¹ फसु च्यु चेहरी दोखू उठिन यहूदिया सीमा क्षेत्र एने यरदन पार करिन गोयू , एने गर्दी तीनाहाते फसी अयगयी , एने च्यु तेरी रीतिनुसार तीनुहु वात हिकावणे बाजगयु |

² तेतार फरिसियो तीना हाते आवीन परीक्षा परजावणे तिनाहा फूस्या ," काय यो हाजों से, के माणुह तेर गरवावीह छुड देय ?

³ च्यु तीनुहु जवाब आप्यु ," मूसा तुमुहु काय हुकूम आपलू से |

⁴ च्या कोया ," मूसा त्याग पत्र लेखणे , एने त्यागणेन हुकूम आपलू से काय | ⁵ येशु तीनुहु कोयु ," तुमरो मन वातड़ों से कोरिन मूसा एंहे हुकूम लेखीन आपलू |

⁶ पूण कोवि गोड्यू तेतार भगवान तीनुहु माणुह एने बाई कोरिन बोणावलु से | ⁷ कोरिन ओवतु माणुह तेर आय बाबा हाते दोखू अलग अयीन तेरी लाडी हाते रोयतलु |

⁸ एने च्या दुयूबी एकूज अयींन , इनान करता च्या दुय नी पूण एक तन अयजातला |

⁹ इनान करता इनूहु भगवान इंदरो जूडो बोणावलु से तींदरो जूडो कुण बी तुड़ी नी सकतल | ¹⁰ एने घर मा चेला इनान बारामा तिनाहा फसा फुस्या |

¹¹ च्यु तीनुहु कोयु ," ज्यों कुण तेरी लाडीही काड़ीन दुहरी लाडी हाते वियाव करे ते च्यु तिनी पेल्लि लाडीन विरोद मा सिनावों करतलु |

¹² एने जर लाड़ी तेरा माटीही सुडीन दिहरा हाते वियाव करे ते चिबि सिनावों करतली कवाये | ¹³ फसु माणहे पुरयाहा तिना हाते लावणे होंड गया , के च्यु तिनापर आथ मेके ; पूण चेला तीनुहु जुल्या |

¹⁴ येशु यो देखिन तीनुहु सोतामा कोयू ," पुरयानुहु मार हाते आवणे देवू , एने तीनुहु रुकुमा , काहाके भगवानन राज इनू पुरयान होस रोयणारा माणहोन से | ¹⁵ मी तुमुहू खोरों खर कोयोह के ज्यु कुण भोगवानन राजोन होकोमा आयतला पूरयान होस बुरहु करीन नी रोये ताहालोगण भगवानन राजोंमा कोदी नी जाये |

¹⁶ एने च्यु पूरयानुहु तेर खुवामा बोठाडीन तीनुपर आथ मेकिन तीनुहु आशीर्वाद आप्यु | ¹⁷ एने जेतार च्यु निकवींन वाटे जातोतु , तेतार एक माणुहु दोवडीन आव्यू , एने तेर ओगोव मांडा टेकींन तिनाहा फुस्यु ," ए हाजला गुरु जोलमकोज जीवाय जुडनेन कोरता मी काय कोरनु जुवे!“

¹⁸ एने येशु तिनाहा कोयु ," तु मेहे हाजू से कोरीन काहा कोयतलु ? खोरोखर भगवान ओतरुज हाजू से , फक्त भगवान से |

¹⁹ तोहों भगवानन हुकुमु मालूम से , खून जुण कोरतू , सिनावों जुण कोरतू , चूरी जुण कोरतू पूरी वात जाणे बिगुर कुणीन बारामा ठोग गोवाई जुण आपतु ठोंगतु जुण , आय बाबान आबरू राखजी | ²⁰ च्यु तीनुहु कोयु ," ए गुरु , या बोठा हुकुमे ते मी आयतु दोखू मानतु आवलु से |"

