¹ Six nyâuh nyâyh coong, “nyâuh hayh tingc pitc tauh Munh nyăngz Stoif, nyâuh lauf pamf stoif cănh tingc pănh nyăngz Stoif, wâyc zuc pănh lauf ayx dlayc năngđ nănh stiz nâyx. ² Pănh pâyz tuz Tênb-Hungh tingc ayx woax huđ dlayc nyăngz munh naih nyăngz Stoif six hopđ.’ ³ Pyeoz lex! nyâuh tingc pamf woax hungđ munh nyăngz Stoif, Zinyx pănh lauf ayx pamf năngđ nănh stiz nâyx, nyâuh nyâyh laic stăngz six hayh tyuv tuz đutb max zuc Tênb-Hungh tingc Stoif naz?” ⁴ Tênb-Hungh nyăngz pôz tăng laiv saix, Nănh yâuc nyâuđ đao, Six nyâuh yâuf pez mangc nănh stam max zâyf mah? nyâuh max pâyz tuz Tênb-Hungh nyăngz pôz oix ênz nyâuh coi nyâuđ mah? ⁵ Six nyâuh yâuf pez nyăngz nyâuđ nhlengc max Canx coi nyâuđ zu tauv Tênb-Hungh goib yangh nănh hănđ munh nyăngz stoif, Nănh nongc pengh stymz Stămđ woax noib, nyâuh songđ zuc tingc stoif năngx nic quaix.” ⁶ Wâyc zuc Tênb-Hungh oix goib yangh âyz muif tauh munh ayx nyăngz dlayc clao phunz nănh stiz.” ⁷ Naih ah đomc munh Muif dlih nongc nyâuđ ayx gongx dlayc, Lov yămz Tênb-Hungh nyăngz Gwăngz-eng, oix nongc nănh pâu yâuc sađ max hayh stêtc nyăngz mengc, Nâyx hungđ munh Tênb-Hungh oix sađ stâyv-quâyx nyăngz mengc phunz nănh stiz.” ⁸ Six cungb tâuh cănh tuz gongx, aox seenz gâyf, ayx huđ dlayc woax đomc, Tênb-Hungh siv nhleenx oix hănđ nănh stiz nzongf.” ⁹ Muif tauh ayx okx nyăngz bamh munh, Songđ seenz zuc pongh zâuđ nanc, Yiu-tai munh pongh đangc, Quaix đangz six max zâyf Yiu-tai munh.” ¹⁰ Six ayx gongx woax đomc munh, Tênb-Hungh oix sađ pengh oonz, Sađ Gwăngz-eng, Phunz nănh stiz, “Phunz Yiu-tai munh đangc, “Quaix đangz nzăngc tauv max zâyf Yiu-tai Munh.” ¹¹ Wâyc zuc Tênb-Hungh max mangc toix laiv tauh nyăngz mynb.” ¹² Toix laiv lanh max naih Đoouc-lif gâyf bix pamc Stoif lauf zuc tayc, Six max zuc Đoouc-lif tingc Stoif, six toix laiv tauh naih Đoouc-lif bix pamc Stoif, Six zuc Đoouc-lif Gâyf tingc Stoif.” ¹³ Max zâyf cungb mungv Đoouc-lif-gâyf, Bix hayh stăngc tuz munh cloon Tênb-Hungh-hopđ nyâuđ đêh, Cungb âyz Đoouc-lif gâyf ayx woax đomc nzăngđ tuz cloon nănh hopđ nyâuđ lêđ đêh.” ¹⁴ Woax đomc max zâyf Yiu-tai Munh, Yâuc max naih Mô-sê nyăngz Đoouc-lif gâyf, Six coong nănh stiz nyăngz nyâuđ nyâyh seetb taih ayx nyăngz dlayc tuz hopđ gâyf, woax Six săngh nănh stiz nyăngz Đoouc-lif gâyf gôh.” ¹⁵ Nănh stiz ayx dlayc phunz ja Đoouc-lif gâyf ănz nănh stiz nyăngz nyâuđ, nănh stiz nyăngz nyâuđ phunz stiz pâyz tuz pănh ayx toix, naih lauh zanyf pâyz tuz pănh ayx Sai, ¹⁶ Âyz yaz nzônh