¹ Yaz mangc phătc ah tauh Stynz-munh yămz woa tênb-toongh nzac, nănh nyăngz puf nzauf ah tauh ja zâyh nzauf cloon ah stymz njab langb nzac taih nongc coib woax nomz đôz nzongf nyăngz staiz nanc cotb. ² Côngz Hungh six lôx noib woax tauh nangz, Sax-tanx manđ nyăngz Hungh, nănh zuc stayb ah tynb nyăngv. ³ Quanyf nănh ănz nzac woax nomz staiz nanc cotb cah njaf ninyh, ja cotb nzeetx clangc nănh ănz woa, max phunz nănh ninyh yâuh gungh đi jaf nyeenh mănh, tauv nzuf hanf ah tynb nyăngv, nănh songđ tuz pungx seetb taih ah dlapc thơih gian niny. ⁴ Yaz phătc stâyv woa muif nomz Hungh tync woax đomc munh muif lanh tuz lanyf stămđ stoif, yaz phătc stăngc ayx zanyx manyf lănv Zâu Tênb-Hungh nyăngz gâyf bix zuc cumv pyây tuih woax đomc munh nyăngz mengc hoonh, nănh stiz max zengx congx miuc hanyh, max zengx tăpb stengb hiv yeenx ănz pyây ploongh, mah six ănz puf, nănh stiz tuz săngh phunb stengb taih cloon Njâuv Zâu Yê-su cun ah tynb nyăngv. ⁵ Woax đomc pitc lanh munh tayc wâyc pitc hungđ dlayc, nănh stiz six max zengx tuz săngh phunb stengb, nănh stiz zuc zu tuz pong ah tynb nyăngv nzăngđ tuz săngh phunb stengb taih tah yeetx hâyđ. ⁶ Pou phunz laiv lanh naih phănc tuz săngh phunb stengb taih nyăngz munh, đăngb zengh yâuc tuz gwoanb loc, zuc tayc tah nyâyc hâyđ nyăngz jau, cun max zuc nănh stiz, nzof nănh stiz yâuc tuz cloon Njâuv Zâu Yê-su ayx stayb munh cun ah tynb nyăngv. ⁷ Pong ah tynb nyăngv Sax-tanx tuz pungx goib seetb woax nomz staiz nanc nzauh taih. ⁸ Nănh ninyh jaf gungh đi munh, Gotv nyăngz pec stingx, Ma-Gotv nyăngz pec stingx, căpx dlonf ah nomz tync bênc nyâuđ panx pengz, nănh stiz hongđ năngđ coiđ synh njauz staiz. ⁹ Nănh stiz ênz pengz ninyh pong nây gungh đi nib mync, wâyh nzêux Tênb-Hungh stăngz nyăngz pengz tync, six tâuf tăng gungh tuih nzac taih pu mêtc nănh stiz stutc nzuf. ¹⁰ Six Sax-tanx manđ nyăngz Hungh jaf munh, bix zuc stayb quanyf ănz tâuf coiđ, cloon woax đomc za nyăngz tâuc woac munh, năngx cloon woax tauh stengb hiv, zuc tingc stoif yămz woa tâuf coiđ quaix noib quaix munf tuz tauv banc nynh. ¹¹ Yaz phătc naih ah nomz tync lub phangb pec, yâuc phătc stâyv tync woax tauh Hungh, gungh cloon nib yămz nănh nyăngz cah đangc, yâuc pyaox nzuf max phătc naih lungđ. ¹² Yaz năngx phătc woax đomc tayc blătc nyăngz munh, max cun lub mah six jeenz, zuc stâuđ yămz woa Hungh tync cah đangc, yâuc coib woax đomc stâub ănz woa, zâyf năngx phătc coib pitc đomc săngh mengc tanz nyăngz stâub coib ănz woa, woax đomc munh tayc nyăngz hoonh zuc stămđ âyz nănh stiz yămz yangh stâyv ayx nyăngz dlayc. Ja staox ănz woa stâub bix âyz woa stămđ. ¹³ Coiđ yâuc zuc stungx tuih womz tayc nyăngz munh hoonh nzâyz taih ănz woa, yămz pâu zuc tayc nyăngz munh yâuc zuc stungx taih ănz woa, muif lanh munh zuc âyz nănh stiz ayx nyăngz dlayc stămz stoif. ¹⁴ Yămz canz zuc mêtc nyăngz dlănh zuc stayb quanyf ănz nzac Tâuf coiđ, woa tâuf coiđ six zuc tayc tah nyâyc hâyđ nyăngz tync. ¹⁵ Laiv lanh max naih bux ja ănz woa săngh mengc tanz, six zuc quanyf nzac Tâuf coiđ.