¹ Yaz yămz Njâuv Zâu cah njaf, Yaz songđ coong seenz woac, Max coong puv maoh, Naih singx-lingh yămz yaz nyăngz nyâuđ cah njaf, Yaz songđ pâyz tingc yaz max coong puv Maoh.” ² Yaz muif dlih nzuf jab munz stymz numđ Stauh.” ³ Yaz oix stăngc Yiu-tai munh nyăngz Yâuf-tez, Yaz nyăngz pec stingx, Six coong năngđ hayh stăngc tuz nănh stiz têx, Yaz nyunc phunz Tênb-Hungh zaux yaz gâyh đutb Njâuv Zâu yaz lauf nyeenc.” ⁴ Nănh stiz six I-sa-a-ên Munh, Tuz Tênb-Hungh sên taih ayx nănh nyăngz Namh-nyâuf, Nănh stiz yâuc tuz phătc nănh hynđ yangh nyăngz Gwăngz-eng. Tênb-Hungh tuz cloon nănh stiz nyunc quaix đungx hungđ woac, Yâuc phunz Mô-sê nyăngz đoouc-lif gâyf nănh stiz, Cungb bux jix caox nănh stiz Canyx-bongc, Yâuc phunz nănh stiz stipx nănh nyunc nyăngz woac.’ ⁵ Nănh stiz six ayx naih manyh Tauh, woax tauh stu stongz nyăngz Sây-Stunz, Yămz pănh Stâyz-zâuv, Njâuv zâu stengb Stâyv pênx pănh bamh Munh, yâuc tăng nănh stiz nyăngz phănc stengb stâyv taih, Nănh six Tênb-Hungh Njăngb quaix, Payh tuz Stâyv quâyx tanv nănh A-Men.” ⁶ Yaz max zâyf coong Tênb-Hungh max âyz nănh nyunc woac cloon Nănh Stiz, “wâyc zuc I-sa-la-ên Munh yâuc max zâyf muif tauh pênx Tênb-Hungh nyăngz munh nzuf.” ⁷ Apc-la-ham nyăngz Sây-stunz yâuc max zâyf muif tauh ayx Tênb-Hungh nyăngz Namh-nyâuf nzuf, Tênb-Hungh bux Apc-la-ham coong, “Mâyh nyăngz Sây-stunz yaz six phunz đangz phanx six tăng I-sakc zunx Taih.” ⁸ Năngđ nâyx âyz gâyf six max zâyf muif lanh Apc-la-ham nyăngz Sây-stunz Bix pênx Tênb-Hungh nyăngz seenz Namh nyâuf nzuf đêh, Seenz Apc-la-ham nyăngz Sây stunz, Six âyz Tênb-Hungh nyunc woac phunz Apc-la-ham woax đomc. ⁹ Tênb-Hungh nyunc woac phunz Apc-la-ham năngđ nâyx coong, “Nâyx zanyf yaz phunz Sa-la, Naih ah lanh Toonz.” ¹⁰ Max zâyf cungb buf nâyf, Rê-be-ca nyăngz iz tauh toonz songc ah tauh Pha, Six pănh nyăngz Stung zez tâuh I-sakc.” ¹¹ Nâyx toix Sây max zengx stengb Stâyv taih, Max zengx ayx toix laiv hungđ gongx huđ, Tênb-Hungh coong bux Rê-be-ca, Tah six bokc dlic yâuf, Tênb-Hungh nyunc woac tongb-poux phunz nâyx toix Sây, ¹² Nâyx toix sây six Tênb-Hungh sên taih, Max zâyf munh ayx toix lungđ.” ¹³ Năngđ Canyx-Stâub ja coong Nâyx, “Yaz stăngz Ya-côpv, Six hănđ Ê-Sao.” ¹⁴ Ha pănh cayx coong ayx laix? Tênb-Hungh max pengh Stymz mah six? max zâyf đêh! ¹⁵ Tênb-Hungh coong bux Mô-sê, “Yaz oix hâuđ-lênh toix laiv tauh, Yâuc hâuđ-lênh, Yaz oix ayx gongx phunz toix laiv tauh Yâuc ayx.” ¹⁶ Năngđ nâyx, Nănh hâuđ lênh Munh, Six max zâyf wâyc munh oix nyăngz dlayc, Yâuc max zâyf wâyc Munh cox găngx ayx toix laiv hungđ, Six Tênb-Hungh cănh hâuđ-lênh.” ¹⁷ Canyx-Stâub naih ah Zâux woac ja Coong, “Tênb-Hungh coong bux Ai-câpc Stâyz-phangz nyăngz Hungh, Yaz phunz mâyh tuz njăpc ayx Hungh, oix nongc mâyh phunz munh phătc yaz nyăngz quyênh, Yâuc phunz yaz nyăngz manyh tauh đanv pong nâyx nomz Gungh-đi.” ¹⁸ Năngđ nâyx, Tênb-Hungh oix hâuđ-lênh toix laiv tauh nănh yâuc