¹ मी तुमरे कोरता एने लोवदीकीया सेहरोन मोंडलीन माणहोह कोरता ,एने दीहरान विस्वासी माणहोह मी उंजु ,लोगोण नी मीवायु तीदंरे कोरता बी मी कोतरु मेहनोत कोरतलु ,च्यो तुमु जाणुनु जुवे, कोरीन मी इस्या कोरतलु ।

² तीदंरे मोनमा हिम्मोत राखीन आखा हाते मोंगोमा रोयणे ,पोक्की आसा हाते ,एने आखा खोजानान होस पुरी सोमजहोत च्या बोगवानोन लीकायली वात मोज यीसुन बारामा जाणनेन ओनबोब तीनुह ओयणु जुवे, कोरीन मी एहे कोरतलु ।

³ यीसु माज आखी बातीन ओक्कोल, एने सोमजोन खोजानो लिकायलो से। ⁴ कुण बी माणुह कोदराये पोटाडीन तुमह दोकु देणु नी जुवे ,मी यो तुमुह कोयतलु ।

⁵ मी डीलोन इसाबे तुमु हाते दोखु सेटु रोयतलु,ती बी मार जीव तुमरा बारामा होमेस्या ओर कोरतु रोयतलु ,एने तुमु यीसु पोर पोक्कु बुरहु कोरता रोयतला ,एने एखठा रोयतला कोरीन मी खुब खुस से। ⁶ एने एवी जेहे मोसीह यीसु तुमरु मालीक से, कोरीन मान लेदला ,तेहे बुरहु कोरता जायीन तीनाहाते एखठा रोयीन जीवाय जीवु।

⁷ जाडोन मुवाडा केहेक दोरती मा उंडु जातला ,तोहलो तुमु बी यीसुन वातोमा उंडा जायीन तीनामा वोडता जावु ,एहे तुमह हीकाडला से, तीना बुरहान तुमु पोक्का ओयता जावु ,ज्यो काय बोगवान तुमरे कोरता कोरलु तीना आखान कोरता बोगवानोह दोन्यावाद कोरजु । ⁸ सोमावीन रोयजु के ,कुण बी तीदंरा वीचारोपोर तुमुह बुरहु कोरावीन दोकु नी देणु नी जुवे,च्या यीसुन बारामायली खोरी हीक नी हीकाडतलु,पुण च्या रिकामी वात हीकाडतला ,एने डाय डायान रीती बातीन ,एने कोवीन नेम मानने जोर फोसोव कोवी गोडायणेन ,एने भोक्तीन बारामा भुतडु एने जोम दोखा मोन गोडया काहण्या दोखो ,च्या माणहोह हीकाडतला ।

⁹ यीसु बोगवानोन आखा गुणे पुरान पुरु बोरयला से। ¹⁰ तुमु यीसु ज्यु आखा राज चालाडनारापोर ,एने होक जोमाडनारान मुखी से,तीनाहाते तुमु एखठा रोयतला कोरीन आत्मीक जीवायोन कोरता तुमु पुरान पुरु पोक्का ओय गोयला से।

¹¹ तुमु यीसु हाते मीवीन रोयतला ,कोरीन तुमु चामडो कातोरनेन रीत कोर लेदला, च्ये माणहे बोणावला कातोरनेन रीत नींबे , पुण यीसु बोणावलु चामडो कातोरनेन रीत दोखो से,च्यो यीसु मोसीज ज्यु तुमरामा दोखा पाप कोरनेन डीलोन इस्या ओती तीन दोखु तुमुह सुडाव लेदलु ।

¹² जेतार तुमु बापतीस्मा लेदला ,ते जेहे यीसु मोरीन डाकाय गोये ,तेहे तुमरु पाप कोरनेन सोबाव बी डाकाय गोयु ,एने तुमु बी तीना पोर बुरहु कोरतला कोरीन आखा दोखी ताकोत वावु बोगवान ,ज्यु तीनाह मोरलाम दोखु जीवतु कोरलु ,च्युज तुमुह बी बापतीस्मा रितमा यीसु हाते जीवतु कोरलु से । ¹³ तुमरा पापोन कोरता , एने डीलोन पापोन सोबाव काडीन सेटा नी कोरला ओता ,तीनामा तुमु तुमरा पापोम मोरला ओता , पुण एवी बोगवान तुमुह यीसु हाते जीवणेन जीवायमा लाव रोयुह ,एने बोगवान आपणा आखान पापोन माफ कोर देल्लु।

