¹ जेतार तुमुह मोसी हाते मोरलामा दोखु जीवाडयु ,ते तुमु ज्यो काय सोरगोमा से,तीना पोर आसा राखीन हुदता रोयु ,कोरीन मी तुमुह कोयतलु।(मती ६:२०)

² दोरती पोरला चीजोपोर नी, पुण सोरग मायली चीजों पोर मोन लागाडु।

³ काहाके तुमु जाणतला के जेतार यीसु मरोलु तेतार दोखी तुमरी पाप कोरनेन इस्या मोर गोयली से,तुमरी नोवली जीवाय यीसु हाते बोगवानोमा निकायली से ।

⁴ यीसु मोसी ज्यू खोरी जीवाय आपणारु से,जेतार च्यु दोरती पोर फोसु आवहे ,तेतार बोगवान तुमुह बी आखान ओगोव मोसी हाते ,एने तेर मोहीमा हाते देखाडहे । ⁵ कोरीन इन दोरती पोरला तुमरा जीवाय मा इना जुनला लीकायीन रोयणारा पापोन सोबावह पुरी रीतै दोखा सुड देवु सीनावो जुण कोरता,चुगली जुण कोरता ,खोराब कामोन इस्या जुण कोरता,खोराब काम कोरनेन हाय हाय जुण कोरता,बोगवानोन नींगामा मुरती पुजा हीगीह आवे ओहलो पाप से ओहलो हाय हाय कोरनारा जुण बोणता ।

⁶ इन सेहला खोराब काम कोरनारा पोर बोगवान सोंताप कोरीन तीनुह खोतरनाक डोंड आपहे ।

⁷ यीसु बुरहु कोरनेन पेल तुमु बी ओहलो खोराब कामे कोरीनुज जीवतोता ।

⁸ पुण एवी तुमु तोहलो काम तुमरामा दोखा सेटा कोर सोतांप मा कोरु खोतायणू नी ,खोर नी राखणु ,दीहरान नाव बोंदी नी कोरणु ,गोंदी वात वापरीनुनी ,जुलनु नी । ⁹ एक दीहरान झुठ नी बुलणु ,तुमरी जीवायमा जुनली खोराब टेम सोतान डीलोमा दोखा काडीन नाख देल्ला से ।

¹⁰ तीनामा तुमु नोवला माणहे बोण गोयला ,आपुह बोणावणारा बोगवानोन होस पुरान पुरु ओक्कोल वावा बोणनेन कोरता, तुमु नोवलो रुप पेर रोयला से ।

¹¹ इनामा नी युनानी रोये ,येहुदी रोये नी ,चामडो कातोरनेन रीत रोये ,नी बोयडान ,नी गुलाम ,नी पावोर मोटी वात यी से के आखा यीसु मा एक ओय गोयला से,एवी इदंरामा काय बी सीट नी रोये,पुण आखान आखा मोसीमाज से। ¹² कोरीन तुमुह बोगवान नीवाडीन पोवित्र कोरलु से,एने च्यु तुमुह मोंग कोरतलु ,कोरीन तुमु एक दीहराह कीव कोरजु ,एने दुहरा हाते खूब दोया हाते रोयजू ,नीचोवा बोणीन रोयजु आखान हाते सांतीवार जीवजु ,एने दीर राखजु ।

¹³ तुमरे विस्मा काय बी वातोन मोन मुडाव ओय जाये ते वेठीन रोयु ,जेहे पोरबु मोसी तुमरा पापहा माफ कोरलु ,तेहे एक दीहराहा माफ कोरजु ।

¹⁴ आखा दोखी मोटी वात यी से,के तुमु ओंवा सोंवा मोंगोमा वेवार कोरजु ,काहाके मोंग कोरनेमाज आखाह ,एकामाज मीवायन पुरान पुरु पोक्का कोरे । ¹⁵ आखा मोसी मा सांतीवार रोयणे ,तुमरो एकुज डील से, कोरीन सांती तुमरा मोनमा रोये ,एने होमेस्या तुमु दोन्यवाद कोरता रोयु ।

¹⁶ मोसीन बारामायली हाजी वात तुमरा मोनमा,एने जीवायमा पुरीन पुरो रोयणे देवु,एक दीहराह यीसुन बारामा ओक्कोल हाते हीकाडजु,एने ओक्कोल हाते एक दीहरान गोलती सोमजु बोगवानोन गीते गावजु ,एने तेरी इस्तुती कोरजु बोगवानोह दोनयवाद कोरता तुमरा मोनमा गावजु ।

¹⁷ ज्यो काय तुमु बुलतला ,एने ज्यो काय तुमु कोरतला ,पोरबु यीसुन नावलीनुज कोरु ,तीना दोखा होमेस्या आपणा बाह बोगवानोन दोन्यवाद कोरु। ¹⁸ ए लाडी तुमु पोरबुन वात मानीन रोयतला, तेहेंज तुमरा माटीन वात मानीन रोयजु ।( इफिस्सीयो ५:२२)

¹⁹ ए माटी तारी लाडी पोर मोंग कोरजी ,तीनी हाते काटु वेवार जुण कोरता।

²⁰ ए पुरया तुमु आपणा आपणा ,आयी बाब कोयतला ,च्यो आखो तुमु कोरजु ,यो पोरबुन मोरजी से।

²¹ ए आय बाबा होमेस्या तुमरा पुरयाह कीदरावता जुणी ,जोर तुमु ओहलो कोरहे ते ,च्या तीदंरा मोनमा,नाराज ओय जाहोत । ²² ए गुलामा पावरोनु तुमरा दोरती पोरला मालकोन आखी वात मानीन चालनुज पोडहे ,च्या तुमुह बावतला ,कोरीन तीनुह पोटाडनेन कोरता चाकरी कोरनेन डोंगडा जुण कोरता,पुण बोगवानोन बीक राखीन ,एने पुरा मोन दोखा तीदंरी वात मानीन रोयजु ।

²³ एंहे सोमजीन ज्यो काय काम तुमु कोरतला ,च्यो पूरो मोन ,एने जीव लागाडीन काम कोरजु ,माणहोन कोरता नी ,पुण पोरबुन कोरता कोरजु ।

²⁴ तुमु मालक मोसीहान सेवा चाकरी कोरतला , कोरीन ओर कोरजु आपणु पोरबु यीसु तुमरा वेवारोन इसाबे दोखु इलाम आपहे ,एने च्यु तेर माणहोह आपणे कोरीन वायदु कोर रोयुह , च्यो आसीरवाद तुमुह आपहे ।

²⁵ ज्या माणहे गोलोत वेवार कोरता रोयतला ,तीनुह गोलत वेवारोन इसाबे फोव जुडहे ,बोगवान नियाव कोरनेन टेमे बेदबाव कोरनारु नींबे।