¹ Nâyx zanyf, Toix lanh cloon Njâuv Zâu Yê-su songc mengc săngh, Six max zuc tingc Stoif.” ² Wâyc zuc Singx-lingh nyăngz gâyf, six phunz yaz cloon Njâuv Zâu Yê-su songc mengc săngh woax hungđ gâyf, Phunz yaz hayh gâyh đutb Stoif nyăngz gâyf, cloon zuc tayc nyăngz gâyf. ³ Wâyc zuc bamh munh đoonh nzongf, đoouc lif âyf yâuc ayx seetb laiv hungđ, Six Tênb-Hungh Bêc ayx săngh nzuf Đooub-lic gâyf ayx max tuz nyăngz dlayc, Nănh paiđ nănh yăngz toonz taih tauv bamh canz, Stengb pênx Bamh Munh, Năngđ Stoif-munh nyăngz Stynb nâyx, Nănh nyăngz toonz tayc wâyc tayv pănh nyăngz Stoif, Tênb-Hungh phunz nănh tayc Mengc, wâyc nongc mêtc Stoif yônz.” ⁴ Tênb-Hungh năngđ nâyx ayx wâyc phunz săngh nzuf Đoouc lif gâyf oix nongc ayx nyăngz dlayc. Pănh songđ max zâyf săngh bamh munh nyăngz Stoif, six săngh âyz Singx lingh.” ⁵ Toix laiv tauh săngh âyz bamh Munh nyâyh ayx Stoif nyăngz jau woax đomc munh, Six cungb stăngz tauv bamh munh oix nyăngz jau, Six toix lanh săngh âyz singx-lingh, Songđ nyâyh oix ayx âyz singx-lingh oix nyăngz dlayc.” ⁶ Six coong âyz stoif munh nyăngz nyâuđ cun têx, Six ên munh ninyh tauv zuc tayc, Six coong âyz singx-lingh cun têx, Songđ tuz săngh mengc, Yâuc tuz pengh oonz.” ⁷ Toix laiv tauh naih bamh munh nyăngz nyâuđ cun têx, Six cloon Tênb-Hungh Săngh Yônz-zaz. Wâyc zuc max hayh lif tuz nănh nyăngz Đoouc-lif gâyf, Yâuc max naih caz năngh ayx âyz.” ⁸ Six toix lanh zuc Stoif-munh nyăngz nyâuđ Cun, Six max hayh ayx tuz hopđ Tênb-Hungh.” ⁹ Six nyâuh Yâuf pez max zuc Stoif-munh nyăngz nyâuđ cun nzof gôh.” nyâuh Yâuf pez tuz singx lingh cun, Six coong nyâuh yămz Stâyv sangc max naih Tênb-Hungz nyăngz singx lingh cun, yâuc max naih Njâuv Zâu nyăngz singx-lingh Cun, Songđ max zâyf Njâuv Zâu nyăngz Munh.” ¹⁰ Mangc nyâuh Yâuf pez nyăngz Stynb stayđ năngđ tayc wâyc Stoif, Six Njâuv Zâu săngh yămz nyâuh Yâuf-pez cah njaf, singx-lingh songđ phunz nyâuh Yâuf-pez tuz săngh Mengc. Wâyc zuc Njâuv Zâu Stăngc nyâuh Yâuf-pez tuz cloon Tênb-Hungh hopđ nyâuđ.” ¹¹ Zâu Yê-su tayc, Tênb-Hungh năngx phunz nănh săngh phunb stengb Taih, Six coong Tênb-Hungh nyăngz singx-lingh săngh nyâuh Yâuf pez nyăngz nyâuđ njaf, Njâuv Zâu Yê-su tayc six năngx phunz nănh săngh phunb stengb taih nâyx tauh songđ nongc yămz nyâuh Yâuf-pez nyâuđ njaf woax tauh Tênb-Hungh nyăngz singx-lingh phunz nyâuh Yâuf pez hayh tayc nyăngz Stynb năngx săngh phunb stengb Taih. ¹² Yâuc-pez lex, Max nongc phunz bamh munh nyăngz Stoif cun pănh săngh âyz Bamh Munh lôx nyăngz Stymz nyâuđ.” ¹³ Six coong nyâuh yâuf-pez âyz bamh Munh naih Stoif nyăngz nyâuh nyâyh ayx, Six zuc tayc, Six coong nyâuh Yâuf pez nongc singx-lingh mêtc nzuf nyâuh Stynb sangc nyăngz Stoif, nyâuh Yâuf pez songđ tuz mengc Săngh.” ¹⁴ Tênb-Hungh nyăngz seenz namh nyâuf, Six âyz nănh nyăngz singx-lingh yeenv nyăngz Munh.” ¹⁵ Nyâuh Yâuf pez tuz Stipx taih nyăngz singx-lingh max phunz nyâuh Yâuf pez ayx cumh nzav nyăngz Nâuh, Nănh pyiênv pănh pênx Tênb-Hungh nyăngz Namh nyâuf, Pănh songđ tuz couv Tênb-Hungh nyăngz singx-lingh êu coong, “Pha lex Pha!” ¹⁶ Singx lingh ayx zanyx manyf phunz Pănh nyăngz mengc hoonh nănh lănv coong, “Pănh six ayx Tênb-Hungh nyăngz Namh-nyâuf.” ¹⁷ Pănh ayx Tênb-Hungh nyăngz namh nyâuf, Songđ oix tuz Stipx Tênb-Hungh Njâuh Phunz nyăngz Pôz, Tênb-Hungh njâuh phunz Njâuv Zâu, Yâuc phunz pănh cloon Nănh songc stipx, wâyc zuc pănh cloon Nănh tanyđ Zâuđ, Pănh songđ tuz cloon Njâuv Zâu tuz songc Stipx Gwăngz-eng.” ¹⁸ Nâyx zanyf pănh stunx pănh pongh nyăngz Zâuđ-Nanc, Max stunx pây năngđ Tênb-Hungh oix hynđ phunz nyăngz Gwăngz-eng.” ¹⁹ Tênb-Hungh zâyx taih nyăngz muif-hungđ jomz nyâuđ zu mungc tuz phătc Tênb-Hungh phunz nănh nyăngz toonz hynđ seetb nây Bamh canz Taih.” ²⁰ Tênb-Hungh zâyx taih nyăngz tax’ hungđ coi wănc pênx max săngh nongc nyăngz tax’ hungđ, Max zâyf âyz nâyx đomc tax’ hungđ nyăngz âyx, Six âyz Tênb-Hungh nyăngz âyx, wâyc zuc muif dlih naih nâyx đomc njih mungc.” ²¹ Tênb-Hungh zâyx taih nyăngz tax hungđ naih ah noib six max zuc huđ, Six tuz pungx goib cloon Tênb-Hungh nyăngz Namh-nyâuf, Yâuc tuz Gwăngz-eng.” ²² Pănh pâyz tuz tauv nâyx Stoif, Yeetx stong Tênb-Hungh zâyx taih nyăngz muif hungđ tanyđ munz zâuđ Nanc Yônx Mengc Yămz, Cayx năngđ munh nzif cayx stengb sây nyăngz săngx huđ zuc tanyđ Munz.” ²³ Max Zâyf cungb zâyx taih nyăngz tax hungđ, Njynh cloon pănh lauf Yônx Mengc yămz, Pănh tuz stipx Tênb-Hungh nyăngz tah yeetx hungđ sâuđ nyâyc, Six singx-lingh phunz pănh nyăngz nyâuđ Yônx Mengc yămz Mungc Tênb-Hungh pyênv wav phunz pănh tuz ayx nănh nyăngz Namh-nyâuf, Yâuc phunz pănh nyăngz Stynb nyăngz muif hungđ tuz pungx goib.” ²⁴ Wâyc zuc pănh tuz Njâuv six wâyc pănh naih tync mungc, Six coong toix lungđ pănh tuz phătc quaix nyăngz dlayc, Pănh songđ max zuc mungc woax hungđ nzof Gôh, laiv hungđ pănh tuz phătc quaix pănh max zâuđ mungc woax hungđ nzof gôh zâyf max?” ²⁵ Six coong pănh năngđ mungc oix tuz stipx, Pănh max zengx tuz Stipx nyăngz phănc, Pănh six oix zuc nongc noic zu tuz phătc pănh mungc woax hungđ.” ²⁶ Pănh đoonh nzongf singx-lingh songđ taih Stăngc pănh, Pănh njynh max Pâyz tuz oix zuc nănđ laix nâyx Sâuh couv, Six singx-lingh Pinyx Stăngc pănh Stingf njâuh Sâuh jođ Tênb-Hungh phunz Pănh.” ²⁷ Tênb-Hungh pâyz tuz munh nyâuđ, Songđ pâyz tuz singx lingh nyăngz âyz-gâyf, Wâyc zuc Singx-lingh pâyz Tênb-Hungh nyăngz zux ix, songđ Stăngc nănh nyăngz pec Stingx Sâuh jođ.” ²⁸ Pănh pâyz tuz Tênb-Hungh phunz stăngz nănh woax đomc, six âyz nănh nyăngz zux ix êu taih woax đomc munh, Yămz manf dlayc tuz gongx. ²⁹ Wâyc zuc Tênb-Hungh tăng lôx zauc muif hungđ tingc pâyz tuz Nănh stiz năngđ nănh nyăngz toonz, Nănh nyăngz toonz songđ tuz ayx songx Yâuf-pez nyăngz tah coonz.” ³⁰ Nănh oix nongc nănh Stiz năngđ nănh nyăngz toonz, woax đomc munh nănh songđ êu Taih, Nănh yâuc phunz cloon Nănh hopđ nyâuđ, six tuz cloon nănh hopđ nyâuđ woax đomc munh, Nănh yâuc phunz nănh stiz tuz Gwăngz-eng.” ³¹ Năngđ ha pănh cayx coong ayx laix? Six coong Tênb-Hungh năngđ cloon pănh yămz naih toix tauh hayh hingh tuz Pănh?” ³² Tênb-Hungh sez tuz Nănh nyăngz toonz, Songđ zoz nănh nyăngz toonz sez mengc wâyc Pănh, năngđ naz nănh zoz nănh nyăngz toonz sađ phunz pănh, max zâyf cungb zoz muif hungđ cungb sađ phunz pănh Mah? ³³ Naih toix laiv tauh hayh coux tuz Tênb-Hungh sên taih nyăngz munh? Max naih đêh! wâyc zuc Tênb-Hungh ayx phunz nănh stiz pengh Stymz.” ³⁴ Toix laiv tauh hayh tingc Stoif Tênb-Hungh nyăngz pec-Stingx? Max naih mănv, wâyc zuc Njâuv Zâu Yê-su tayc, Nănh năngx săngh phunb stengb Taih, Nâyx zanyf nănh Stâyv Tênb-Hungh nyăngz byaoh phanx Stăngc pănh jođ Tênb-Hungh.” ³⁵ Naih toix lungđ hayh nzez tuz Njâuv Zâu nyăngz Stăngz gâyh đutb pănh Max? Zâuđ nanc, Staiz nanc, Munz Stymz, Zâuđ max naih Gwuyz quav zuz, Mah six nyâuđ sab, Mah six zuc hoiđ mengc tayc?.” ³⁶ Năngđ Canyx-Stâub ja coong nâyx, “Wâyc nyâuh buz Muif dlih zuc tayx Tayc, “Munh mangc buz năngđ Pa-jiz yungh zuc tayx ayx A.” (Nzungz-Đăngb 44:22-) ³⁷ Yămz nâyx đomc woanh canyz, Pănh tuz hingh wâyc couv Tênb-Hungh nyăngz Stăngz.” ³⁸ Yaz zeen tingc Tênb-Hungh Stăngz pănh max naih laiv hungđ hayh nzez tuz đutb phunz pănh max stăngz, Max cun Săngh mah six tayc, Stynz-munh mah six Manđ, Laiv hungđ naih quyênh, Nâyx zanyf seetb taih nyăngz dlayc, Mah six đangz phanx seetb taih nyăngz dlayc.” ³⁹ Yămz cah zâyc Gungh mah six yămz cah đi Bamh canz, Mah six toix lungđ wănh nanc, Max naih toix lungđ hayh nzez tuz pănh gâyh đutb Tênb-Hungh nyăngz Stăngz, Tênb-Hungh goib yangh yămz Pănh nyăngz Njâuv Zâu Yê-su.”