¹⁴ आपु नेम तुडीन खुब गुनु कोरला ओता,च्यो कोरजान होस ओतो ,आपणा गुनान कोरजान चापडामा लेखायलो ओतो ,च्यो चापडो आपणा वीरुदमा उबरोयीन आपणो वाको काडतोता,पुण बोगवान आपणा पापे माफ कोर देल्लू,एने जेतार यीसु मोरलु ते आपणा कोरजान चापडाह कुरुस खांबा पोर ठुकीन सोत्यनास कोर देल्लु।

¹⁵ पुण च्यो आपुपोर आदीकार कोरलो बुतडान ताकोतोह बी जीक लेदलु ,एने कुरुस पोर मोरलु तीनामाज बुतडाह आरायन्यु ,एने आखान ओगोव लाजवाड देल्लु । ¹⁶ माणहे ज्या चीजे तुमुह नी खाणो ,नी पीणो कोयतला , एने काय काय दोरमोन तीवारे वावणेन बारामा पुनोव वावणेन बारामा आरामोन दीही पावणेन बारामा माणहे तुमु पोर गुनु लागाडतला ,तीन वातोपोर दयान जुण लागाडता ।

¹⁷ काहाके या आखा नेम पावणारा यीसु सा्हवु से,पुण मोसीज से। ¹⁸ एने कुण बी नोमीन रोयतला ,तेहे च्यु डोंगडा कोरीन सोरगोन पूजा कोरने तुमुह लागाडे ,एने च्यु माणुह एक जागतो हीवणो देखलु ,कोरीन बोगवानोन बारामा खास ओक्कोल मेहे पोर से, कोरीन सोतान बारामा कोये ,एने तेर मोनोम धोखा नीकोवणारा खोराब वीचारे दोखु ,च्यु मोठाय कोरे ,तुमु तेर वाये जुण लागता ,जो तुमु तेर वाये लागहोत ते बोगवान तुमुह वायदु कोरलु ,च्यो इलाम जुडने दोखा रोय जाहोत ।

¹⁹ यीसु मोसी आपणो मुनको से ,तीनाहाते तेरा डील मोंज तेर मोंडलीन माणसे जुडायला से,जेहे तीना दोखो आखो डील आटका दोखो माहा गुथायीन नोस सोत खुतायीन पुहायतलो ,तेहेज आत्मान जीवायमा वोडातला ,एने बोगवानोन मोरजी पोर वुहायतलो तो सुडीन काल्लु बी माणुह मंडका हाते यीसु हाते जुडायला नी रोये ,ते च्यु यीसु बारामायली खोरी हीकोपोर बुरहु कोरने एने हीकाडने सुड देतलु । ²⁰ जेतार मोसी मोरलु तेतार तुमरी जुनली जीवाय यीसु हाते मोर गोयली ,ती तुमु इनी कोविन मोन गोडया हीकोहो दोखा जोलमका एक वोगा ओय गोयला से,ती बी इनी कोविन माणहे तेह काहा जीवतला तुमु ईनी पापी कोविन से,एने इनी कोवीन पाब्वी पावणे बाज रोयहा।

²¹ यो जुण दोरतु ,पोलो जुण खाता,इन चीजोह हात जुण लागाडतु तीनापोर दयान जुण देतु ।

²² या आखा कामोम लावता लावता सोत्यनास ओय जाहे ,काहाके या आखा माणहे बोणावला नेम ,एने हीक से।

²³ इनसेहली हीक सोतान मोरजी दोखी भोक्तीन रीत ,एने वीगुर नीचोण्वा ,एने सोतान डीलोह बोवजोबरी वेला पाडावेमन रीत पावतला ,च्यी ओक्कोल वावी ओहलो लागतली ,एने सोतान डीलोह ओतरोज सोमावहे ,पुण खोराखोर डीलोन पापोन इस्या रुकणेन रीतोमा कायीज फायदु नींबे ।