²¹ येशु तिनाहा खूब मोंग हाते बावीन कोयु , ताराम उंजु एक वातोन कोसोर से , जा एने ज्यों काय तोहोंपर से च्यों आखों वेचिन गोरीबोह आप दे , तेतार तोहों होरगोंम मोंग मालदन जुड़हे एने आविन मार फ़ोसव अयजाय |

2

²² इन वातपर च्यु मुय उतार लेदयू , एने जात रोयू ; काहाके च्यु खूब पाम्तलु ओतु | ²³ येशु चारुमेर बावीन तेरा चेलाहा कोयु , मालदन वालाहा भगवानन राज्य मा बरायणु वार कठीण सेतह |

²⁴ चेला तेरी वातु होंब्बीन बोंगलया , इनापर येशु फसु तीनुहु कयु ," हे पुरया ज्यों धन पर बुरहु करतला तीदरेन करता भगवानन राज्य मा बरायणु कहल कठींन सेतह |

²⁵ भगवानन राज्य मा पाम्तला माणहे भगवानन राजोमा जाणेम दोखा ऊटडाह हुयीन नास्कामा सोरकणु सोपो से | ²⁶ च्या मजबूत बोंगलायिन तिंदरे तिंदरे कयणे होंड्या , ते मंग कुणीन उद्धार अय सकतल से |

²⁷ येशु तिनुखेर बावीन कयु ," माणहोह ते य नी अय सकतल से, पूण भगवान आखोज कर सकतलु |

²⁸ ओवतु पतरस तिनाहा कोयणे बाज गयु , बाव , आमू ते आखो सुडीन तार फसव आव लागला से | ²⁹ येशु तीनुहु कोयु ," मी तुमुहू खोराखोर कोयतलु के ओहल कुण से ज्यू मार करता एने हाजी खोबर देखाडनेन करता , घरे , बायहे बोणहया , आया बाबा एने पुरया एने खेत सूड देन्यू ओहे ते |

³⁰ जरुड इनी कोविमा तीनुहु एक होव गुणा घर , बायहे बोणहया , आय बाबा , पुरया , खेते जुड़ जाहे , पूण इनूहु आखा माणहो दोखो दुख बी वेठणु पोडहे ते आवणे वाली कोविमा अमर जीवाय बी जुड़हे |"

³¹ पूण वारु होंवटा ज्या एंवी ओगोव से च्या फोसोव ओय जाहे , एने ज्या एंवी फोसव से च्या ओगोव ओय जाहे | ³² एने च्या यरुशलेंम सेहर मा वाटे जातता , एने येशु तिंदरे ओगोव चालतता जाणे बाज रयू अतु चेला बोंगलाय रोया ओता , एने दिहरा माणहे गाबरता जायीन तेर फोसोव गोया येशु बारा चेलाहा एक वोगु ली गोयु , तीना हाते काय काय वीतहे च्यी वात तीनुहु कोयाप्यु |

³³ होंबु आपू येरुशलेम जाणे बाज रोया , एने माणहोन पूरयाहा डायला पुजारा एने नेम हिकाडनारान आथोमा होपणेमा आवहे , एने च्या मोतोन डंड आपे ओहल गुनावालु ठोरावहे , एने च्या बिगुर येहदी जातीवावान आथमा होप देहे |

³⁴ एने च्या तेरी मोजाक उडाडहे , एने तिनापर थुपहे , एने चपका करीन देहे तिनाहा कुरुस खांबापर चोंडावीन खिला ठुकीन मार नाखहे एने पूण च्यु तीसरे दिही फोसु जीवतु ओय जाहे | ³⁵ तेतार जब्दीन पुरयु याकूब , एने यूहन्ना यीशु हाते आविन कोया " ए गुरु , आमू हूत्तला के आमू तोहोपार काय बी मांगहु ते च्यों तु आमरे करता कोरजी |

