2 कुलुस्सि सेहरोमा रोयणारा बोगवानोन पोवित्र बायह एने बोणहान कोरता ,एने यीसु मोसी खोरा रोयणारान कोरता ,मी तुमुह मी चिटठी लेखतलु,आपणु बाह बोगवान एने पोरबु यीसु मोसी खेर दोखी दोया ,एने सुख सांती तुमु आखाह जुडती रोये।
3 जेतार बी आमु तुमरे कोरता बोगवानोह पोरथना कोरतला ,ते आपणु पोरबु यीसु मोसीन बाह बोगवानोन दोन्यवाद कोरतला । 4 काहाके आमु होंब्या के तुमु यीसु मोसी पोर बुरहु कोरतला ,एने तुमु बी बोगवानोन आखा पोवित्र माणहोनुह मोंग कोरतला।
5 बोगवान तुमरे कोरता सोरगोमा जागू तीयार कोरीन सोमावीन मेकी रोयुह ,तीनाहा आसीरवादोन कोरता तुमरा मोनमा खुब बुरहु कोरीन आस्या हाते वाट जुवता रोयतला ,जेतार माणहे तुमु पाह पेलेन आवीन यीसु मोसीन खोरी वातोन बारामा देखाडया ,तेतारेन तुमु तीनी हाजी खोबोरोन बारामा होंब्या ।
6 तुमु जेहे होंबोवला , तेहेज यीसु मोसीन खोरी वातोन हाजी खोबोर आखी कोविमा पुचणे बाज रोयीह ,एने जेतार पेल्लीवार तुमु यी हाजी खोबोर ,एने बोगवानोन खुब बारी दोयान बारामा होंब्या,एने सोमजीन जेहे तुमरी जीवाय बोदली गोयी,तेहेज माणहोन जीवाय बी बोदलीन आखीखेर फोव लावणे बाज रोया । 7 मारु हातीह पावोर इपोफारास यी हाजी वातोन हीक तुमुह हीकाडयु ,च्यु बी आमरे होस मोसीन सेवा कोरलु , एने आमु तीनाह मोंग कोरतला,तुमरे विस्मा आमरे बोदले ,च्यु खोरु एने इमानदार रोयीन मोसीन सेवा कोरलु।
8 एने बोगवानोन माणहोह खुब मोंग कोरने पोवित्र आत्मा तुमुह मोदोत कोरली कोरीन इपोफरास आमुह कोयलु ओतु। 9 आमु तुमरा बारामा हाजी खोबोर होंबोवला ,तेदिह दोखाज तुमरे कोरता पोरथना कोरता आवतला ,तुमरी जीवायमा बोगवानोन इस्या काय से, च्यु सोमजणेन ओक्कोल तुमुह आपणु जुवे ,एने तेरा पोवित्र आत्मा ओक्कोल एने सोमज तुमुह जुडनु जुवे ,कोरीन आमु बोगवानोह रावण्या कोरता आवतला ।
10 तुमु जेहे जीवाय जीवतला तीनामा पोरबु बोगवानोह पोटे ओहली जीवाय जीवणू जुवे, एने तेरी बोडायी ओयणु जुवे, एने तुमरी जीवायमा आखी बातीन हाजा कामे कोरता रोयणु जुवे, एने तुमु बोगवानोह उवोखणेमा उजु वोडता जाणु जुवे, कोरीन आमु उंजु बी तुमरे कोरता बोगवानोह पोरथना कोरतला। 11 बोगवान खुब ताकोत वावु से, कोरीन आमु पोरथना कोरतला, के बोगवान तुमरी आत्मामा आखी बातीन होवटी आपतु रोये , तेतार तुमरी जीवायमा दुःख आवे ते तुमु खुसीमा दीर दोरीन दुःख वेठहोत।
12 आपणु बाह बोगवान सोरगोमा ज्यो उज्यावान राज से,च्याहारी तेर पोवित्र सोतान माणहोन कोरता वाटु तीयार कोरीन मेक रोयुह ,च्यो आपणे तुमुह नीवाड रोयुह कोरीन तुमु तेरा दोन्यवाद कोरता रोयजु । 13 बुतडु ज्यु आंदारली दुनिया पोर राज कोरनारु से,तेर खोराब काम कोरनेन ताकोत दोखु बोगवान आपुह वाचाडलु से,बुतडान ताकोत दोखु वाचाडीन ओवतु ,बोगवान तेरा लाडका पुरया यीसु मोसीहोह आपुपोर राज कोरणे लागाडलू ।
14 आपणा पापोन डोंड बोरनेन कोरता ,बोगवानोह पुरया यीसु मोसी तेरा लुयो कोरीन डोंड बोर देल्लु ,कोरीन बोगवान आपुह बुतडान ताकोत दोखा सुडावीन आपणा आखा पापोह माफ कोर देल्लू से। 15 मोसी वीण देख्या बोगवानोन खोरलु रुप से,होव यु यीसु कोवी गोडायणेन पेलेन ओतु,एने आखा गोडायला चीजो दोखु मोटलु मालक से।
