¹ Stynz-munh năngx phunz yaz mangc yungf mengc woax nomz coiđ womz đăngb zengh cayx năngđ canyx zan nâyx, yămz Tênb-Hungh cloon pa-jiz yungh nyăngz tync njâuc seetb taih. ² Yămz woa stengv mungh tongx, iz phanx coiđ synh naih yungf mengc nyăngz njăngx pyâu pêux seetb woa taih, muif nyăngv săngh săpc nyâyc tongf pyâu. Muif lav săngh ah tongf, woax đomc njăngx noomh yâuc hayh zany tuz manf Côkz munh nyăngz gumc gongx nzuf. ³ Yămz woax nomz stengv cah njaf max naih laiv lanh năngx zuc Tênb-Hungh zaux laiv hungđ, Tênb-Hungh cloon pa-jiz yungh nyăngz tync oix yămz stengv cah njaf, Tênb-Hungh nyăngz cumh pâuz munh yâuc oix canyx bongc nănh. ⁴ Nănh stiz songđ mangc nănh nyăngz mynb, wâyc zuc nănh stiz nyăngz pyây nyah six naih nănh nyăngz bux ja ănz woa. ⁵ Blătc woa ninyh songđ max naih gungh nzămc dlih, nănh stiz max sămv tauv nongc toongz, cloon bah noib syux gwăngz-eng. Wâyc zuc Zâu Tênb-Hungh, ayx nănh stiz nyăngz gwăngz-eng, nzof nănh stiz yâuc ayx Hungh cun tauv banc stâyv banc đaic. ⁶ Stynz-munh bux yaz Coong, “nâyx đomc woac payh tuz zeen tingc, Zâu Tênb-Hungh sađ nănh nyăngz Singx-lingh phunz nănh nyăngz songx tâuc woac munh, paiđ nănh stiz nyăngz Stynz-munh ninyh lănv bux nănh stiz nyăngz pâuz pâyz tuz cayx naih toix laiv hungđ dlayc seetb taih. ⁷ Mungv bef! Yaz oix taih căn gôh, pou phunz laiv lanh lif nâyx zây stâub nyăngz woac woax tauh naih gwoanb-loc. ⁸ Yaz six Giăng, tuz numđ nzuf phătc nzuf nâyx đomc dlayc, yaz phătc yâuc mungv nzuf nâyx đomc dlayc, yaz songđ quâyc nzac Stynz-munh nyăngz staux synh ninyh paix nănh. ⁹ Six nănh bux yaz coong, “năngx gâyf paix yaz, ‘yaz lauf cloon mâyh tinyh năngđ, yaz lauf cloon nyâuh yâuf pez, cloon tâuc woac munh, năngx cloon woax đomc âyz nâyx zây stâub ayx woax đomc munh, six zuc paix Zâu Tênb-Hungh. ¹⁰ Stynz-munh năngx bux yaz coong, “năngx gâyf tăpb yeenx omz nâyx zây stâub lănv cah đangz cah đangc woac, wâyc zuc cayx tauv săngx huđ nâyx đomc dlayc seetb taih nzof gôh. ¹¹ Laiv lanh ayx okx dlayc yâuc phunz nănh ayx okx dlayc, laiv bah lotb dlayc yâuc phunz nănh njynh luz ayx, laiv lanh ayx gongx dlayc lauf phunz nănh njynh leox ayx gongx dlayc, laiv lanh ayx đăngb zengh, yâuc phunz nănh stâyv quâyx ayx đăngb zengh nyăngz dlayc. ¹² Nănh coong mungv bef! Yaz cayx taih gôh! Yaz cayx nzâyz coz munh nyăngz sâuđ nyâyc taih phunz nănh stiz, âyz nănh stiz ayx nyăngz dlayc clao phunz nănh stiz. ¹³ Yaz six ayx An-pha, yâuc ayx ô-mi-ga, woax tauh, ayx quef coonz yâuc ayx stêtb mâyv woax tauh. ¹⁴ Pou phunz laiv lanh đôv nănh nyăngz gwuyz đăngb zengh nyăngz munh, yâuc tuz quyênh nhlync yungf mengc nyăngz njăngx pyâu, yâuc năngx tuz yăngh nzac woa singh jengh cah njaf ninyh. ¹⁵ Yămz woa cungh ngwoaic stengv woax đomc clô six ayx max pênx nyăngz dlayc woax đomc munh, ayx papz jaf munh, hoiđ munh nyăngz munh, văngc sab, văngc baox nyăngz munh, cloon paix miuc hanyh woax đomc munh yămz woa. ¹⁶ Yaz six Yê-su! Yaz paiđ yaz nyăngz Stynz-munh lănv nâyx đomc zanyx manyf woac bux mâyh, phunz mâyh lănv bux songx huyđ toongh, Yaz ayx Đa-vitv nyăngz stongz zez tâuh, yâuc ayx sây stunz, yâuc ayx gwăngz-eng taiv pengh caz. ¹⁷ Singx-lingh cloon săngb bongf coong, “taih gôh! Laiv lanh numđ nâyx đomc woac yâuc zuc coong, “taih gôh! Laiv lanh nyâuđ gatb nyămh dlongh taih lov, laiv lanh oix hopb, yâuc phunz nănh nzac taih hopb nây săngh mengc nyăngz womz taih lov yaz cungb sangđ phunz nănh. ¹⁸ Yaz bux quaix laiv lanh tuz numđ tâuc woac munh ja nâyx đomc cah đangz cah đangc woac, laiv lanh năngđ pâu laiv hungđ nzac nâyx pun stâub, Tênb-Hungh six pâu nâyx zây stâub lănv nyăngz staiz nanc phunz nănh. ¹⁹ Six coong laiv lanh năngđ zoz tâuc woac munh lănv nâyx zây stâub nyăngz jau, lănv cah đangz cah đangc nyăngz dlayc seetb taih, Tênb-Hungh songđ lauf zoz nănh yungf mengc nyăngz pyâu seetb taih, cloon nâyx zây stâub lănv woax đomc đăngb zengh nyăngz phănc. ²⁰ Wâyc nâyx đomc dlayc ayx zanyx manyf woax tauh coong, “yaz seenz oix taih căn, (A-Men) Zâu Yê-su lex! Jođ mâyh coonx taih zef gôh! ²¹ jođ Zâu Yê-su sađ pôz phunz Tênb-Hungh nyăngz songx pec stingx (A-men)*