¹ Six zuc ja jeenx lănv bux phunz Satc-đê, Huyđ-toongh nyăngz munh coong năngđ nâyx, Six naih Tênb-Hungh nyăngz nhlic nomz mengc hoonh, cloon nhlic nomz stingz tau woax tauh năngđ nâyx bux Coong, “yaz pâyz tuz mâyh ayx nyăngz dlayc, mâyh manyf đamz manyh coong mâyh săngh, six mâyh tayc blătc nzof. ² Six zuc sting đyub taih, nongc jab ayx năngx njoongh toix laiv hungđ dlayc cayx tayc stutc nzuf, âyz Zâu Tênb-Hungh mangc mâyh ayx nyăngz dlayc max zengx tuz clakx clunh. ³ Mâyh năngx gâyf nyâuđ cob mâyh tuz numđ munh nzaox quaix mâyh toix laiv hungđ woac, six zuc ayx âyz yâuc coi nyâuđ quanyf stoif, năngđ max đyub sting têx, yaz six oix ninyh cayx năngđ stac munh nâyx, mâyh yâuc max pâyz laiv zanyf yaz ninyh tauv mâyh woa, mâyh yâuc max pâyz buôngh. ⁴ Six yămz nyâuh Satc-đe Huyđ toongh nyăngz munh lauf năngx naih batz lanh leđ max phunz nănh stiz nyăngz Gwuyz quav cah lôh, woax đomc munh songđ tuz zuz Gwuyz quav pec lêpc yaz yăngh jau, wâyc zuc nănh stiz six payh tuz lêpc yaz nyăngz munh. ⁵ Laiv lanh tuz hingh six tuz zuz Gwuyz quav pec cayx năngđ nănh stiz nâyx, nzof yaz yâuc max stotb woax đomc tuz hingh munh nyăngz bux gâyh woa săngh mengc tanz. Nănh stiz Yâuc tuz yămz yaz nyăngz Pha, cloon Pha nyăngz Stynz-munh yâuc nhlimc woax tauh ayx nănh stiz nyăngz munh. ⁶ Laiv lanh naih bah nomh six zuc nzaz bah nomh mungv singx-lingh bux Huyđ-toongh nyăngz woac. ⁷ Six zuc ja jeenx zuyz phunz Stynz-munh yămz Phi-la-đen-phi Huyđ-toongh nyăngz munh bux stiz năngđ nâyx Coong, “nây six đăngb zengh nyăngz seenz gâyf woax tauh bux coong, “nănh nzauf Đa-vitv Hungh nyăngz ja zâyh, nănh coib yâuc max naih mănv omz tuz, nzof nănh omz yâuc max naih mănv coib tuz. ⁸ Yaz pâyz tuz mâyh ayx nyăngz cumh pâuz, mangc geh! Yaz coib ah tungđ jengh ănz lâyc, max naih laiv lanh hayh omz tuz, yaz pâyz tuz mâyh nyăngz jab êux, six mâyh yâuc mungv âyz yaz nyăngz woac ayx, yâuc max quanyf yaz nyăngz bux. ⁹ Mangc geh! Naih ah đomc munh limb Sax-tanx woax jau, nănh stiz cănh zanyb nănh stiz six ayx Yiu-tai nyăngz munh, six max zâyf seenz nyăngz Yiu-tai munh, wâyc zuc nănh stiz puv maoh jaf munh, yaz songđ oix ayx phunz nănh stiz quâyc nzac mâyh nyăngz staux cah synh ninyh, yâuc phunz nănh stiz pâyz tuz yaz stăngz mâyh năngđ laix. ¹⁰ Wâyc zuc mâyh âyz yaz nzaox nyăngz woac ayx, yâuc nongc noic tanyđ tuz zâuđ nanc, yâuc max quanyf seenz stymz, tauv nây bamh canz pongh zuc nâyx đomc stâyv nyâuđ dlauc wâyb nyăngz staiz nanc, yaz songđ leđ max phunz mâyh pongh zuc nâyx đomc staiz nanc. ¹¹ Yaz cayx taih căn gôh, mâyh six zuc năngđ cayb lif năngx gongx mâyh naih nyăngz tax hungđ, nongx gâyf bây laiv lanh taih zab zoz mâyh nyăngz banyh tênb mouc nzâyz ninyh. ¹² Laiv lanh tuz hingh, yaz six oix phunz woax tauh tuz ayx Tênb-Hungh yămz nyăngz layf paix toongh nyăngz ah nomz pyau njâuh. Nănh stâyv quâyx max zâuđ seetb đăngb zengh nyăngz tync, yaz yâuc oix ja yaz nyăngz Tênb-Hungh nyăngz bux ănz nănh nyăngz stynb. Yâuc ja Tênb-Hungh woax nomz stengv bux, six yaz nyăngz Tênb-toongh Côkz nzac taih woax nomz bux âyz gâyf six Yeê-lu-sa-lem stengv, yaz six ja yaz nyăngz săngb bux ănz nănh nyăngz stynb. ¹³ Laiv lanh naih bah nomh six zuc nzaz bah nomh mungv năngx gongx Singx-lingh bux songx Huyđ-toongh nyăngz woac. ¹⁴ Mâyh six zuc ja jeenx zuyz phunz Stynz-munh yămz Lao-đi-sê Huyđ-toongh bux nănh coong nâyx, “Nây six ayx A-men woax tauh nyăngz woac, nănh six ayx săngh mengc yâuc ayx zanyx manyf, yâuc ayx Tênb-Hungh zâyx muif hungđ taih nyăngz coonz tay woax tauh bux Coong, ¹⁵ “Yaz pâyz tuz mâyh ayx nyăngz cumh pâuz, max joomz yâuc max nămx, max cun hănđ joomz mah six nămx lauf gongx. ¹⁶ Six mâyh max joomz max song, sâuđ-sâuđ ha, yaz songđ oix nja mâyh seetb yaz nyăngz nzeetx njaf taih. ¹⁷ Mâyh coong yaz puv quâyx muif hungđ naih dloih nzuf max yêmv lungđ, six mâyh lenf lôx max pâyz tuz mâyh zâuđ nanc, jic tuz hâuđ lênh mâyh zâuđ nanc, yâuc mâyc blâuf, yâuc blănc stynb yămz. ¹⁸ .Yaz bux mâyh, six zuc maif yaz ănz tâuf lâuh stynx taih nyăngz sămz nyanh nzâyz lauf, nongc maif gwuyz quav pec zuz, nongc tăng hayh loi seetb taih numđ nyayz nyăngz tync, yâuc nongc maif mađ lauf hâuh ănz mâyh nyăngz mâyc buf nzăngđ hayh mangc tuz phătc jau. ¹⁹ Tinyh phanv yaz stăngz nyăngz munh, yaz six mađ panx nzaox, mâyh zuc joomz nyâuđ coi nyâuđ quanyf mâyh nyăngz stoif. ²⁰ Yaz six yămz woa jengh cungh gwoaic boz jengh, laiv lanh năngđ mungv yaz nyăngz woac, yâuc coib phunz yaz, yaz six nzac ninyh tayđ nănh, cloon nănh nhlinc bah nzămc năngv. Nzof nănh yâuc tuz cloon yaz yămz. ²¹ Laiv lanh tuz hingh yaz songđ phunz woax tauh naih gâyf cloon yaz stâyv yaz nyăngz tync, năngđ yaz tuz hingh yâuc tuz cloon yaz nyăngz pha, stâyv pha nyăngz tync. ²² Laiv lanh naih bah nomh six zuc nzaz bah nomh mungv Singx-lingh bux songx Huyđ-toongh.