16 बोगवान यीसु मोसीहोह लागाडीन सोरग मायलो आखो, एने दोरती पोरलो बी आखो बोणावलु आपु ज्यो देख्या ,एने वीण देख्या इनु आखानुह ,एने राजगादी ,एने माणहोपोर राज चालाडनारा ,एने पुडारीनुह बोगवानुज बोणावलु ।
17 काहाके बोगवान आखा चीजो गोडणेन पेलेंन यीसु मोसी ओतु , एने कोवी मायला आखा गोडायला चीजें तीन दोखा टीकिन रोयतला । 18 यीसु मोसी मोंडलीन मुंडको से,मोंडली तेरो डील से, च्युज सुरुवात से,ज्या मोरलाम दोखा जीवता ओयणाम आखा दोखु च्युज मुखी से, कोरीन च्युज आखा दोखु पेल्लु से।
19 जेतार यीसु मोसी माणुह बोणीन आवलु ते ,बोगवान बाबु सोतान आखा गुणोबेव यीसु मोसी मा पुरुन पुरु वोहणे नोक्की कोरयु ।
20 । बोगवान बाबु तेरा पुरयु लागाडीन आखी कोवी, तेरा हाते फोसु लावणे बोजोट लागाडलू ,एने तेरा पुरयु यीसु मोसी कुरुसोपोर मोरिन लुय वोयाडलु कोरिन बोगवान सोरग मायला , एने दोरती पोरला आखा चीजें तेरा हाते फोसु मिवाड देल्लु । 21 तुमु यीसु मोसी पोर बुरहु कोरनेन पेल तुमु बोगवानोन दुस्मोन ओता ,ऐने बोगवानोन दोखा सेटा रोयताओता ,तुमरा मोनमा बोगवानोन विरुद्ध खोराब विचार कोरताओता,काहाके तुमु खोराब काम कोरता रोयला ।
22 पुण तेरा पुरयु यीसु मोसी माणुह बोणीन आवलु,एने तेरा डीलोन मोत वेठयु कोरीन ,एवी बोगवान तुमुह तेरा ओगोव पोवित्र ,एने बीगुर डागोन ,एने बीगुर गुनावावा बोणावणेन कोरता एखठु कोराव देल्लु ।
23 पुण तुमु बोगवानोन इनी हाजली खोबरोपोर पोक्कु बुरहु कोरता रोयजु ,एने बुरहान पायापोर टीकीन रोयजु ,जीनी बोगवानोन हाजली खोबर सोरगोन नेडो ,एने आखी दोरती पोर माणहोह मी हाजी खोबोर पोरचार कोरने मी पोवलुस बोगवानोन पावोर बोणलु से। 24 मी जाणतलु के ज्यो काय याहांरी जेलोम मी दुःख वेठतलु ,च्यो तुमरा फायदान कोरता से, कोरीन एवी मी मारा मोनमा खुब खुस से,मोंडली मायला माणहे ,ज्या यीसु मोसीन डील से,तीदंरे कोरता मोसी काल्ले रिते दुःख वेठतलु,तोहलो मी बी दुःख वेठीन च्यी कोसोर पुरी कोरतलु ।
25 बोगवान मेहे मोंडलीन माणहोह सेवा कोरनेन कोरता ,एने यीसु मोसीन बारामायली वातोह पुरी रीते तुमुह हीकाडनेन कोरता ,मेहे नीवाडी रोयुह यो तुमरा फायदान कोरता से।
26 बोगवान खुस खोबोर च्यी लिकायली बोजोट ज्यी वारुज सालोन कोरता ,एने वारुज पीडी लोगोन लीकायली रोयली ,पुण एवी च्यी तेरा पोवित्र माणहोनुह देखाड देल्लु से ।
27 ज्या येहुदी नींबे ,तीनु वाटु बोगवानोपाह खुब हाजो मोहीमा लिखायलो बोजोट ओतो ,ज्या येहुदी नींबे,तीदंरे विस्मा बोगवानोन बुरहु कोरनाराह बी बोगवान च्यी खुब हाजी मोहिमान लिकायली बोजोट देखाडणे विचार कोरलु मोसी ज्यु मोहिमान आसा से,च्यु तुमराम रोयतलु , यो ज्या येहुदी नींबे तीनुह बी देखाडनेनुज बोगवानोन मोहीमा मा तुमरु से। 28 कोरीन आमु मोसीन बारामायली वात आखा माणहोनुह कोयतला ,एने आखा नुह सोमजाडतला ,एने आखा नुह बोगवान आमुह आपलु ओक्कोल हाते हीकाडतला , आमरी इस्या यी से, के जेतार च्या यीसु ओगोव उबरोयतला ,ते आमरी हीकोमा आखा माणहे मोसी पोरला बुरहान पोक्का ओय सोकतला ।
29 माणहे यीसु पोर बुरहु कोरनु जुवे,कोरीन मी खुब मेहनुत कोरतलु ,यीसु माराम ताकोत हाते काम कोरतलु ,एने मी आखा माणहोह बोगवानोन हाजी खोबोर पोरचार कोरनेन कोरता बोगवान आपतलु ,आखी ताकोत वापोरतलु ।