¹ ए मालको ,तुमरु बी सोरगोमा एक मालक से, कोरीन जाणीन तुमरा पावरो हाते नीयाव हाते हाजी हुते वेवार कोरजु । ² तुमु पोरथना कोरता रोयजु , एने पोरथना कोरनेन टेमे तुमु जागता रोयजु , एने होमेस्या बोगवानोन दोन्यवाद कोरता रोयजु ।

³ जेतार तुमु पोरथना कोरतला, ते मोसीहीन बारामायली लिकायली वात ज्यी पेला वारान माणहो नी सोमज्या ,च्यो कोयणे बोगवान आमुह खुब सोंदी आपणु जुवे , कोरीन तुमु पोरथना कोरजु ,यी वात मी देखाडलु कोरीन मी एवी जेलोमा से।

⁴ मेहे जोतरो बोणे तोतरो माणहो सोमजे ओहलो मी खुब माणहोह वात देखाडणे मार कोरता पोरथना कोरजु। ⁵ समयोह हाजो सोमजी कोहे,के तीनुहाते रोयणेन टेमे तुमु ओक्कोल हाते वेवार कोरजु।

⁶ एकेकोह काल्ली रीते जोपाप आपणु जुवे , कोरीन तुमु जाणनेन कोरता तीनु हाते होमेस्या दोया हाते बुलजु ,एने होंबे हारकी वात कोरजु । ⁷ जेतार तुरवीकुस मोंडलीमा आवहे ,ते च्यु याहरी मारहाते काय काय ओयलो ,च्यो आखो तुमुह कोयापहे ,च्यु मारु लाडकु बायह , एने पोरबुन इमानदारी पावोर से ।

⁸ मी तीनाह मीवायणे कोय रोयुह,तीनामा तुमुह मालुम ओय जाहे के आमु केहेक सेवा कोरला ,ऐने उजु जेतार च्यु तुमुपाह आवहे, तेतार च्यु तुमरा मोनह हिम्मोत आपहे।

⁹ तीना होत उनेसीमुस बी आवहे,उनेसीमुस यीसुमा आमरु लाडकु बायह, एने इमानदार से , एने च्यु तुमराज सेहरोन से, च्या दुय जोणो याहरी आमु होत काय ओयलो ,च्यो आखी तुमुह कोयापहे। ¹⁰ आरीसतरखुस ज्यु मार हाते जेलोम से, एने मोरकुस ज्यो बोरनबासोन बायही लागतलु ,जोर च्यु तुमु पाह आवहे , ते तेर आवबाव कोरजु ।

¹¹ यीसुवा जीनाह युस्तुस बी कोयतला ,च्यु बी तुमुह जय यीसु कोयतलु ,ज्या पेल्ला चामडो कातोरनेन रीत, च्या बी मारहाते बोगवानोन राजोन बारामा दीहराह वात देखाडनेन सेवा कोरतला ,च्या मेहे खुब आसरु आपला। ¹² इपोफरास ज्यु तुमरा सेहरोन से,च्यु बी तुमुह जेय यीसु कोयतलु ,च्यु यीसु मोसीन सेवक से ,एने च्यु तुमरे कोरता होमेस्या पुरो मोन लागाडीन पोरथना कोरतलु बोगवान तुमुह आत्मान ताकोत आपहे , के तुमरे कोरता बोगवानोह इस्या काय से ,तीनु आखामा तुमु पुरान पुरा पोक्का ओयणु जुवे, कोरीन च्यु पोरथना कोरतलु ।

¹³ मी गोवायी आपलु ,के च्यु तुमरे कोरता एने लोवदीकीया सेहरोन माणहोन कोरता, एने हीचरपुलीस सेहरोन माणहोन कोरता बी खुब मेहनुत कोरीन मोदत कोरतला ।

¹⁴ मारु लाडकु लुका ,ज्यु डाकटोर से,च्यु तुमुह देमास बी तुमुह जय यीसु कोयतलु। ¹⁵ लोवदीकीया बायहे,एने नुमफासोह एने तेर गोरमा मोंडली मायला आखानुह जेय यीसु कोयतलु।

¹⁶ यी चिठ्ठी वाचीन देखाडजी, एने लोवदीकीया सेहरोन मोंडली मायलान कोरता ली मुकोलतलु ,तुमु बी च्यी चीठ्ठी वाचजु।

¹⁷ आरखीपुसोह कोयजु के पोरबु तीनाह होपलु ,च्यी सेवा सोमावीन पुरी कोरे। ¹⁸ मी पोवलुस मार आथो कोरीन लेखीन तुमुह जेय यीसु कोयतलु ,मी कुंडवाडामा से यो ओर कोरजु, एने मार वाटु पोरथना कोरजु मी पोरथना कोरतलु ,के बोगवानोन दोया तुमुह जुडती रोयहे ।आमीन।