¹ Quaix đangz yaz năngx numđ naih stingb buib, cayx năngđ naih munh đungx căpx dlonf nyăngz stingb nây nănh stiz hamv Coong, “A-lê-lu-ya, Njâuv pôz cloon Gwăngz-eng six yămz pănh nyăngz Zâu Tênb-Hungh. ² Zâu tingc munh nyăngz stoif seenz tingc tuz pengh stymz nzongf, nănh tingc ayx lub quaix woax tauh munh sab nyăngz stoif, wâyc zuc woax tauh munh sab nongc nănh văngc munh nyăngz stoif ayx phunz bamh canz huđ nzuf. ³ Nănh stiz hamv Coong, “A-lê-lu-ya, lâyc nomz stengv zuc sac nyăngz tâuf sâuv đunc-đunc têx staox gungh ninyh tauv banc stâyv banc đaic. ⁴ Woax đomc nhlic săpc stâyx lanh munh côx, cloon woa pyâyz tauh stengb hiv songđ quâyc nzac Hungh tync ninyh paix Tênb-Hungh nănh stiz coong, “A-men, A-lê-lu-ya. ⁵ Năngx naih stingb yămz woa gungh seetb taih Coong, “Tênb-Hungh nyăngz songx cumh pâuz munh, cloon yeetx stong zanyb Zâu nyăngz munh, max cun ayx lub mah six ayx jeenz, six zuc cumh nzav nănh. ⁶ Yaz năngx numđ naih woac stingb cayx năngđ munh đungx căpx dlonf bix buib nâyx, yâuc cayx năngđ womz nzac zamc buib, lauf cayx năngđ bah congz haoh nyăngz stingb coong, “A-lê-lu-ya, buz dlênc quaix nyăngz Zâu Tênb-Hungh tuz ayx Hungh cun tingc. ⁷ Pănh six zuc numđ nyađ zanyb pănh ayx lub nyăngz Zâu Tênb-Hungh, wâyc zuc pa-jiz yungh jeenz nyăngz coonx hynh săngx huđ tauv nzof, nănh nyăngz munh sab stav yâuc zoongz stynb dloih nzuf nzof gôh. ⁸ Tênb-Hungh phunz nănh zoongz zuz đôc buyx buf pec đăngb zengh, nâyx đomc đôc buyx six đăngb zengh nyăngz munh ayx nyăngz gongx dlayc. ⁹ Woax tauh Stynz-munh songđ bux yaz Coong, “six zuc ja nâyx đomc phunz Tênb-Hungh êu taih nhlync pa-jiz yungh coonx hynh nyăngz năngv woax đomc munh songđ seenz naih oonz loc, Stynz-munh bux yaz Coong, “nây six Tênb-Hungh seenz gâyf nyăngz woac. ¹⁰ Yaz paix nzac nănh nyăngz staux synh, Six nănh bux yaz coong mâyh max nongc ayx năngđ nâyx đêh! Yaz lauf ayx cayx năngđ nyâuh yâuc pez nâyx, ayx zanyx manyf nzaox phunz Zâu Yê-su nyăngz munh, wâyc zuc Tênb-Hungh nyăngz woac, six stênx-stengb nyăngz woac stymz. ¹¹ Yaz phătc Tênb-toongh coib goib, năngx naih ah tauh maf pec seetb taih, zâyh maf woax tauh nyăngz bux six hipđ ayx, “naih stymz cloon seenz gâyf woax tauh, nănh six pengh stymz stamđ stoif, yâuc pengh stymz bopc zax. ¹² Nănh nyăngz mâyc gwăngz cayx năngđ tâuf byetc, nănh nyăngz pyây đongx banyh tênb-mouc, nănh nyăngz stynb ja ah nomz bux. Seetb nzuf nănh max naih mănv saz woax nomz bux. ¹³ Nănh zuz nyumc samđ nyăngz gwuyz đao, nănh nyăngz bux six Tênb-Hungh nyăngz woac. ¹⁴ Tênb-toongh nyăngz pengz zâyh maf pec zuz đôc buyx buf pec đăngb zengh lêpc nănh ninyh. ¹⁵ Nănh nyăngz nzeetx nja seetb ah zungz nzuc đao njayc njemh, nănh nongc tingc manf Côkz munh nyăngz stoif, nănh nongc ah stynz njab langb cun Côkz, yâuc oix nzapc yămz wow zax nyăngz pyâu toongh, six goib yangh dlênc quaix nyăngz Zâu Tênb-Hungh hănđ stoif, nongc nyuih nyăngz zax. ¹⁶ Nănh nyăngz gwuyz đao, cloon nănh nyăngz staux zuih naih ja ah nomz bux, “Muif hungđ nyăngz Hungh, “Manf Côkz nyăngz Zâu. ¹⁷ Yaz năngx phătc ah tauh Stynz-munh stâuđ woa bah noib hamv bux đayv đamx gungh nyăngz noc Coong, “taih gôh! Taih căpx dlonf nhlync Tênb-Hungh bênc nyăngz wănb ănz hynh lub. ¹⁸ Taih nhlync Hungh stix nyăngz A, cloon pengz pyây nyăngz A, zâyh maf cloon naih Quyênh woax đomc munh nyăngz A, max cun ayx nâuh, max ayx nâuh, ayx lub mah six ayx jeenz. ¹⁹ Yaz năngx phătc woax đomc stengb hiv, cloon bamh canz nyăngz Hungh pengz peob căpx dlonf taih oix cloon zâyh maf woax tauh Zâu nyăngz pengz panx zax. ²⁰ Six stengb hiv cloon ayx papz ayx jix caox njingf nyăngz dlayc jaf munh pamf stoif, cloon naih tăpx stengb hiv yeenx, cloon paix miuc hanyh woax đomc za tâuc woac munh songđ zuc stayb quanyf ănz nzac tâuf coiđ. ²¹ Năngx yăngc woax đomc munh, zâyf zuc zâyh maf woax tauh tăng nănh nyăngz nzeetx njaf nja seetb taih nyăngz nzuc đao cumv nănh stiz tayc stutc nzuf, yeetx stong noc nzac taih nhlync woax đomc munh nyăngz A pêu nzuf.