¹ Yaz phătc săngb Gungh săngb nib, wâyc zuc lôx gungh lôx nib quaix nzuf max naih nzof. ² Yaz năngx phătc đăngb zengh nyăngz săngb Yê-lu-sa-lem stengv, Tăng Tênb-toongh Côkz, Tênb-Hungh woa nzac taih. woax nomz stengv bênc săngh phunz zu cayx năngđ săngb bongf bênc săngh zu săngb langh nâyx. ³ Yaz năngx numđ naih woac stingb yămz woa Hungh tync seetb taih coong, “nâyx zanyf Tênb-Hungh yămz nyăngz tync, six munh gongx mungh toongx congv, Zâu yâuc cloon nănh stiz yămz, nzof nănh stiz yâuc ayx Zâu nyăngz pec stingx, Zâu cloon nănh stiz yămz yâuc ayx nănh stiz nyăngz Tênb-Hungh. ⁴ Zâu yâuc oix stotb mâyc womz phunz nănh stiz, max naih laiv lanh zuc stauh, zuc munz, zuc haoh, wâyc zuc lôx nyăngz dlayc quaix ninyh blătc nzuf. ⁵ Stâyv woa Hungh tync woax tauh bux yaz coong, “mangc geh! Nâyx zanyf yaz ayx phunz muif hungđ pênx săngb nyăngz taih nzuf, nănh năngx bux êu yaz ja staox nâyx đomc dlayc, nănh coong nâyx đomc dlayc six seenz nyăngz couv tuz wăn nyăngz coonz tay. ⁶ Nănh năngx bux yaz Coong, “ayx săngh nzof gôh! Yaz six ayx An-pha, yâuc ayx Ô-mi-ga, yaz ayx quef coonz, yâuc ayx stêtb mâyv woax tauh, laiv lanh nyâuđ gatb, yaz yâuc oix cungb phunz phunz yungf mengc nyăngz womz sting nănh hopb. ⁷ Laiv lanh tuz hingh nâyx đomc phănc six pênx nănh nyăngz, yaz yâuc ayx nănh stiz nyăngz Tênb-Hungh, nănh stiz yâuc ayx yaz nyăngz namh nyâuf. ⁸ six woax đomc tam jeenz, max zeen tingc, ayx huđ dlayc, tayx munh, pungx papz hoiđ munh, ayx pongz lauh, Coong woac jaf munh, paix miuc hanyh, nănh stiz nyăngz phănc six yămz woa tâuf coiđ, zuc wuôngh tâuf pu tayc tah nyâyc hâyđ. ⁹ Woa tah jeetb tauh Stynz-munh, six nzauf woa nhlic wăn staiz nanc, nzuf byăng woa tauh Stynz-munh bux yaz Coong, “taih nây mangc geh! Yaz oix nuz phunz mâyh mangc săngb bongf, six pa-jiz yungh jeenz nyăngz au. ¹⁰ Singx-lingh cun yaz, Stynz-munh songđ ênz yaz ninyh tauv nomz zoongz zâyc lub yâuc năngx njăngb quaix nyăngz zoongz zâyc nuz phunz yaz mangc phătc ah nomz đăngb zengh nyăngz săngb Yê-lu-sa-lem stengv, tăng tênb-toongh Côkz Tênb-Hungh woa nzac taih.* ¹¹ Woax nomz stengv naih Tênb-Hungh nyăngz Gwăngz-eng syux pong nzuf, naih gwăngz-eng cayx năngđ pou zâuz nâyx glinyf-glinyf têx njămx mengz, cayx năngđ canyx zan nâyx. ¹² Stengv nyăngz singh jengh lub yâuc njăngb nzongf, naih săpc nyâyc tungđ jengh, yâuc năngx naih săpc nyâyc tauh Stynz-munh zu woa singh jengh, yâuc năngx ja săpc nyâyc stingx i-sa-la-ên munh nyăngz bux ănz woa singh jengh. ¹³ Tongz puôngz pôz tungđ jengh, namh puôngz pôz tungđ, stayz puôngz pôz tungđ, pakx puôngz pôz tungđ jengh. ¹⁴ Singh yâuc nongc săpc nyâyc nomz njauz pyây zâyv ayx coonz, yâuc năngx naih pa-jiz yungh jeenz, săpc nyâyc lanh congz munh nyăngz bux ja ănz woa njauz payh. ¹⁵ Cloon yaz coong woac woax tauh Stynz-munh puf nzauf ah stynz sămz tungh gaob, nongc gaob singh jengh cloon singh. ¹⁶ Zâyv stengv đao cloon quăng tinyh đauz, Stynz-munh nzauf pya ninyh gaob stengv đao naih 12.000 ê-ta-đơ. Quăng njăngb đao tinyh buc. ¹⁷ Stynz-munh gaob Singh gongc njăngb ah pez stâyx săpc stâyx đôf, âyz bamh munh nyăngz tungh gaob. ¹⁸ Singh nongc pou zâuz mengz côx zâyv taih, singh cah njaf nongc sămz bôkc zâyv taih đăngb zengh năngđ nâyx. ¹⁹ Nongc pâub stengv zoz caux muif hungđ saix nyăngz tax hungđ pou zâuz taih zâyv. Tah yeetx hungđ six mengz côx, tah nyâyc hungđ six pec mengz, tah stamz hungđ six mengz blan, tah stâyx hungđ six mengz đăngb. ²⁰ Tah ngâuf hungđ six nonc, tah guc hungđ six stib nonc. Tah jeetb hungđ six mengz buđ, tah pêtz hungđ six mengz stămb, tah zu hungđ six stib longz, tah săpc hungđ six mengz gunx, săpc btetx six buđ mengz, săpc nyâyc six stib mengz. ²¹ Săpc nyâyc tungđ singh jengh naih săpc nyâyc nomz pou engz, singh cah njaf nyăngz jau nongc sămz bôkc zâyv đăngb zengh eng canyx. ²² Yaz max phătc stengv cah njaf naih congx toongh, wâyc zuc dlênc quaix nyăngz Zâu Tênb-Hungh cloon pa-jiz yungh zâyv woax nomz six nongc ayx singz tync. ²³ Woa stengv cah njaf max sămv tauv bah noib lav syux gwăngz, wâyc zuc Tênb-Hungh nyăngz gwăngz-eng cănh syux gwăngz, pa-jiz yungh jeenz yâuc ayx toongz. ²⁴ Gungh đi nyeenh mănh oix păngc nâyx nomz stengv nyăngz gwăngz-eng yăngh jau, manf Côkz nyăngz Hungh yâuc oix nzâyz nănh stiz nyăngz gwăngz-eng nzac woax nomz stengv ninyh. ²⁵ Stengv nyăngz singh jengh nzangh dlih coib woa, njynh leox max omz, wâyc zuc yămz woa max naih gungh nzămc dlih. ²⁶ Manf Côkz nyăngz munh oix nzâyz nănh stiz nyăngz gwăngz-eng nzac ninyh. ²⁷ Six laiv lanh max đăngb naih wâyx max tuz nzac ninyh, ayx cumh nzav, coong woac jaf munh nyăngz dlayc woax đomc munh max tuz nzac woax nomz stengv cah njaf ninyh, cungb naih bux ja yămz pa-jiz yungh nyăngz săngh mengc tanz woax đomc munh, nzăngđ tuz nzac woax nomz stengv cah njaf ninyh.*