवानो खेर दोखो ओयलो एने आपणी नोजरोमा खुब बांगलाये ओहलो से

¹² तेतार येशु यु दाखलु कोयलु कोरीन च्या येशु नींदरा बारामाज कोयतलु सोमजीन तीनाह दोरने कुसीस कोरया पुण च्या माणहोन गोरहीन देखीन बीतोता कोरीन च्या यीशु हु सुडीन जात रोयो ¹³ तेतार थुडाक येहुदीन पुडारी माणहे येहुदु काय बी वातोमा फोसाडनेन कोरता थुडाक फरीसी माणहे एने हेरोदिया राजान पाल ठीवालानुह येशु पाह मुकल्या

¹⁴ च्या आवीन कोया ए गुरु तु होमेस्या खोरलू से तु कुवीन पोरवाय नी कोरतलु काहा की तु माणहोन मुयु देखीन वात नी कोरतलु पुण तु माणहोन भगवानोन खोरी वात हीकाडतलु एवी तु आमुह कोय दे के आमु रोमी सोरकारोन मोटला राजा केयसरोह येदुदी कायदान रीते फावु आपणु ठीक से के नी

¹⁵ आमु फावु आपणे के नी आवजे ? पुण येशु तीदरो डोंग डावो मन जाणीन तीनुहु कोय कांहा तुमु मेहे फारोकणे कुसीस कोरतला ? एक चोंदीन रुपायु मेहे देखाडु ¹⁶ च्या एक चोंदीन रुपायु लीन आव्या एने च्यु तीनुह फुस्या इना रुपायापर कुणीन सिक्कु एने कुणीन नाव सापाय रोयोह? च्या कोया केयसर राजान से

¹⁷ यीशु तीनुहु कोयु ,"ते , जो राजान - राजा केसरयान छे , च्यों राजान - राजा केसरयाक आपीन तेरो होक पूरो कोरु "| एने ओवता च्या तेरी वात होंबीन वाहराय गया | ¹⁸ सोदुकी पोंथवाला माणहे मोरीन फोसा मोरलाम दोखा जीवता नी ओये एहे विचार कोरनारा येशु हाते आवीन कुस्या

¹⁹ ए गुरु मुसा आमरे कोरीन नेम आपलु से के जर कुण बीयाव कोरीन बीगरू पुरयान मोर जाये ते तेर लाडी एखली र रोय जाये ते मोरनारान बायह तीन रोडांयली बायी हाते बीयाव कोरे एने तेर बायहोन कोरीन पुरया पोयदा कोरणु नी जुवे ²⁰ च्या सात बायहे ओता आखान मोटलु बायह बियाव कोरीन बीगुर पुरयान मोर गोयु

²¹ कोरीन दीहरु बायह तीन रोडायली बायोर हाते बियाव कोरयु पुण च्यु जी बीगरू पुरयान मोर गयु ओवतु तीसरू बायहे बी तीनी हाते बियाव कोरयु

²² एने एंहे कोरीन सात बी बायहे तिनिहाते वीयाव कोरया , सातोन बी पुरया नी ओया आखा मोरनेन बादमा सेवलीवार ची बाई बी मोर गयी |

²³ एंवी तु आमुह कोय देजी , के जेतार मोरला माणहे जीवता ओयहोत ते च्यी कुणीन लाड़ी कवायहे ? काहाके ची सात बायहोन लाडी बोणली ओति कोरीन आमू फूसतला | ²⁴ यो होंबीन यीशु तीनुहु कोयु , तुमु माणहोन मोरनेन ओवती जुडनारी जीवायन बारामा पवित्र पुस्तोकोमा काय लेखलो च्यों बी नी जाणतला एने भगवानन ताकोतोह बी नी जाणतला कोरीन तुमु इनसेहे गलत सोमझी जातला |

²⁵ काहाके जेतार मोरला माणहे , मोरलाम दोखा जीवता ओयहे , तेतार कुणीन बी वियाय नी ओये एने वियाय मा आपाये बी नी , पूण च्या सरग मायला सोरगदुतन होस रोयहोत | ²⁶ एंवी मोरला माणहे जीवता ओयणेन बारामा जेतार भगवान मूसाह काटान जाडोमा देखायलु तेतार कोयु ," मी तार डाय डाया अब्राहमन एने इसहाक एने याकूबन परमेश्‍वर से , यो भगवानन पवित्र पुस्तोकोमा भगवान तीनाहाते वातु कोरयु च्यों तुमु नी वाचा के ? |