³⁶ च्यु तीनुहु कोयु ," तुमुहू काय जुवे के मी तुमरेन करीन मी काय करनू जुवे |

³⁷ च्या तिनाहा कोया ,आमुहू यो आप के तारी महिमा मा आमू मायीन एक तारे जेवड़े सायटे एने दिहरु तारे डाखरे सायटे बठे | ³⁸ येशु तीनुहु कोयु ," तुमु नी जाणतला के तुमु काय मांगने बाजरया मी ज्यों दुखोन पियालों पीनेवालु से च्यों पियालों तुमु पी सकतला के , एने मी दुखोन बपतिस्मा लेने वावू से च्यों बपतिस्मा तुमु ली सकतला के |

³⁹ च्या कोया ," आमू कर सकतला |" पूण येशु तीनुहु कोयु ," होवतुमु खोरोंखोर मी केहेक दुख वेठण्यु तहलों तुमु बी दुख वेठहोत काय , एने मी जेहे दुखोन पियालों पिणे से च्यों तुमु पीहोत काय , ज्यों दुखोंन बपतिस्मा मी लेने से च्यों तुमुहू बी लेणु पडहे |

⁴⁰ पूण कुण मार जेवड़ी खेर बोठहे एने कुण मार डाखरी खेर बोठहे कोरिन मारो होक निंबे भगवान जिनुहु च्यांहरी बोठणे तीयार कोर रोयूह च्याज च्याहरी बोठ सकतला | ⁴¹ यो होंबविन दोस चेला याकूब एने यूहन्ना यी वात होंब्या ते तीनुहाते खोताय गया |

⁴² कोरिन येशु तेर हाते तीनुहु आखाहा हादीन कोयु ," तुमु यो जाणतला से के भगवानो पर बुरहु नी करनारा दिहरी जातिनं माणहोन विस्मा राज कोरनारा नावलायलायला मुखी सोतान माणहोपर होक जोमाड़ीन राज कोरतला , एने तीनु होक जोमाडनारापोर ओवि दिहरा मोटला पूडारया होक दाबीन जोमाडतला | ⁴³ पूण तुमु तिंदरे होस नी कोरनू जुवे , ज्य कुण तुमरे मा मोंटू बोणने हुदतलु च्यु दिहरान पावोर बोवणु पोडहे |

⁴⁴ एने तुमरामा ज्यु कुण मुखी बोवणे हुदे , च्यु आखा माणहोन गुलाम पावोरोन होस चाकरी कोरनू जुवे

⁴⁵ काहाके माणहोन पुरयु , सोतान सेवा चाकरी कोरावाने नी , बाकिन सोता दिहरान सेवा चाकरी कोरने एने खूब होंवटा माणहोन जीव वाचड़नेन करीन तेर सोतान जीव आपणे आवलु से | ⁴⁶ च्या यरीहो मा आव्या , एने जेतार चेहरी तेरा चेला एने एक होंवटी माणहोंन गर्दी यरीहों दोखी निकव रयि अती तेतार तिमाईन पुरयु बरतिमाई एक आंधवो भिखारी , सड़कन मेरे बठरय अत |

⁴⁷ च्यु यो होंबविन के यीशु नासरी से आयडिन कोयणे बाज गयु "हे दाऊदन ओवल्याद मेहेपर कीव कर |"

⁴⁸ खूब माणहे तिनाहा किचवाईन कोया , ठावकू रोय " पूण च्यु फोसु मोठे आयोडने बाज गयु ," ए दाऊदन ओवल्याद मेहेपर कीव कर |" ⁴⁹ तेतार तेर आवाज होंबिन येशु उबरोईन कोयु ," तिनाहा यांहरी बुलाऊ " एने माणहे तीन आंधवाह हादिन कोया , हिममोत राख , उठ , येशु तोहों हादेह|"

⁵⁰ च्यु तेर उपोरला लुगड़ा नाखीन जल्दी उठयू , एने यीशु हाते आव्यू | ⁵¹ येशु तिनाहा फूस्यु ," तार करता मी काय करनू जुवे , आंदवु तिनाहा कोयु , ए गुरु मी देखणु जुवे |"

⁵² येशु तिनाहा कोयु ," तु जा , तार बुरहु तोहों हाजू करलु से एने लगेच च्यु देखणे बाज गयु एने येशुन फसोव जाणे बाज गयु |