¹ Yâuf-Pez lex! Yaz cloon pâyz Đoouc-lif gâyf nyăngz munh coong nâyx đomc woac, nyâuh max pâyz mah? Mô-sê nyăngz Đoouc-lif gâyf six gungb cun munh năngx săngh nyăngz săngx huđ.” ² Zăngz hanf, Munh nzif zoz langh quaix têx, Langh năngx săngh sax Stoiz, zoongz pyau nyăngz gâyf lauf năngx cun nănh sax Stoiz, Six tauv nănh langh tayc blătc, woax tauh munh nzăngđ max zuc zoongz pyau nyăngz gâyf cun nănh.” ³ Six coong, “Langh năngx săngh nyăngz săngx huđ, au ninyh văngc pitc tauh munh toonz, Six zuc tingc pamf pongz lauh Stymz lub văngc munh nyăngz Stoif, “Six tauv nănh nyăngz langh tayc blătc nzof, Nănh hănđ six ninyh văngc pitc tauh munh Pha, Yâuc max zâuđ zuc tingc pamf pongz lauh nyăngz Stoif.” ⁴ Songx Yâuf pez pex! nyâuh Six năngđ munh tayc ninyh nâyx, Nzof nyâuh Yâuf-pez nzăngđ tuz gâyh đutb Đoouc-lif gâyf, wâyc zuc nyâuh couv Njâuv Zâu zuc tayc nyăngz gâyf, nyâuh Yâuf pez songđ pênx pitc tauh Zâu yăngz Munh, Six tayc ninyh Tênb-Hungh năngx phunz nănh săngh phunb stengb woax Tauh nyăngz Munh' ⁵ Lôx noib nyâuh Yâuf-pez zuc Stoif cun pănh woax zanyf, Phunz Đoouc lif gâyf yămz pănh cah njaf ayx phunz pănh pamf Stoif, Năngđ naz phunz pănh ayx muif hungđ dlayc, ênz pănh ninyh tauv zuc tayc nyăngz tync.” ⁶ Lôx noib pănh zuc Đoouc lif gâyf cun pănh năngđ nzauh Munh, Six nâyx zanyf pănh lôx munh đax tayc nzof, âyz gâyf six pănh tuz gâyh đutb Đoouc lif Gâyf, Pănh six âyz Singx-lingh nyăngz săngb gâyf canyx bongc Tênb-Hungh, max zâyf âyz lôx gâyf njanh ja canyx bongc. ⁷ Naih dlih nyâuh Yâuf-pez nyâyh coong yaz phunz Đooub-lic gâyf six Stoif, max zâyf đêh! Six Đoouc lif gâyf phunz yaz pâyz tuz toix laiv hungđ six Stoif, Six Đoouc lif gâyf max lănv coong max tuz mauh pitc tauh nyăngz tax hungđ Stoif six toix laiv lungđ.” ⁸ Six pangc Đoouc-lif gâyf, ayx coonz phunz yaz mauh tax hungđ pamf Gâyf, Six coong stoif năngđ max naih Đoouc-lif gâyf, Stoif songđ zuc tayc gôh.” ⁹ Cah đangc max zengx naih gâyf njanh cun Yaz, Yaz năngx săngh, Six quaix đangz Đooub-lic gâyf songđ taih tauv cun tămx yaz, Stoif songđ max yămz yaz cah njaf.” ¹⁰ Đoouc-lif gâyf hopđ zuc Stăngc ayx phunz yaz tuz săngh, Six cuôiv cungh Đoouc-lif gâyf ayx phunz yaz zuc tayc.” ¹¹ Wâyc zuc Stoif lov congv phunz Đoouc-lif gâyf jaf yaz, Stoif songđ nongc Đoouc-lif gâyf tayx yaz zuc tayc.” ¹² Năngđ naz Đoouc-lif gâyf nyăngz muif tyuh gâyf six Đăngb-zengh, Pengh Stymz Gongx nyăngz gâyf.” ¹³ Ha six coong đoouc lif gâyf six gongx, Đoouc lif gâyf hayh ayx phunz yaz zuc tayc max? Max zâyf đêh! Stoif nzâyz huđ nyăngz dlayc taih wâyc phunz yaz zuc tayc, Năngđ nâyx phunz yaz pâyz tuz Stoif six toix laiv lungđ, Năngđ naz Đoouc lif gâyf phunz yaz pâyz tuz Stoif six huđ nyăngz jau.” ¹⁴ Pănh pâyz tuz Đoouc-lif gâyf six Đăngb-zengh, Six yaz pênx bamh munh max dlăngc, zuc maic stăngc Stoif ayx Nâuh. ¹⁵ Yaz max pâyz tuz yaz ayx toix laiv hungđ, Yaz max oix ayx yaz oix nyăngz, Bix cayđ ninyh ayx pănh hănđ nyăngz dlayc.” ¹⁶ Six coong ayx yaz hănđ nyăngz dlayc, Yaz songđ pâyz tuz Đoouc-lif gâyf six toix.” ¹⁷ Six max zâyf yaz cănh ayx yaz hănđ nyăngz dlayc, Six yămz yaz nyâuđ Njaf woax đomc Stoif hox yaz ayx.” ¹⁸ Yaz pâyz tuz yămz yaz bamh munh nyăngz nyâuđ six max naih toix laiv hungđ gongx, Yaz oix ayx toix laiv hungđ gongx, Yâuc cănh max hayh ayx.” ¹⁹ Gongx nyăngz dlayc yaz oix ayx, Yâuc max ayx, Six ninyh ayx huđ nyăngz dlayc six pănh max oix ayx nyăngz dlayc.” ²⁰ Six coong yaz ayx max oix ayx nyăngz dlayc, Six max zâyf yaz cănh ayx, six yămz yaz cah njaf woax đomc Stoif hox yaz ayx.” ²¹ Yaz tuz hođ nzuf nâyx đomc gâyf, Yaz oix ayx gongx dlayc, ayx huđ dlayc yâuc luiđ lêpc yaz cah đangz.” ²² Yaz nyăngz Stymz nyâuđ oix ayx Tênb-Hungh nyăngz Gâyf.” ²³ Six yămz yaz nyâuđ cah njaf phătc naih pitc hungđ Gâyf, “Six nâyx hungđ gâyf năngx cloon yaz nyăngz nyâuđ njaf numđ nyađ woax hungđ bopc zax, Six yămz yaz nyăngz Stynb woax hungđ Gâyf, Phunz yaz pamf Stoif woax hungđ Gâyf, Bătx yaz ayx nâuh phunz Nănh.” ²⁴ Seenz zâuđ nanc phunz yaz nzongf, Toix laiv tauh hayh Njâuv phunz yaz gâyh đutb nâyx đomc hayh tayc nyăngz Stynb? ²⁵ Clo ănz Tênb-Hungh nongc Njâuv Zâu Yê-su pănh nyăngz Zâu Njâuv Yaz. “Wâyc năngđ nâyx yaz nyăngz Stymz nyâuđ songđ ayx nâuh phunz Tênb-Hungh nyăngz Đoouc-lif gâyf, “Six yaz nyăngz Stynb six ayx nâuh phunz Stoif nyăngz Đoouc-lif gâyf.”