¹ Mâyh six zuc ja jeenx phunz Ê-phê-sô, Huyđ toongh nyăngz Stynz-munh, jeenx ja lănv bux nănh stiz năngđ nâyx. nây six byaoh puf nzauf nhlic nomz sting tau, yăngh woa nhlic zây sămz toongz mungh mungh tonngx congv quaix ninyh quaix lauf woax tauh bux coong nyăngz woac. ² Yaz pâyz mâyh ayx nyăngz dlayc, cloon mâyh ayx nyăngz cumh pâuz seenz zâuđ nzongf, mâyh yâuc nongc noic tanyđ tuz, yâuc max munggv okx munh, mâyh yâuc cănh stâyv quaix stiz ayx nyăngz cumh pâuz, nănh stiz six max zâyf ayx za nyăngz cumh pâuz munh. ³ “Yaz pâyz tuz mâyh wâyc yaz nyăngz bux nongc noic tanyđ zâuđ yâuc max quengx. ⁴ Six naih ah hungđ max quaix yaz nyăngz stymz nyâuđ yaz oix coong bux mâyh, six nâyx zanyf wâyc mâyh max stăngz yaz năngđ quef coonz mâyh stăngz yaz woa. ⁵ Nyâyh mangc jađ, đangc dlih mâyh stăngz yaz, six nâyx zanyf mâyh gâyh yaz tăng laiv gôh, mâyh six zuc coi nyâuđ phunb đangz lauf ayx cayx năngđ đangc dlih woa nâyx, six coong mâyh năngđ max coi nyâuđ têx, yaz oix ninyh zoz mâyh woa woax zây toongz seetb taih mâyh woax nomz tync. ⁶ Six mâyh naih hungđ gongx nyăngz jau jic tuz tanv, wâyc zuc mâyh hănđ Ni-cô-la, woax jau munh ayx nyăngz dlayc năngđ yaz hănđ nâyx. ⁷ Laiv lanh naih bah nomh six zuc nzaz bah mungv năngx gongx Singx-lingh năngđ laix bux songx Huyđ-toongh, laiv lanh tuz hingh, yaz six sađ phunz nănh naih gâyf tuz nhlinc Tênb-toongh Côkz, Tênb-Hungh woa lauđ wynb nyăngz yungf mengc pyâu. ⁸ Mâyh six zuc ja jeenx phunz Sê-mêkc-nơ, Huyđ-toongh nyăngz munh bux nănh năngđ nây coong, “ayx quef coonz, yâuc ayx stêtb mâyv woax tauh, tayc blătc yâuc năngx phunb stengb taih woax tauh bux coong, ⁹ “Yaz pâyz tuz mâyh dlauc huđ, yâuc zâuđ nzongf, six mâyh seenz năngx puv quâyx Quaix! Nzof yaz yâuc pâyz tuz naih pitc tauh munh coong woac peo mâyh, nănh stiz cănh zanyb nănh stiz ayx Yiu-tai munh, six max zâyf seenz Yiu-tai munh, nănh stiz songc Sax-tanx nyăngz gwoanc. ¹⁰ Năngx gâyf cumh nzav, mâyh cayx zuc tanyđ nyăngz zâuđ nanc, yaz six phunz mâyh pâyz tuz Sax-tanx, six zoz nyâuh ah po munh nzâyz ninyh clăngc ănz nzauh, stâyv wâyb nyâuh săpc noib cah njaf, nyâuh six zuc nongc naih stymz tanyđ năngx tauv tayc, yaz songđ sađ nomz săngh mengc nyăngz banyh Tênb-mouc phunz mâyh. ¹¹ laiv lanh naih bah nomh six zuc nzaz bah noomh mungv Singx-lingh bux Huyđ toongh nyăngz woac, laiv lanh tuz hingh, six max zuc tayc tah nyâyc hâyđ. ¹² Mâyh six zuc ja jeenx phunz Betc-găm Huyđ toongh nyăngz Stynz-munh năngđ nâyx coong, “naih ah zungz nzuc đao iz mynb njayc njemh woax tauh bux Coong, ¹³ Yaz pâyz tuz mâyh yămz lâyc nomz tync six Sax-tanx yămz nyăngz tync, Six mâyh yâuc zeen wăn yaz nyăngz manyh yangh, yâuc max quanyf yaz, mâyh yâuc max quanyf seenz stymz, An-ti-ba , ayx zanyx manyf bix zuc tayx tayc, woax nomz tync six Sax-tanx manđ yămz woax nomz tync. ¹⁴ Six naih ah tyuh yaz oix coong