¹ Nâyx đomc dlayc quaix nzuf, yaz mangc woa gungh songđ phătc woa Tênb-toongh Côkz naih ah tungđ jengh coib goib woa, yaz numđ zetx đomc woac stingb cayx năngz blungh blex stingb nâyx bux êu yaz coong, “mâyh phanv quaix nây taih yaz oix nuz phunz mâyh mangc đangz noib oix naih toix laiv hungđ dlayc six seetb taih. ² Lênh dlih tuz Singx-lingh cun yaz, yaz songđ mangc phătc woa Tênb-toongh nyăngz tync, yâuc naih Hungh stâyv woa. ³ Stâyv woa Hungh tync woax tauh cayx năngđ njauz pyây saix, yâuc cayx năngđ pou zâuz stib buf, yâuc naih côngz cangx quinb woa cah zâyc, yâuc naih pou zâuz saix quib woa cah synh njămx mengz glingf-glinyf têx. ⁴ Woax nomz Hungh tync yâuc naih nhlic săpc stâyx nomz tync quib woa cah synh nzêux nzuf. Yâuc năngx naih nhlic săpc stâyx lanh munh côx zuz Gwuyz đao phangb pec stâyv woa, nănh stiz nyăngz pyây yâuc đongx sămz cunz stâyv woa glinyf-glinyf têx. ⁵ Yămz woa Hungh tync yâuc naih bungh bitc tâuf nzăpc-nzăpc têx seetb taih, yâuc năngx naih bah côngz buib clinyb clinyb têx, woa Hungh tync cah đangc yâuc naih nhlic zâyz toongz tăng Tênb-Hungh woa nhlic nomz mengc hoonh seetb taih sac woa đengb đengb. ⁶ Yămz woa Hungh tync cah đangc mangc phătc năngđ naih ah nomz cayx năngđ munh sây canyx, naih coiđ đăngb zengh, yâuc phătc naih pyâyz tauh stengb hiv, cah đangz cah đangc naih mâyc pong nzuf. ⁷ Tah yeetx tauh cayx năngđ njanh zongh, tah nyâyc tauh cayx năngđ ngoongh wăngh câu, tah stamz tauh mynb cayx năngđ bamh munh, tah stâyx tauh cayx năngđ pungb wăngh đayv nâyx. ⁸ Nâyx đomc pyâyz tauh stengb hiv, muif tauh naih joz lepz đatz, đatz cungh gwoaic, đatz cah njaf, yâuc naih mâyc pong nzuf, nănh stiz ayx Nzungz hamv quaix noib quaix munf max sec, nănh stiz hamv coong, “Đăngb zengh, đăngb zengh, dlênc quaix nyăngz Zâu Tênb-Hungh, “six lôx noib yămz, nâyx zanyf yămz, đangz phanx năngx taih woax tauh. ⁹ Laiv dlih nâyx đomc pyâyz tauh stengb hiv yâuc hâuđ tanv stâyv quâyx săngh tauv banc stâyv banc đaic woax tauh. ¹⁰ Woa nhlic săpc stâyx tauh munh côx songđ quâyc nzac paix stâyv woa Hungh stâyv quâyx săngh tauv banc stâyv banc đaic woax tauh, nănh stiz mutx nănh stiz nyăngz sămz mouc tăpx ănz stâyv woa Hungh tync woax tauh cah đangc, yâuc ayx Nzungz tanv coong, ¹¹ “Zâu six buz nyăngz Tênb-Hungh! Mâyh payh tuz buz tanv mâyh, mâyh payh tuz zanyb mâyh, mâyh payh tuz stipx lanyf zâyx muif hungđ seetb woax tauh, muif hungđ âyz mâyh nyăngz âyx zâyx seetb taih yâuc tuz săngh yămz nây.