¹ Yaz six Phao-lô ayx Njâuv Zâu Yê-su nyăngz Pâuz, Tênb-Hungh sên yaz taih hipđ ayx nănh nyăngz cumh pâuz Munh, Nănh paiđ yaz ninyh lănv nănh nyăngz cuđ jeenx. ² Nây cuđ jeenx tăng lôx Tênb-Hungh nyunc săngh nzof, Yâuc nongc nănh nyăngz tâuc woac munh ja Taih woax đomc Canyx-stâub. ³ Cuđ jeenx ja coong nănh nyăngz toonz Njâuv Zâu Yê-su, stengb stâyv taih pênx bamh munh, ayx Đa-vitv Hungh nyăngz sây-stunz.” ⁴ Đăngb-zengh nyăngz Singx-lingh Yâuc phunz nănh ayx Tênb-Hungh nyăngz toonz, “wâyc zuc nănh tayc, Tênb-Hungh năngx phunz nănh nyăngz quyênf ayx phunz nănh săngh phunb stengb Taih. ⁵ Njâuv Zâu Tênb-Hungh nongc nănh nyăngz pôz, Sađ phunz yaz ayx Nănh nyăngz cumh pâuz Đăkc-biêtc, wâyc nănh nyăngz manyh ênz nây Gungh đi Munh phunb đangz lauf lov nănh, Canyx bongc Nănh, Yaz ayx nyăngz dlayc six ayx wâyc Nănh.” ⁶ Njynh nyâuh Yâuf pez yămz Lô-ma stengv nyăngz munh, Yâuc tuz hipđ ayx Njâuv-Zâu, Yê-su nyăngz Munh nzof gôh.” ⁷ Yaz ja jeenx zuyz phunz nyâuh Yâuf-pez yămz Lô-ma nzêuh nyăngz munh, Yâuc tuz Tênb-Hungh hâuđ lênh nyăngz munh, Tuz êu taih pênx Đăngb zengh nyăngz pec stingx, “Jođ pănh nyăngz nzangc Pha Zâu Tênb-Hungh, Cloon Njâuv Zâu Yê-su Sađ Pôz Sađ pengh oonz phunz nyâuh Yâuf-pez ô stayx.” ⁸ Njâuv Zâu Yê-su Phunz yaz wâyc nyâuh songx Munh, Yaz hâuđ yaz nyăngz Tênb-Hungh, “wâyc zuc Gungh đi Munh numđ lănv tauv nyâuh Yâuf-pez naih Seenz Stymz.” ⁹ Tênb-Hungh six yaz pong nyâuđ Stăngc ayx Nănh nyăngz cumh pâuz lănv Nănh toonz nyăngz cuđ-jeenx woax tauh, Hayh Stăngc yaz ayx zanyx manyf, Nănh pâyz tuz yaz Muif dlih đamv tauv nyâuh Yâuf-pez.” ¹⁰ Yaz laiv zanyf clo-Zâu Yâuc jođ Tênb-Hungh phunz yaz naih congv ninyh tayđ nyâuh yâuf-pez, Năngđ hopđ nănh nyăngz âyx, Nâyx đomc dlayc Six Săngh congz.” ¹¹ Yaz seenz oix pongh nyâuh Yâuf-pez, wâyc phunz nyâuh nyăngz mengc hoonh tuz Sâuđ-nyâyc.” Stăngc nyâuh hayh zeen tuz năngx yongb têx.” ¹² Yaz coong nyăngz dlayc six nyâuh yâuc tuz Phătc yaz seenz Stymz. Yaz yâuc oix tuz phătc nyâuh Yâuf pez nyăngz seenz Stymz. Lanh songđ hayh Stăngc lanh zeen tuz Yongb” ¹³ Songx Yâuf-pez lex! Yaz oix nongc nyâuh Yâuf-pez pâyz tuz yaz sax hâyc oix ninyh nyâuh woa, Six naih dlayc zeenv yaz max Săngh ninyh, “Yaz cungb oix yămz nyâuh woa mungh tongx yeenv nyâuh zeen Zâu, Năngđ yaz yămz pitc Stingx munh yeenv nănh stiz nâyx.” ¹⁴ Yaz nzâyz ah hungđ Cumh pâuz nic, Pây cloon muif tauh munh, Tăng Hi-lapc Munh, Mah six max zâyf Hi-lapc Munh. Munh lemđ, Mah six munh oongx.” ¹⁵ Wâyc năngđ nâyx, Yaz seenz oix lănv cuđ-jeenx phunz nyâuh Lô-ma nzêuh Munh.” ¹⁶ Yaz songđ max nyayz cuđ jeenx, wâyc Nây cuđ-jeenx six Tênb-Hungh nyăngz quyênh, Hayh Njâuv tuz yeetx stong zeen nyăngz Munh, Tah yeetx six Yiu-tai munh đangc, Quaix đangz nzăngđ njâuv tauv muif stingx munh.” ¹⁷ Nây cuđ-jeenx coib yangh Tênb-Hungh năngđ laix nâyx phunz munh cloon nănh hopđ nyâuđ, “Six tăng coonz zeen, oix zuc zeen tuz tauv tauh, Năngđ Canyx-Stâub ja coong nâyx, “Toix laiv tauh zeen couv Tênb-Hungh, Songđ tuz