mâyh, yămz mâyh lâyc naih ah đomc munh ninyh lêpc Ba-la-am nzaox gâyf, lôx noib Ba-la-am, nzaox Ba-lakv, ênz i-sa-la-ên munh ninyh pamf stoif,* jaf nănh stiz ninyh nhlync congx miuc hanyh nyăngz tax hungđ, yâuc ayx pongz lauh nyăngz dlayc. ¹⁵ Yămz mâyh lâyc lauf naih ah đomc munh ninyh lêpc Na-cô-la, nzaox nyăngz gâyf. ¹⁶ Năngđ ha mâyh songđ zuc coonx coi nyâuđ quanyf stoif, năngđ max têx, yaz songđ oix coonx ninyh nongc yămz yaz nyăngz nzeetx nja seetb taih woax zungz nzuc đao njayc cloon woax đomc munh panx zax. ¹⁷ Laiv lanh naih bah nomh six zuc nzaz bah nomh mungv năngx gongx Singx-lingh coong bux Huyđ-toongh, “laiv lanh tuz hingh yaz six zoz pinyx vâyv woax nomz ( Ma-na, ) phunz nănh, yaz six jaoz phunz muif lanh ah nomz njauz pec, yâuc naih ah nomz săngb bux ja ănz woa njauz, seetb nzuf tuz stipx njauz woax đomc munh, pitc lanh yâuc max pâyz tuz woax nomz săngb bux. ¹⁸ Six zuc ja jeenx zuyz phunz Ti-a-ti-lơ, Huyđ-toongh nyăngz Stynz-munh năngđ nâyx Coong, “Tênb-Hungh nyăngz toonz, mâyc năngđ tâuf byetc, staux năngđ munh pu tongh stib woax tauh năngđ nâyx bux coong, ¹⁹ “Yaz pâyz tuz mâyh ayx nyăngz jau, yaz pâyz tuz mâyh stăngz yaz, zeen yaz canyx bongc munh yâuc naih noic tanyđ, yâuc pâyz tuz mâyh ayx nyăngz congz năngx đungx têx njynh leox. ²⁰ Six naih ah hungđ yaz pong nyâuđ oix coong mâyh, nănh cănh zanyb mâyh ayx tauh tâuc woac munh nzif, Yê-sê-bên, nzaox za gâyf jaf yaz nyăngz pâuz, ayx pongz lauh nhlinc congx miuc hanyh nyăngz tax hungđ pamf stoif. ²¹ Yaz phunz nănh naih săngx huđ congv coi nyâuđ quanyf stoif, six nănh max jiuc. ²² Six coong nănh năngđ max coi nyâuđ quanyf văngf munh nyăngz stoif, yaz songđ oix zoz nănh quanyf ănz woa zâuv cah zâyc, phunz nănh tanyđ munz, six Coong woax đomc pamf stoif nyăngz munh cloon nănh năngđ max nyunc coi nyâuđ quanyf woax đomc văngf munh nyăngz stoif, lauf zuc dlauc huđ. ²³ Yaz six tayx nzuf nănh nyăngz sây stunz, nzof muif nomz Huyđ toongh songđ pâyz tuz yaz six hayh zah tuz seetb bamh munh nyăngz stymz nyâuđ nyâyh oix ayx laiv hungđ, yaz songđ âyz coz munh ayx nyăngz dlayc clao phunz nănh stiz. ²⁴ Six năngx yăngc woax đomc yămz Ti-ya-ti-roơ, max lêpc woax đomc pinyx nzaox Sax-tanx nyăngz gâyf woax đomc munh, yaz lănv bux nyâuh, yaz songđ max zoz laiv hungđ nic pâu phunz nănh stiz đamz toongz. ²⁵ Six nyâuh six zuc lif năngx gongx nyâuh naih nyăngz tax hungđ, zu tauv yaz năngx taih. ²⁶ laiv lanh tuz hingh yâuc âyz ayx, tauv stêtb mâyv woax noib, yaz songđ phunz woax tauh naih lanyf cun manf stingx, năngđ yaz nyăngz Pha phunz yaz naih lanyf cun pec stingx. ²⁷ Nănh six nongc ah stynz njab langb bopc nănh stiz năngđ munh bopc nib engz nâyx yungc nzuf. ²⁸ Yaz yâuc zoz taiv pengh pec stingx jaoz phunz nănh Cun. ²⁹ Laiv lanh naih bah nomh six zuc nzaz bah nomh mungv năngx gongx Singx-lingh bux songx huyđ-toongh.