²⁷ च्यु मोरला माणहोन भगवान निंबेले पूण जीवतला माणहोन भगवान से इन वातोह तुमु गलत समझी रोयाह |" ²⁸ एक यहूदीन नेम हिकाडनारु मास्तर यीशु हाते सोदुकी पोंथवाला वातोमा जोखडी पोड रोयला होंबीन , च्यु यीशु हाजी हुते जोपाप आप्यु करिन समजीन च्यु यीशुह फूस्यु ," नेमोमा आखा दोखू मोटलु हुकूम काल्लु से ?|

²⁹ पूण यीशु तिनाहा एंहे जोपाप आप्यु , आखा हूकूमोम भगवानन खास हूकूम यू से के:' ए इस्राएलन माणहो ! होंबु ; आपणु प्रभु भगवान एकूज प्रभु से |

³⁰ तु तार प्रभु भगवानह तारा पूरा मन , एने पूरा जीव , एने पूरी अकल दोखू , तार पूरी ताकोत दोखू मोंग कोरजी |

³¹ एने दिहरु हुकूम यू से , के सेजरीह सोतान होस मोंग कोरजी , इना दोखू उंजु मोंटू हुकूम काल्लुज निंबेले | ³² नेम हिकाडनारु यीशुह कोयु ," होव गुरु , तु काय कोयु च्यों खोराखोर कोयु , एकूज भगवान से , तिनाह सुडीन कुण बी भगवान निंबे |

³³ एने यो खूब खास से करिन मेहे मालूम से भगवानह भार पूरा मन , पूरी ओक्कोल दखु , पूरा जीव एने पूरी ताकोद दोखा मोंग कोरनू , एने सोताह जेहे मोंग कोरतलु जेहेज सेतारीह बी मोंग कोरनू , यो होमोन बादा चोडावणेम दखा , एने दिहरा बेट चोडावणे दोखा खूब मोटा से |"

³⁴ तेतार च्यु सोमझदारीमा जोपाप आपलू देखिन यीशु तीनाह कोयु , भगवान तोहोंपर राज कोरने तु तीयारीमा से एने ओवती कुणिह बी यीशुह फूसणे हिम्मोत नी ओई | ³⁵ जेतार यीशु मोंदिरोमा हिकाडततु , तेतार च्यु फूस्यु ," नेम हिकाडनारा मोसी दाऊदन गोराणान पुरयु से करिन केंहे काय कोयतला ?"

³⁶ दाऊद तेर पवित्र जीव आत्मा म बोरायीन कोयलु से ," भगवान मारा प्रभुह कोयु , के मी तार दूस्मनोह तार पायोन नेचे नी कर देंव तांहालोगण मार जेवडीखेर बोठ !?

³⁷ दाऊद ते खुद यो कयतलु के मसीह मारु प्रभु से, ते मसीह केंहे तेर पुरयु ओय सकतलू ? एंहे कोयु ,एने गर्दी मायला माणहे तेर वात खुशिमा होंबवतता | ³⁸ यीशु तीनुहु उंजु हिकाडतु जायीन कोयु , यहूदीन नेम हिकाडानारा दोखा सोमाविन रोयजु , च्या नांबला लुगड़ा पेरिन फिरनू , एने आटोमा जाये ते दिहरा माणहे तीनुहु मान आपणु जुवे एंहे हुत्तला |

³⁹ उंजु आराधनान मा मेन-मेन जागापर बोठणु एने खाणे- पिणेन बी मेन-मेन जागे बोठणे हुत्तला |

⁴⁰ पूण च्या रोंडायला बायराह दोखू दीन ठोगिन तिंदरो गोरबार एने मालदन उजाड़ देतला , च्या धर्मी सेताहा करिन देखाड़णे नांबि नांबी प्रार्थना कोरतला भगवान अहला माणहोह खतरनाक डोंड़ आपहे| ⁴¹ ओवतु यीशु मोंदिरोमा माणहे दान आप्तला तीना जागाहाते बोठिन च्यु माणहे दान पेटिमा नाखतला देखततु , तेतार खूब पाम्तला माणहे खूब पोयहा नाख्या|

⁴² तेतार एक गरीब रोंडायली बायोर च्यांहरी आवीन ची दुय रुपायान बोंदु नाखि | ⁴³ तेतार च्यु तेर चेलानुहु हाते हादिन कोयु , मी तुमुहू खोराखोर कयोह के इन दान पेटिमा पोयहा नाखला ओता तीनु आखामा दोखी यी गरीब रोंडायली बाई आखा दोखी वोत्तो दान आपली से |

⁴⁴ काहाके या आखा इंदरा वोत्ता मालदमा दोखा आप्या , पूण यी बाई एर जीवणेन करता ज्यों काय ओतो च्यों आखोज आप देल्लि से |