cloon Nănh hopđ nyâuđ, “Pengh Stymz nyăngz munh six tuz Mengc Săngh stâyv-quâyx.” ¹⁸ Tênb-Hungh yămz woa Tênb-Toongh, Goib yangh nănh hănđ munh nyăngz Stoif, Nănh hănđ munh mangc stam nănh woax đomc Munh, Yâuc hănđ munh ayx huđ dlayc, Nănh Stiz ayx nyăngz huđ dlayc pinyx max phunz munh pâyz seenz gâyf.” ¹⁹ Tênb-Hungh songđ tingc nănh stiz nyăngz stoif, wâyc zuc nănh stiz pâyz tuz Tênb-Hungh, Six nănh cănh goib yangh phunz nănh stiz pâyz.” ²⁰ Tăng Tênb-Hungh zâyx Gungh zâyx nib taih woax zanyf, Tênb-Hungh Stâyv quâyx yămz nyăngz quyênh max zuc hănđ.” Cloon nănh nyăngz Stymz nyâuđ, Max cun hănđ six mâyc mangc max Phătc, Six Tênb-Hungh cănh phunz pâyz tuz manyh Pec, Nănh stiz mangc phătc Tênb-Hungh zâyx taih nyăngz tax, hungđ, Songđ pâyz tuz Tênb-Hungh, “Nănh stiz songđ max naih tync zay Stynb.” ²¹ Nănh stiz pâyz tuz Tênb-Hungh, Six nănh stiz max sâuf-hâuđ, Mah six jâuz Tênb-Hungh. Nănh Stiz nyâyh nyăngz jau max Săngh nongc, nyâuh yâuc oongx nzongf.” ²² Nănh stiz cănh zanyb nănh stiz naih tongb-Manyh, Six nănh stiz wav Săngh bauh-buôkc.” ²³ Nănh stiz hopđ zuc congx stâyv quâyx săngh yâuc Gwăngz-eng nyăngz Tênb-Hungh. Bix ninyh congx Miuc hanyh, congx năngđ munh nyăngz hanyh jangx, Cloon noc cloon stanyb hauc hanyh jangx, Cloon nyoongz nib minc nyăngz tax’ hungđ.” ²⁴ Wâyc nâyx Tênb-Hungh dluyh nănh stiz nyăngz nyâuh cănh ayx bah lotb nyăngz dlayc, Nongc nănh stiz nyăngz stynb stayđ lanh cloon lanh ayx nyayz nzongf nyăngz dlayc' ²⁵ Nănh stiz nzâyz Tênb-Hungh nyăngz seenz gâyf taih coi pênx za gâyf taih nongc, Nănh stiz Canyx-bongc Munh puf zâyx taih nyăngz tax’ hungđ, Tayv Zâyx muif hungđ woax tauh, six munh stâyv quâyx oix zuc tanv woax tauh A-Men.” ²⁶ Wâyc munh năngđ nâyx ayx, Tênb-Hungh songđ dluyh pyeenz âyz nănh Stiz nyăngz nyâuđ cănh ayx nyayz nzongf nyăngz dlayc. Munh sab hopđ zuc nongc munh baox, Six Cuôiv cungh munh sab cănh nongc Munh sab.” ²⁷ Nzof munh baox yâuc tinyh năngđ, quanyf munh sab max nongc bix cănh nongc munh toonz, nyâuđ njaf jomz bongh năngđ tâuf pu Nâyx, Lanh cloon lanh ayx nyayz nzongf nyăngz dlayc, Nănh stiz ayx nyăngz huđ dlayc cănh wynb phunz nănh stiz cănh zuc tingc Stoif,.” ²⁸ Wâyc Munh nyăngz nyâuđ nhlengc max oix pâyz Tênb-Hungh, Tênb-Hungh songđ max cun Nănh Stiz, “Cănh dluyh âyz nănh stiz huđ nzongf nyăngz nyâuđ ayx plih-plaiz nyăngz dlayc.” ²⁹ Nănh stiz cungb ayx muif hungđ huđ nzongf okx nzongf nyăngz dlayc, mauh tax’ hungđ, Lanh cloon lanh ayx max pênx nyăngz dlayc, Nănh stiz stâyx munz munh tayx munh nzengz zax, Jaf munh, nyâyh oix hoiđ Munh, Coong woac huđ nyăngz dlayc, ³⁰ Lanh coong huđ ănz lanh, hănđ Tênb-Hungh, Coong peo munh, ayx guic zanyb lub, Ta zux ix ayx huđ dlayc, Max mungv nzif pha nyăngz woac.” ³¹ Nănh stiz oongx max âyz nyunc woac ayx, “Max Stăngz munh yâuc max hâuđ lênh Munh.” ³² Nănh stiz pâyz tuz Tênb-Hungh nyăngz gâyf lănv coong ayx nâyx hungđ dlayc six zuc tayc, Max six nănh stiz cănh ayx, Nănh stiz zâyf năngx hox pitc tauh ayx timb.”