¹ Yaz năngx phătc pitc tauh yongb nzongf nyăngz Stynz-munh yămz woa Gungh nzac taih, nănh zuz Gwuyz đao pec cayx năngđ vănx nâyx pêuz nănh, nănh nyăngz pyây yâuc đongx côngz cangx, mynb yâuc cayx năngđ bah noib, nzof nănh nyăngz staux yâuc cayx năngđ tâuf njâuh nâyx. ² Nănh nyăngz puf nzauf ah zây stâub jeenz, coib mangc, nănh nyăngz byaoh staux zaiđ woa coiđ, staix staux zaiđ woa coiđ synh. ³ Nănh hamv stingb lub cayx năngđ njanh zongh haoh, nănh hamv songf, yâuc naih nhlic stingb bah congz bletz tauz nănh. ⁴ Nây nhlic đitb bah congz bletz blătc, yaz zaub puf cayx ta ja staox zoz, six naih woac coong seetb woa gungh taih, max nongc ja, six zuc nyâyh nây nhlic đitb bah congz âyz gâyf six lungđ". ⁵ Yaz phătc stâuđ woa coiđ, staux zaiđ woa coiđ synh woax tauh stynz-munh stungb blaoh puf staox gungh ninyh. ⁶ Nănh coong, “yaz tingz stâyv quâyx săngh tauv banc stâyv banc đaic woax tauh nyăngz bux, “nănh coong zâyx Gungh, zâyx nib, cloon yămz nib mync nyăngz muif hungđ, zuyx coiđ, cloon yămz coiđ nyăngz zuy njiênf, woax tauh Stynz-munh nyunc coong, “năngx gâyf năngx ngaih nzof gôh! ⁷ Tauv bengc săngx huđ woa tah jeetb tauh Stynz-munh pyom nyăngz blungh blex woax zanyf, Tênb-Hungh ayx songf nănh max zengx phunz hynđ yangh nyăngz dlayc, cayx năngđ nănh bux nănh nyăngz pâu, cloon nănh nyăngz tâuc woac munh. ⁸ Yaz yâuc năngx numđ naih woac stingb coong yămz woa Gungh bux yaz coong, “mâyh ninyh zoz stâuđ woa coiđ, staux zaiđ woa coiđ synh woax tauh stynz-munh woa puf nzauf coib mangc woax zây stâub nzâyz taih gôh! ⁹ Yaz ninyh tauv woax tauh Stynz-munh nyăngz cah đangc jođ nănh, stynz-munh songđ phunz woax zây stâub jeenz yaz, yâuc bux yaz coong, “mâyh nhlync lâyc zây stâub zef gôh, yaz nhlync yâuc naz tauv nyâuđ njaf yâuc numđ imz lemb, six yaz nây nzeetx njaf yâuc numđ camz đămh cayx năngđ mâyf toongh nâyx. ¹⁰ Yaz songđ ninyh zoz Stynz-munh woa puf woax zây stâub jeenz nzâyz taih nhlync, yaz nyăngz nzeetx njaf camz cayx năngđ mâyf toongh, six yaz naz muf tauv nyâuđ njaf yâuc numđ imz lemb. ¹¹ Yâuc năngx naih woac bux yaz coong, “mâyh six zuc ninyh lănv Tênb-Hungh nyăngz woac bux đungx stingx munh, đungx nomz Côkz, đungx hungđ woac, cloon đungx tauh Hungh.