¹ Ha pănh oix zuc nyâyh coong pănh cayx njynh luz pamf Stoif, Phunz Tênb-Hungh sađ pôz phunz pănh năngx đungx têx Mah?” ² Max tuz! Âyz ayx Stoif nyăngz jau pănh songđ zuc tayc, Ha six stâyv quâyx săngh yămz Stoif cah Njaf mah?” ³ Nyâuh đomc Yâuf pez max săngx pănh ayx quaix womz nyăngz gâyf, Pănh cloon Njâuv Zâu Yê-su songc ah nomz Stynb nzof mah?, Quaix womz woax zanyf pănh tuz cloon nănh songc Tayc. ⁴ Pănh quaix womz woax zanyf, Pănh cloon Njâuv Zâu songc tayc songc plopx, wâyc phunz pănh tuz nănh songc mengc Săngh, Năngđ Njâuv Zâu tayc, Nzangc Pha nongc nănh nyăngz quyênh phunz nănh săngh taih, Pănh nzăngđ tuz Săngb Mengc.” ⁵ Wâyc zuc pănh cloon Njâuv Zâu nyunc songc tayc, Pănh songđ tuz cloon Njâuv Zâu songc mengc săngh phunb Stengb, Năngđ nănh Nâyx.” ⁶ Pănh pâyz tuz pănh nyăngz lôx nyâuđ, zuc cloon Njâuv-Zâu zuc tingz tămz woa săpc đăngc zax wâyc phunz pănh pamf Stoif nyăngz nyâuđ zuc mêtc. Pănh max zuc năngx ayx Stoif nyăngz Nâuh.” ⁷ Wâyc zuc toix laiv lanh tayc blătc, Songđ tuz gâyh đutb Stoif nyăngz quyênh.” ⁸ Six coong pănh cloon Njâuv Zâu songc Tayc, Pănh songđ pâyz tuz pănh tuz cloon nănh songc Mengc Săngh.” ⁹ Pănh pâyz tuz Njâuv Zâu tayc ninyh nănh năngx phunz nănh Săngh phunb stengb Taih. Quaix đangz zuc tayc nyăngz jab max hayh cun tuz nănh.” ¹⁰ Njâuv Zâu tayc nănh bopc hingh Stoif nyăngz quyênh ah hâyđ caux nzuf, nâyx zanyf nănh stipx Săngh Mengc, Săngh wâyc phunz Tênb-Hungh.” ¹¹ Nyâuh yâuf pez lauf năngđ ha, Nyâuh oix zuc stunx nyâuh năngđ tayc wâyc Stoif nyăngz quyênh max cun pănh nzof, Six pănh cloon Njâuv Zâu Yê-su songc Mengc săngh wâyc Tênb-Hungh.” ¹² Wâyc năngđ nâyx max nongc phunz Stoif nyăngz quyênh cun pănh yâuf pez hayh tayc nyăngz Stynb Stayđ yămz nây Nib mync, ayx âyz pănh bamh Munh stynb stayđ nyăngz oix, ¹³ Max nongc phunz Stynb sangc nyăngz tax, hungđ ninyh ayx Stoif, Nongc ayx huđ nyăngz dlayc, Phunb đangz six zuc stungx phunz Tênb-Hungh, Năngđ tayc blătc Tênb-Hungh năngx phunz săngh phunb stengb taih nyăngz Munh, Yâuc zoz Stynb nyăngz muif hungđ stungx phunz Tênb-Hungh nongc ayx hopđ nyăngz jau.” ¹⁴ Stoif max hayh năngx ayx Zâu cun nyâuh Yâuf pez nzof gôh, wâyc zuc nyâuh Yâuf-pez max yămz Đouc-lif gâyf cah đi, Six nyâuh yămz Tênb-Hungh nyăngz pôz cah đi.” ¹⁵ Ha pănh six cayx ayx laix? ha nâyx zanyf, Pănh max yămz Đoouc-lif gâyf cah đi, Pănh yămz Tênb-Hungh nyăngz pôz cah đi, Six cayx dluyh pănh pamf Stoif mah? max tuz đêh! ¹⁶ Nyâuh yâuf pez pâyz tuz nyâuh ayx nâuh phunz toix laiv tauh, Six zuc mungv woax tauh nyăngz woac, nyâuh mungv woax tauh six ayx nyâuh nyăngz Zâu, Năngđ naz nyâuh ayx Stoif nyăngz nâuh, nyâuh six zuc tayc, Six nyâuh mungv Tênb-Hungh nyăngz woac, nyâuh songđ tuz ‘cloon nănh hopđ nyâuđ.” ¹⁷ Sâuf Tênb-Hungh, Max cun lôx noib nyâuh Yâuf pez ayx Stoif-nyăngz nâuh, Six nâyx zanyf nyâuh Yâuf pez nongc nzuf nyâuđ mungv bux nzaox nyâuh nyăngz woac.” ¹⁸ Nyâuh tuz pungx goib gâyh đutb Stoif nyăngz Nâuh, Six nâyx zanyf, nyâuh tuz pênx ayx gongx nyăngz Nâuh.” ¹⁹ Yaz nongc nâyx đomc woac pây lănv taih nyâuh Yâuf pez zâuđ saz, wâyc zuc nyâuh six bamh munh, Lôx noib nyâuh stungx nyâuh Yâuf pez nyăngz Stynb ayx Stoif nyăngz okx Nâuh, “Lauf năngđ ha. Six nâyx zanyf, nyâuh Yâuf-pez Stungx nyâuh stynb stayđ ayx gongx dlayc, âyz gâyf six nyâuh Yâuf pez săngh phunz Tênb-Hungh.” ²⁰ Lôx noib nyâuh Yâuf-pez ayx Stoif nyăngz nâuh, ayx gongx nyăngz jau max tuz cun nyâuh Yâuf-pez. ²¹ Dlênh noib nyâuh Yâuf-pez ayx woax đomc huđ dlayc, Nâyx noib nyâuh lauf numđ nyayz woax đomc dlayc, Six ayx huđ nyăngz dlayc six cungb ênz munh ninyh tauv zuc tayc nyăngz tync.” ²² Six nâyx zanyf nyâuh Yâuf pez tuz pungx goib gâyh đutb Stoif nyăngz Nâuh, Taih ayx Tênb-Hungh nyăngz Nâuh, Năngđ nâyx nyâuh songđ tuz stipx stâyv quâyx nyăngz Mengc.” ²³ Wâyc zuc Stoif-nyăngz congz Stynh six phunz munh zuc tayc, Six Tênb-Hungh cungb phunz nănh nyăngz quah tăngf, Six phunz munh cloon Njâuv Zâu Yê-su songc mengc săngh, Songđ tuz stâyv quâyx nyăngz Mengc.”