nyăngz cuđ-jeenx, Tauv stămđ stoif woax noib, Tênb-Hungh oix nongc nănh nyăngz toonz Njâuv Zâu Yê-su, Năngđ nâyx stămđ bamh munh nyăngz dlayc.” ¹⁷ Ha nyâuh nif? nyâuh coong nyâuh ayx Yiu-tai Munh, nyâuh nzeetx blangc coong, “nyâuh couv gâyf njanh, nyâuh yămz năngx stătx têx Tênb-Hungh.” ¹⁸ Yâuc pâyz tuz Tênb-Hungh oix nyâuh năngđ laix nâyx ayx, nyâuh yâuc coong nyâuh hođ quaix Đoouc-lif gâyf, Nzăngđ pâyz tuz ayx toix lungđ năngx hođ têx.” ¹⁹ nyâuh nyâyh coong, “nyâyh hayh yeenv mâyc blâuf nyăngz munh, ayx Gwăngz-eng syux phunz yămz nzămc nyăngz munh. ²⁰ nyâuh hayh nzaox munh oongx nyăngz munh, Yâuc ayx Stênx -Stengb nzaox Munh lanz nyăngz Munh, wâyc zuc nyâuh naih Đoouc-lif gâyf, nyâyh coong nyâuh pâyz tuz muif hungđ, nyâuh naih seenz gâyf lêpc nyâuh.” ²¹ nyâuh nzaox Munh yâuc max nzaox cănh nyăngz Stynb mah? nyâuh nzaox êu Munh nongx gâyf ayx stac, Zâu yâuc ninyh ayx stac mah? ²² Nyâuh bux pitc tauh max cuyb pamf pongz lauh nyăngz Stoif, Zâu yâuc ninyh pamf woax hungđ Stoif, “nyâuh hănđ miuc hanyh, Yâuc ninyh nimc miuc pyau nyăngz tax’ hungđ mah?” ²³ Nyâuh yâuf pez nzeetx blangc lănv coong nyâuh pâyz Tênb-Hungh nyăngz gâyf, Six nyâuh ayx peo nănh nyăngz bux, Yâuc ayx pamf woax hungđ gâyf. ²⁴ Canyx-Stâub ja coong seenz toix nzongf, wâyc nyâuh Yiu-tai Munh, Pitc stingx Munh nzăngđ mangc stam Zâu nyăngz bux.” ²⁵ Six coong nyâuh âyz Đoouc-lif gâyf ayx, nyâuh ayx quaix catz nyăngz gâyf nzăngđ săngh nongc, Six coong nyâuh yâuf pez max âyz Đoouc-lif Gâyf ayx têx, nyâuh ayx quaix catz nyăngz gâyf lauf max săngh nongc.” ²⁶ Woax đomc max zâyf Yiu-tai Munh, Nănh stiz max zâuđ ayx quaix catz nyăngz gâyf, Six coong nănh stiz năngđ âyz Đoouc-lif gâyf ayx, Lauf cayx năngđ nănh stiz ayx quaix catz nyăngz gâyf Nâyx.” ²⁷ Max ayx quaix catz nyăngz gâyf woax đomc Munh, Bix ayx âyz Đoouc-lif gâyf nyăngz munh songđ tingc nyâuh nyăngz Stoif.” six nyâuh naih Đoouc-lif gâyf ja Săngh đăngc, Yâuc ayx quaix catz nyăngz gâyf woax đomc munh, Six lauf năngx ayx pamf Đoouc-lif gâyf woax đomc munh.” ²⁸ Nănh stiz ayx năngđ naz six wâyc nănh stiz cungb đamz manyh Yiu-tai Munh nyăngz cub, Six cah njaf zez max zâyf seenz Yiu-tai Munh zez đêh, ayx quaix catz nyăngz gâyf max zâyf cungb stunx cungh ngwoaic cub cungđ đêh, ²⁹ Seenz zâyf Yiu-tai Munh six yămz cah njaf zez, Nănh stiz nyăngz nyâuđ ayx quaix catz nyăngz gâyf, Max zâyf Đoouc-lif gâyf ayx nec, Six Singx-lingh ayx nyăngz cumh pâuz, Nâyx hungđ ya munh, Bamh munh max tanv, Six Tênb-Hungh Tanv.”