hâuđ-lênh, Tênb-Hungh oix phunz toix laiv tauh nyâuđ nhlengc, Nănh yâuc phunz woax tauh nyâuđ nhlengc.” ¹⁹ Ha nyâuh Yâuf pez songđ hayh naic Yaz, “Săngh laix Tênb-Hungh bix Yônx munh? Naih mănv hayh zengv tuz Tênb-Hungh?” nyâuh Yâuf pez Six cungb ayx bamh munh, Nyâuh ayx laix hayh naih quyênh naic Tênb-Hungh, Tungh zăngc ayx laix hayh naih quyênh naic luh panz coong, “Săngh laix mâyh bix zâyx yaz ayx năngđ nâyx? ²⁰ Nyâuh yâuf pez laiv tauh năngx nzađ nzengz cloon Tênb-Hungh? Bamh munh six nib engz, ayx laix hayh naic nen pănh taih woax tauh, mâyh săngh laix bix zâyx yaz taih? ²¹ Nen nib stangc max zâyf naih gâyf dluyh âyx nen ah đuiz Nib, Nen ayx iz nomz engz, ayx ah nomz tongh hangh, ah nomz đătc biêtc.” ²² Tênb-Hungh lauf năngđ naz, Nănh oix phunz nănh nhleenx woax đomc Munh, Yâuc phunz nănh stiz tuz phătc nănh nyăngz quyênh, Six nănh ayx nyâuđ đao tanyđ nhleenx, Jic tuz zuc mêtc woax đomc.” ²³ Nănh ayx nyâuđ đao zu oix phunz Nănh nyăngz Gwăngz-eng hynđ seetb Taih, Phunz nănh hâuđ-lênh nyăngz Munh, Nănh bênc săngh phunz nănh stiz tuz stipx nănh nyăngz Gwăngz-eng woax đomc Munh.” ²⁴ Pănh six tuz sên woax đomc Munh, Nănh yâuc êu taih, Max zâyf cungb tăng Yiu-tai Munh, Six năngx tăng max zâyf Yiu-tai Munh tymb!” ²⁵ Năngđ Mô-sê Canyx-Stâub ja Coong, “six max zâyf ayx yaz nyăngz pec stingx woax đomc, “Yaz oix êu taih ayx yaz nyăngz pec Stingx. “Yaz oix goib yangh yaz nyăngz Stăngz, “Phunz lôx noib yaz max stăngz woax đomc.” (Ô-Sê 2:1-23) ²⁶ Stynh stâyv Tênb-Hungh bux Coong, “nyâuh max zâyf yaz nyăngz pec Stingx, “Đangz phanx nănh stiz tuz hipđ ayx pha, “Săngh mengc woax tauh Tênb-Hungh nyăngz Namh-nyâuf.” (Ô-Sê 1:10-) ²⁷ ê-sai êu I-sa-la-ên munh nănh Coong, “Max cunv I-sa-la-ên Munh đung buc coiđ Njauz staiz, “Six Tuz Njâuv nyăngz munh stoc nzongf.” ( Ê-sai 10:22-23) ²⁸ Wâyc zuc Zâu oix Coonx stămđ Gungh đi Munh nyăngz Stoif. ²⁹ Ê-sai Stênx-stengb ja Coong, “Six coong dliênc quaix nyăngz Zâu, “Năngđ max njâuh tix lanh nâyx đomc Sây-stunz phunz pănh têx, “Zăkx zănx six zuc mêtc năngđ woa iz nomz Stengv nâyx, “Cô-mô-la, Cloon Sô-đôm Stengv zuc mêtc nâyx gôh.' (Ê-sai 1:9-) ³⁰ Nâyx đomc naih lungđ âyz gâyf? Woax đomc max zâyf Yiu-tai Munh max lov jau cloon Tênb-Hungh hopđ nyâuđ, Six nănh stiz tuz cloon nănh hopđ nyâuđ nyăngz jau, Six wâyc nănh stiz nyăngz seenz Stymz.” ³¹ Six I-sa-la-ên Munh oix Couv ayx âyz Đoouc-lif gâyf lov jau cloon Tênb-Hungh hopđ nyâuđ six max nzangc-đatc.” ³² Wâyc săngh laix? wâyc zuc nănh stiz cănh pangc nănh stiz ayx nyăngz dlayc, Max zâyf couv Tênb-Hungh. Nănh stiz tib zuc woax nomz njauz, Nănh stiz yâuc năngx ayx phunz munh đungx tib zuc Canyx-Stâub lănv woax nomz njauz pyây.” ³³ Năngđ Canyx-Stâub ja lănv Coong, “Yaz oonz nomz njauz pyây ănz Yê-lu-sa-lem, “ayx phunz munh đungx zuc tib zomf, “woax nomz njauz pyây ayx phunz nănh stiz zuc tib glinyf, “Toix laiv tauh zeen tingc nănh six max zuc nyayz.” (I-Sai 8:14- ;28:16-)