¹ Tah ngâuf tauh Stynz-munh pyom nănh nyăngz blungh blex, naih ah nomz stingz tau tăng gungh tuih nzac nib taih. Woax nomz stingz tau yâuc tuz stipx ah tauh ja zâyh, woax tauh ja zâyh six nongc coib đôz nzongf woax nomz staiz nanc cotb. ² Woax nomz stingz tau coib woax nomz staiz nanc cotb songđ naih tâuf sâuv staox taih cayx năngđ tâuf lâuh lub, woax nomz cotb tâuf sâuv đayv staox gungh ninyh tăng bah noib nzămc mengh. ³ Tăng woa cotb njaf tâuf sâuv staox taih naih ah đomc jengz đekx lunc pong nib mync, nănh stiz yâuc tuz lanyf hayh hoiđ nây nib mync cayx năngđ stapb. ⁴ Nănh stiz max naih gâyf ayx hoiđ nib mync mađ touđ, six nănh stiz cungb tuz gâyf ayx hoiđ max naih Tênb-Hungh nyăngz yeenx tăpb ănz woa pyây bloongh nyăngz munh. ⁵ Woax đomc jengz đekx yâuc max tuz quyênh hoiđ woax đomc munh tayc, cungb wâyb nănh stiz caux pyaz lav, nâyx đomc jengz đekx tăpc munh munz seetb cayx năngđ stăpb tăpc munz nâyx. ⁶ Woa pyaz lav cah njaf, woax đomc munh oix lov jau tayc nzongf, six max hayh tayc, wâyc zuc tayc nyăngz jau lauf gâyh nănh stiz côz. ⁷ Woax đomc jengz đekx, yâuc phătc zoongz cayx năngđ zoongz maf ninyh panx pengz, nănh stiz nyăngz pyây yâuc cayx năngđ munh đongx mouc ănz đunb wăngh, nzof mynb yâuc cayx năngđ munh mynb. ⁸ Nănh stiz nyăngz đongz yâuc cayx năngđ munh nzif đongz, nyah yâuc cayx năngđ njanh zongh nyah. ⁹ Nănh stiz nyăngz cah lapc yâuc naih cayx năngđ njab zapz nâyx pongz cah lapc, nănh stiz nyăngz đatz beb taih yâuc buib cayx năngđ zoongz maf sex ninyh panx pengz bix buib nâyx. ¹⁰ Nănh stiz yâuc naih tây cayx năngđ săpb congz nâyx hayh tănx munh, six nâyx đomc jengz đekx tây naih jab hoiđ munh plaz lav cah njaf. ¹¹ Nănh stiz naih ah tauh Hungh six Stynz-munh, six cun woax nomz staiz nanc Cotb. ¹² Tah yeetx hungđ staiz nanc quaix nzuf, Quaix đangz năngx naih iz hungđ staiz nanc năngx seetb taih. ¹³ tah guf tauh stynz-munh pyom nănh nyăngz blungh blex, yaz yâuc naih woac stingb seetb woa Tênb-Hungh nyăngz congx toongh woax đomc sămz joongz taih. ¹⁴ Woax đomc woac coong bux nzauf blungh blex woa tah guf woax tauh Stynz-munh Coong, “pungx goib phunz woa pyâyz lanh Stynz-munh zuc stayb yămz woa ơ-phơ-ratv coiđ lub. ¹⁵ Nâyx đomc pyâyz tauh stynz-munh zuc stayb njâuh ănz nây zu tauv bengc săngx huđ, noib lav nyăngv, nănh stiz tuz pungx goib seetb ninyh tayx bamh munh pôz phănc ah phănc yămz nây nib mync. ¹⁶ Yaz numđ coong zâyh maf woax đomc pengz naih iz pez jeof lanh munh. ¹⁷ Yaz phătc nâyx đomc hynđ yangh nyăngz dlayc six năngđ nâyx, woax đomc maf cloon zâyh maf nyăngz munh six năngđ nâyx, zâyh maf nyăngz pengz yâuc naih njab zapz pongz nănh stiz cah lapc njaox stib cayx năngđ tâuf, nzof maf nyăngz nzeetx yâuc cayx năngđ njanh zongh nzeetx, nănh stiz nja tâuf seetb nzeetx taih yâuc naih tâuf sâuv njămx mengz cayx năngđ wuôngh tâuf nâyx. ¹⁸ Pôz phănc nyeenh mănh ah phănc zuc tayx tayc wâyc nâyx đomc maf tăng nănh stiz nyăngz nzeetx nja seetb taih nyăngz wuôngh tâuf sâuv. ¹⁹ Woax đomc maf nyăngz jab six yămz nănh stiz nyăngz nzeetx cloon tây, nănh stiz nyăngz tây cayx năngđ nangz nâyx, yâuc naih pyây hayh nongc hoiđ munh. ²⁰ Năngx yăngc woax đomc max zuc nâyx đomc staiz nanc hoiđ nyăngz munh, yâuc max nyunc coi nyâuđ quanyf nănh stiz ayx nyăngz stoif, nănh stiz lauf max nyunc quanyf congx manđ paix miuc hanyh, nănh stiz nongc sămz, nongc nyanh, nongc njăngx, nongc njauz, jâux ayx miuc hanyh nongc paix, six max hayh yăngh, max hayh mangc, max hayh mungv, max hayh pâyz mungv lungđ nyăngz hanyh. ²¹ Nănh stiz lauf max nyunc coi nyâuđ quanyf stiz ayx stac, ayx pongz lauh, ayx papz tayx munh nyăngz stoif